(កំពង់ធំ)៖ លោក សាយ គឹមឡម អភិបាលស្រុកស្ទោង ខេត្តកំពង់ធំ បានចែកអំណោយមនុស្សធម៌ជូនដល់គ្រួសារជួបគ្រោះធម្មជាតិ និងងាយរងហានិភ័យនៅក្នុងឃុំបន្ទាយស្ទោង នៅព្រឹកថ្ងៃទី៥ ខែធ្នូ ឆ្នាំ២០២៥នេះ។

លោក សាយ គឹមឡម បានលើកឡើងថា ការបង្កើតគម្រោងគ្រោះធម្មជាតិមូលនិធិឃុំ គឺជាការយកចិត្តទុកដាក់ខ្ពស់បំផុតរបស់សម្ដេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដល់សុខុមាលភាពរបស់ប្រជាពលរដ្ឋ នៅក្នុងមូលដ្ឋាន។

អភិបាលស្រុក បានណែនាំឲ្យអាជ្ញាធរឃុំត្រូវយកចិត្តទុកដាក់ខ្ពស់ក្នុងការរៀបចំ និងផ្ដល់ជូនគ្រួសារជួបគ្រោះធម្មជាតិ ងាយរងហានិភ័យដោយភាពប្រាកដប្រជា ច្បាស់លាស់បំផុតដើម្បីឆ្លើយតបទៅនឹងតម្រូវការ និងស្ថានភាពឱ្យបានត្រូវគោលដៅ មានប្រសិទ្ធភាពនឹងទទួលបាននូវការគាំទ្រពីប្រជាពលរដ្ឋ និងថ្នាក់ដឹកនាំគ្រប់លំដាប់ថ្នាក់។

ជាមួយគ្នានេះ លោកបានស្នើឱ្យអាជ្ញាធរឃុំ ត្រូវពិនិត្យលទ្ធភាពជាក់ស្ដែងបន្ថែមទៀត ក្នុងការធ្វើបច្ចុប្បន្នភាពគ្រួសារក្រីក្រ ដើម្បីឆ្លើយតបនឹងស្ថានភាពក៏ដូចជាសង្គ្រោះគ្រួសារដែលមានបញ្ហាពិតប្រាកដ និងចៀសវាងភាព មិនប្រក្រតីណាមួយកើតឡើងដែលនាំឱ្យខូចប្រយោជន៍ និងបាត់បង់ថវិកាជាតិហើយពុំបានឆ្លើយតបទៅនឹងស្ថានភាពជាក់ស្ដែងប្រជាពលរដ្ឋថែមទៀត។

លើសពីនេះលោក សាយ គឹមឡម បានលើកទឹកចិត្តអាជ្ញាធរឃុំបន្ទាយស្ទោង ត្រូវធ្វើការបើកផ្លូវ និងប្រព័ន្ធធារាសាស្ត្រស្រោចស្រពបន្ថែមឱ្យបានធំទូលាយដើម្បីគុណភាពសំណង់ និងបញ្ជៀសគ្រោះថ្នាក់ចរាចរណ៍ ជាយថាហេតុក៏ដូចជារក្សាសុវត្ថិភាពនៅលើដងផ្លូវ និងងាយស្រួលឱ្យកសិករ ក៏ដូចជាបញ្ជៀសគ្រោះទឹកជំនន់ជាយថាហេតុបានប្រកបដោយប្រសិទ្ធភាព។

លោក សាយ គឹមឡេម បានថ្លែងអំណរគុណយ៉ាងជ្រាលជ្រៅបំផុតដល់លោក ថោ ជេដ្ឋា ប្រធានក្រុមការងារចុះមូលដ្ឋានស្រុកស្ទោង និងសហការី ដែលតែងតែគិតគូរយកចិត្តទុកដាក់ខ្ពស់ក្នុងការកសាងនូវហេដ្ឋារចនាសម្ព័ន្ធ និងប្រព័ន្ធធារាសាស្ត្រ ផ្លូវគមនាគមន៍ខ្វាត់ខ្វែងក្នុងមូលដ្ឋានដែលបានរួមចំណែកយ៉ាងធំធេងក្នុងការអភិវឌ្ឍស្រុកស្ទោង ក៏ដូចជាបញ្ជៀសគ្រោះទឹកជំនន់ និងស្រោចស្របស្រែស្រូវបានយ៉ាងមានប្រសិទ្ធភាពបំផុត។

សូមបញ្ជាក់ថា គ្រួសារដែលជួបគ្រោះធម្មជាតិនៅក្នុងឱកាសនេះមានចំនួន ៨១គ្រួសារ ហើយក្នុងមួយគ្រួសារៗ ទទួលបាននូវអង្ករ ១បេ មី១កេស ត្រីខ ១យួរ ទឹកត្រី ១យួរ និងទឹកស៊ីវ ១យួរផងដែរ៕