(ព្រះសីហនុ)៖ លោក​ ម៉ាង ស៊ីណេត អភិបាលខេត្តព្រះសីហនុ បានណែនាំនាយកគ្រប់គ្រងទីលានចាក់សំរាម ត្រូវសហការជាមួយមន្ទីរពាក់ព័ន្ធ ត្រូវធ្វើយ៉ាងណាប្រើប្រាស់ទីលានទុកដាក់សំរាមឲ្យអស់លទ្ធភាព ក្នុងការទុកដាក់សំរាម ព្រោះសំរាមដឹកចូលទីលានពីមួយឆ្នាំទៅមួយឆ្នាំមានការកើនឡើង។

លោកថា «ប្រសិនបើយើងមិនបានត្រៀមទុកជាមុននោះទេ បរិមាណសំរាមដឹកជញ្ជូនចូលទីលានកាន់តែមានចំនួនច្រើន ចាំបាច់យើងត្រូវប្រើប្រាស់ទីលាននេះទៅតាមបទដ្ឋាន បច្ចេកទេសក្នុងការទុកដាក់សំរាមសម្រាប់ ប្រើប្រាស់ឲ្យបានច្រើនឆ្នាំបន្ថែមទៀត មុននឹងយើងរៀបចំសាងសង់ទីលានថ្មីបាន»។

អភិបាលខេត្ត បានលើកឡើងដូចនេះក្នុងឱកាសអញ្ជើញដឹកនាំ អភិបាលរងខេត្ត អភិបាលក្រុងកំពង់សោម ក្រុមការងាររដ្ឋបាលខេត្ត និងមន្ទីរ-អង្គភាពជំនាញពាក់ព័ន្ធចុះពិនិត្យទីតាំងស្តុកសំរាម និងទីលានទុកដាក់សំរាម ស្ថិតនៅភូមិអូរតាសេក សង្កាត់អូរឧកញ៉ាហេង ក្រុងកំពង់សោម ខេត្តព្រះសីហនុកាលពីរសៀលថ្ងៃទី២ ខែធ្នូ ឆ្នាំ២០២៥។

គូសបញ្ជាក់ថា ទីលានចាក់សំរាម «អូរតាសេក» មានផ្ទៃដីជាង ៦៨ហិកតា ក្នុងដំណាក់កាលទី១ ធ្វើក្នុងបរិវេណ១៧ហិកតា ដោយឡែកក្នុងចំណោម ១៧ហិកតា មានសែលចំនួន៤ ហើយសែលនីមួយៗមានទំហំជាង១០០ម៉ែត្រ បួនជ្រុង ស្មើនឹង៧ហិកតា និងមានផ្ទៃដីគាំទ្រមានដូចជារបង តូបយាម រោងជាង ជញ្ជីង ឃ្លាំងញែកសំរាមជាដើម៕