(ណាងនីង)៖ ក្នុងឱកាសអញ្ជើញចូលរួមពិព័រណ៍ CHINA (GUANGXI)-ASEAN INTERNATIONAL BUILDING PRODUCTS AND MACHINERY EXPO ដែលប្រព្រឹត្តទៅនៅទីក្រុងណាននីង សាធារណរដ្ឋប្រជាមានិតចិន នាថ្ងៃពុធ ទី៣ ខែធ្នូ ឆ្នាំ២០២៥ អ្នកឧកញ៉ា លី ឃុនថៃ ប្រធានសមាគមសហព័ន្ធអ្នកវិនិយោគកម្ពុជា ហៅកាត់ថា CCIA បានផ្សព្វផ្សាយ និងទាក់ទាញអ្នកវិនិយោគិនបរទេស ជាពិសេសវិនិយោគិនចិន និងអាស៊ាន ឲ្យមកសិក្សាឈ្វេងយល់ពីសក្តានុពល និងបរិយាកាសវិនិយោគនៅកម្ពុជា។

ពិព័រណ៍ដ៏ធំខាងលើ បានប្រមូលផ្តុំក្រុមហ៊ុនផលិតផលសំណង់ គ្រឿងចក្រ និងបច្ចេកវិទ្យាជាច្រើនក្រុមហ៊ុនមកពីបណ្ដាប្រទេសនៅតំបន់អាស៊ាន និងបណ្ដាក្រុមហ៊ុនធំៗ នៅក្នុងសាធារណរដ្ឋប្រជាមានិតចិន ដើម្បីដាក់តាំងបង្ហាញផលិតផល និងស្វែងរកកិច្ចសហប្រតិបត្តិការ។

ក្នុងឱកាសនៃការចូលរួមនេះ អ្នកឧកញ៉ា លី ឃុនថៃ បានឆ្លៀតឱកាស ដើម្បីផ្សព្វផ្សាយ និងទាក់ទាញអ្នកវិនិយោគិនបរទេស ជាពិសេសវិនិយោគិនចិន និងអាស៊ាន ឲ្យមកសិក្សាស្វែងយល់ពីសក្តានុពល និងបរិយាកាសវិនិយោគនៅកម្ពុជាផងដែរ។ ការអញ្ជើញចូលរួមរបស់អ្នកឧកញ៉ា គឺដើម្បីលើកកម្ពស់ ឱកាសវិនិយោគរបស់កម្ពុជា ក្នុងវិស័យសំណង់ ហេដ្ឋារចនាសម្ព័ន្ធ និងឧស្សាហកម្មពាក់ព័ន្ធ ដែលកំពុងមានការរីកចម្រើនខ្លាំង។

អ្នកឧកញ៉ាបានគូសបញ្ជាក់អំពីអត្ថប្រយោជន៍នៃការវិនិយោគនៅកម្ពុជា ក្រោមក្របខណ្ឌកិច្ចព្រមព្រៀងពាណិជ្ជកម្មសេរីទ្វេភាគី (កម្ពុជា-ចិន) និងកិច្ចព្រមព្រៀង RCEP ដែលអាចផ្តល់ទីផ្សារដ៏ទូលាយ និងលក្ខខណ្ឌអំណោយផលសម្រាប់អ្នកវិនិយោគ៕