(ភ្នំពេញ)៖ ស្ថានទូតជប៉ុន ​ប្រចាំព្រះរាជាណាចក្រកម្ពុជា នារសៀលថ្ងៃពុធ ទី៣ ខែធ្នូ ឆ្នាំ២០២៥ បានរៀបចំពិធី «ភ្លក្សស្រាសារកេជប៉ុន របស់ខេត្តហ្វិហ្វឹ ឆ្នាំ២០២៥»។ ពិធីនេះធ្វើឡើងក្រោមកិច្ចសហការជាមួយសមាគមសហករណ៍ផលិតស្រាសាកេតាមិជិ នៃខេត្តហ្គិហ្វឹ ប្រទេសជប៉ុន។

ពិធីនេះបានធ្វើឡើងក្រោមវត្តមានលោក អ៊ូអិណូ អាត់ស៊ូស៊ី ឯកអគ្គរាជទូតជប៉ុនប្រចាំកម្ពុជា, លោក សំហេង បូរ៉ា រដ្ឋលេខាធិការក្រសួងពាណិជ្ជកម្ម, លោក ណាកាស៊ីម៉ា ដៃហ្សូ នាយកប្រតិបត្តិនៃសមាគមសហករណ៍ផលិតស្រាសាកេតាមិជិ ខេត្តហ្វិហ្វឹ, លោក ហ៊ុល សីលា អនុរដ្ឋលេខាធិការក្រសួងទេសចរណ៍។

ខេត្តហ្គិហ្វឹស្ថិតនៅចំកណ្តាលនៃប្រទេសជប៉ុន ត្រូវបានគេស្គាល់ជាខេត្តមានប្រពៃណីធ្វើការផលិតស្រាសាកេជាយូរណាស់មកហើយ។ ដោយមានប្រភពទឹកដ៏បរិសុទ្ធ និងសិល្បៈហត្ថកម្មដ៏ប៉ិនប្រសប់ដែលបានបន្សល់ទុកជាច្រើនជំនាន់ ខេត្តនេះបានផលិតនូវស្រាសាកេប្រណិតដ៏សម្បូរបែបដែលទទួលបានការ វាយតម្លៃខ្ពស់ទាំងក្នុង និងក្រៅប្រទេស។

ព្រឹត្តិការណ៍នេះនឹងបង្ហាញពីជម្រើសនៃស្រាសាកេល្អៗពីរោងចក្រល្បីៗនៅក្នុងខេត្តហ្វិហ្វឹ នេះគឺជាឱកាសមួយសម្រាប់អ្នកជំនាញផ្នែកម្ហូបអាហារ ភេសជ្ជៈ និងបដិសណ្ឋារកិច្ចរបស់កម្ពុជា អាចស្វែងយល់ពីភាពស៊ីជម្រៅនៃរសជាតិ ក្លិន និងសិល្បៈដែលកំណត់អត្តសញ្ញាណជប៉ុនពិតប្រាកដ ព្រមទាំងជំរុញការផ្លាស់ប្តូរវប្បធម៌កាន់តែស៊ីជម្រៅរវាងប្រទេសជប៉ុន និងកម្ពុជា៕