(ភ្នំពេញ)៖ អនុវត្តជាប្រចាំ ដោយអភិបាលរាជធានី ណែនាំដល់មន្ទីរសុខាភិបាលរាជធានីភ្នំពេញ សហការជាមួយអាជ្ញាធរខណ្ឌទាំង១៤ ចាត់ចែងឱ្យក្រុមបាញ់ថ្នាំមូស របស់មន្ទីរពេទ្យបង្អែក និងមណ្ឌលសុខភាព នៅតាមខណ្ឌ សហការជាមួយកម្លាំងអាជ្ញាធរខណ្ឌ បានចុះបាញ់ថ្នាំមូស នៅតាមសង្កាត់ តាមភូមិនានា និងតាមសាលារៀន ក្នុងមូលដ្ឋានរបស់ប្រជាពលរដ្ឋ ទូទាំងរាជធានី ដើម្បីសុខមាលភាពប្រជាពលរដ្ឋ ពិសេសបង្ការទប់ស្កាត់ជំងឺគ្រុនឈាម។

លោក ងី មានហេង ប្រធានមន្ទីរសុខាភិបាលរាជធានីភ្នំពេញ បានឲ្យដឹងនៅព្រឹកថ្ងៃទី៣ ខែធ្នូ ឆ្នាំ២០២៥នេះថា ដោយមានការយកចិត្តទុកដាក់ និងការចង្អុលបង្ហាញពីលោក ឃួង ស្រេង អភិបាលភ្នំពេញ បានណែនាំឱ្យមន្ទីរសុខាភិបាលរាជធានីភ្នំពេញ ចុះបាញ់ថ្នាំមូសក្នុងមូលដ្ឋានភូមិ សង្កាត់ក្នុងខណ្ឌទាំង១៤ និងនៅតាមសាលារៀន។ លោកប្រធានបន្តថា សកម្មភាពនេះ បានធ្វើឡើងជាប់ជាប្រចាំតាំងពីដើមខែមករា ឆ្នាំ២០២៥មក ហើយគ្រោងបញ្ចប់នៅចុងខែធ្នូ ឆ្នាំ២០២៥នេះ។

ការយកចិត្តទុកដាក់ពីសំណាក់លោក ឃួង ស្រេង ចំពោះសុខមាលភាពប្រជាពលរដ្ឋនេះ បានធ្វើឱ្យប្រជាពលរដ្ឋ លោកគ្រូ អ្នកគ្រូ និងសិស្សានុសិស្ស សម្តែងនូវទឹកចិត្តសប្បាយរីករាយ យ៉ាងក្រៃលែង និងបានថ្លែងអំណរគុណដល់លោក ឃួង ស្រេង អភិបាលរាជធានីភ្នំពេញ និងរដ្ឋបាលខណ្ឌទាំងអស់ ដែលតែងតែគិតគូរពីសុខុមាលភាពសាធារណៈ នៅក្នុងមូលដ្ឋានខណ្ឌនានា ក្នុងរាជធានីភ្នំពេញ៕