(ភ្នំពេញ)៖ នាយកដ្ឋានអប់រំកុមារតូច នៃក្រសួងអប់រំ យុវជន និងកីឡា នៅរសៀលថ្ងៃទី០៥ ខែធ្នូ ឆ្នាំ២០២៥នេះ បានប្រកាសបិទវគ្គបណ្ដុះបណ្ដាល ស្ដីពី ការអប់រំបរិស្ថាន សម្រាប់សាលាមត្ដេយ្យសិក្សា ទូទំាងប្រទេសកម្ពុជា ក្រោមវត្ដមាន លោក ប្រាក់ កុសល ប្រធាននាយកដ្ឋានអប់រំកុមារតូច។

វគ្គបណ្ដុះបណ្ដាលនេះ បានធ្វើឡើងរយៈពេល៥ថ្ងៃ ពោលចាប់ពីថ្ងៃទី០១ ដល់ទី០៥ ខែធ្នូ ឆ្នាំ២០២៥ នៅសាលាមធ្យមសិក្សា គរុកោសល្យមត្ដេយ្យមជ្ឈឹម រាជធានីភ្នំពេញ ក្រោមជំនួយឥតសំណង របស់ក្រសួងការបរទេសជប៉ុន។

លោក ប្រាក់ កុសល បានឲ្យដឹងថា វគ្គបណ្តុះបណ្តាល រយៈពេល៥ថ្ងៃ ស្ដីពី ការអប់រំបរិស្ថាន សម្រាប់គ្រូមត្តេយសិក្សា នៅទូទំាងប្រទេសកម្ពុជា ពាក់ព័ន្ធនឹងការអប់រំបរិស្ថាន ត្រូវបានបញ្ចប់ហើយ។

លោកសង្ឃឹមថា លោកគ្រូ-អ្នកគ្រូ មត្តេយ្យសិក្សាទំាងអស់ នឹងយកចំណេះដឹង ដែលបានពីវគ្គបណ្តុះបណ្តាល ទៅអប់រំកុមារឱ្យចេះស្រឡាញ់បរិស្ថាន ឱ្យសហគមន៍ ចេះថែរក្សាអនាម័យបរិស្ថាន ឱ្យបានល្អស្អាត។

ជាមួយគ្នានេះ លោក ប្រាក់ កុសល បានលើកឡើងថា បរិស្ថាន ពិតជាបានទាក់ទងនឹងជីវភាពរស់នៅរបស់មនុស្ស ហើយបើកុមារចេះស្រឡាញ់បរិស្ថាន ពីកុមារភាពឡើងទៅ នោះនឹងធ្វើឱ្យបរិស្ថានធម្មជាតិ កាន់តែរីកស្រស់បំព្រង ហើយបរិស្ថាននឹងជួយដល់ជីវិតមនុស្ស សត្វ រួមនឹងជីវៈមានជីវិតទំាងអស់ នៅលើភពផែនដីផងដែរ។

លោក ប្រាក់ កុសល ក៏បានថ្លែងអំណរគុណផងដែរ ដល់ដៃគូជប៉ុន ដែលបានជួយក្នុងវគ្គបណ្តុះបណ្តាលនេះ ហើយលោកសង្ឃឹមថា ភាគីជប៉ុន នឹងបន្តជួយសម្រាប់ វគ្គបណ្តុះបណ្តាលក្រោយៗទៀត។

លោកគ្រូ-អ្នកគ្រូមត្តេយ្យសិក្សា ដែលចូលរួមវគ្គបណ្ដុះបណ្ដាលនេះ បានឲ្យដឹងថា វគ្គបណ្តាលបណ្តាលនេះ ពិតជាសំខាន់ ហើយពួកគាត់ នឹងប្តេជ្ញាបអប់រំកុមារ និងសហគមន៍ ឱ្យស្រឡាញ់បរិស្ថាន ព្រោះបរិស្ថាន ពិតជាបានផ្សារភ្ជាប់ នឹងទំនាក់ទំនងជីវិតរស់នៅរបស់មនុស្សយ៉ាងពិតប្រាកដ។

លោកគ្រូ-អ្នកគ្រូបន្ដថា បើកុមារចេះស្រឡាញ់បរិស្ថាន ពីកុមារភាពឡើងទៅ នឹងធ្វើឱ្យបរិស្ថាន កាន់តែល្អស្អាត សម្រាប់ជីវិតរស់នៅសម្រាប់ថ្ងៃអនាគត ក្នុងនោះ លោកគ្រូ-អ្នកគ្រូ ក៏ស្នើឱ្យមនុស្សធំ ត្រូវធ្វើជាគំរូសម្រាប់កុមារផងដែរ ពាក់ព័ន្ធនឹងក្តីស្រឡាញ់បរិស្ថានធម្មជាតិ៕