(ព្រះវិហារ)៖ លោក គីម រិទ្ធី អភិបាលខេត្តព្រះវិហារ នៅថ្ងៃទី៤ ខែធ្នូ ឆ្នាំ២០២៥ បានដឹកនាំប្រតិភូ ទៅចូលរួមក្នុងពិធីបុណ្យ កាហ្វេ តែ និងផលិតផលកសិកម្ម ដើម្បីអបអរសាទរខួបលើកទី៥០ឆ្នាំ ពិធីបុណ្យជាតិ នៅទីក្រុងប៉ាកសង ខេត្តចម្ប៉ាសាក់ នៃសាធារណរដ្ឋប្រជាធិបតេយ្យប្រជាមានិតឡាវ។

ដំណើរទស្សនកិច្ចដែលដឹកនាំដោយលោក គីម រិទ្ធី អភិបាលខេត្តព្រះវិហារនាពេលនេះ គឺដើម្បីពង្រឹងចំណងសាមគ្គីភាព និងកិច្ចសហប្រតិបត្តិការដ៏ល្អ រវាងខេត្តព្រះវិហារ (កម្ពុជា) និងខេត្តចម្ប៉ាសាក់ (ឡាវ) ដែលជាខេត្តជាប់ព្រំដែន និងមានទំនាក់ទំនងប្រវត្តិសាស្ត្រជាយូរលង់មកហើយ។

ពិសេសដំណើរទស្សនកិច្ចនេះ ក៏ចង់ស្វែងយល់ពីសក្តានុពលនៃវិស័យកសិកម្ម ជាពិសេសដំណាំកាហ្វេ និងតែ របស់តំបន់ភ្នំបូឡាវិន (Boleaven Plateau) ដែលមានទីតាំងនៅជិតក្រុងប៉ាកសង នៃខេត្តចម្ប៉ាសាក់ ព្រមទាំងបានផ្លាស់ប្តូរបទពិសោធន៍ និងជំរុញកិច្ចសហប្រតិបត្តិការលើវិស័យពាណិជ្ជកម្ម ទេសចរណ៍ និងវប្បធម៌ ដើម្បីលើកកម្ពស់ជីវភាពប្រជាជននៃខេត្តទាំងពីរ។

សូមបញ្ជាក់ថា ដំណើរទស្សនកិច្ចនេះបានលើកកម្ពស់ ទំនាក់ទំនងជាអ្នកជិតខាងល្អ ជាមួយបណ្តាខេត្តជាប់ព្រំដែននៃប្រទេសឡាវ ស្របតាមគោលនយោបាយកិច្ចសហប្រតិបត្តិការអន្តរជាតិរបស់រាជរដ្ឋាភិបាលកម្ពុជា៕