(កំពង់ធំ)៖ លោក ហាក់ ម៉ុងហួត អភិបាលស្រុកតាំងគោក ក្នុងរយៈពេល ៣ថ្ងៃ គិតចាប់ពីថ្ងៃទី០៣ ដល់ថ្ងៃទី០៥ ខែធ្នូ ឆ្នាំ២០២៥ បាននាំយកចង្ក្រានសន្សំសំចៃថាមពល ដែលជាអំណោយរបស់សមាគមនារីកម្ពុជា ដើម្បីសន្តិភាពនិងអភិវឌ្ឍន៍ចំនួន ៣ ១០១ចង្ក្រាន ចុះចែកជូនប្រជាពលរដ្ឋក្នុងមូលដ្ឋាន ឃុំសូយោង, ឃុំជ្រលង, ឃុំច្រនាង, ឃុំស្វាយភ្លើង, ឃុំអណ្តូងពោធិ៍ និងឃុំទ្រៀល ក្នុងស្រុកតាំងគោក ខេត្តកំពង់ធំ។

នៅក្នុងឱកាសចុះចែកចង្ក្រានសន្សំសំចៃថាមពលនេះដែរ លោក ហាក់ ម៉ុងហួត ក៏បាននាំនូវការផ្តាំផ្ញើសាកសួរសុខ​ទុក្ខ​ពីសំណាក់​សម្តេច​មហាបវរធិបតី ហ៊ុន ម៉ាណែត នាយក​រដ្ឋមន្ត្រី​នៃ​កម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ស្ត្រីទី១របស់កម្ពុជា ក៏ដូចជាលោកបណ្ឌិត ថោង ខុន ទេសរដ្ឋមន្រ្តី លោក នួន ផារ័ត្ន អភិបាលខេត្តកំពង់ធំ, ជាពិសេសសម្តេចកិត្តិសង្គហបណ្ឌិត ម៉ែន សំអន ប្រធានសមាគមនារីកម្ពុជាដើម្បីសន្តិភាព និងអភិវឌ្ឍន៍ ដែលបានផ្តល់ចង្ក្រាននេះជូនដល់ប្រជាពលរដ្ឋគ្រប់ៗគ្នា និងបានបញ្ជាក់ថា លោកទាំងទ្វេតែងតែបានផ្តាំផ្ញើឱ្យយកចិត្តទុកដាក់ឱ្យបានខ្ពស់ដល់ប្រជាពលរដ្ឋនៅក្នុងមូលដ្ឋាន។

បន្ថែមពីនេះទៀតលោក ហាក់ ម៉ុងហួត ក៏បានផ្តាំផ្ញើដល់ប្រជាពល​រដ្ឋ ​ត្រូវចេះថែ​រក្សាសុខភាពឱ្យបានជាប់ជាប្រចាំខណៈដែលរដូវរំហើយបានចូលមកដល់ ជាពិសេស​នោះគ្រួសារដែលមានសមាជិកចាស់ៗ សូម​មាន​ការ​ប្រុង​ប្រយ័ត្ន​ឲ្យ​បាន​ខ្ពស់ចំពោះ​សុខភាព ដោយ​ការ​ត្រៀម​សម្លៀក​បំពាក់ក្រាស់ៗ ភួយ​ជាដើម។

ជាមួយគ្នានោះខណៈដែលរដូវរំហើយបានចូលមកដល់នេះ លោក ហាក់ ម៉ុងហួត ក៏បានលើកទឹកចិត្តឱ្យប្រជាពលរដ្ឋ ចូលរួមប្រុងប្រយ័ត្នអំពីការប្រើប្រាស់ចង្គ្រានអុសភ្លើង និងភ្នក់ភ្លើងផ្សេងៗ ត្រូវប្រុងប្រយ័ត្នដោយពន្លត់ឱ្យបានអស់ កុំឱ្យសល់មានរងើកភ្លើង ជៀសវាងបង្ករជាភ្លើងឆេះរីករាលដាលដល់ផ្ទះសំបែង និងបង្ករការខូចខាតដល់ព្រទ្យសម្បត្តិផ្សេងៗ ជាយថាហេតុ។

ជុំវិញចង្ក្រានសន្សំសំចៃថាមពលនេះដែរ លោក ហាក់ ម៉ុងហួត បានប្រាប់ប្រជាពលរដ្ឋដែរថា ចង្ក្រាននេះជាអំណោយដ៏ថ្លៃថ្លារបស់សម្តេចកិត្តិសង្គហបណ្ឌិត ម៉ែន សំអន ប្រធានសមាគមនារីកម្ពុជាដើម្បីសន្តិភាព និងអភិវឌ្ឍន៍ ដែលបានផ្តល់ជូនរដ្ឋបាលស្រុកតាំងគោក សម្រាប់ចែកជូនប្រជាពលរដ្ឋនៅក្នុងមូលដ្ឋាន។ តាំងនាមប្រជាពលរដ្ឋក្នុងស្រុកតាំងគោក លោកក៏បានថ្លែងអរគុណជូនចំពោះសម្តេចកិត្តិសង្គហបណ្ឌិត ម៉ែន សំអន ដែលបានផ្តល់អំណោយចង្ក្រាននេះសម្រាប់ឱ្យប្រជាពលរដ្ឋប្រើប្រាស់ ដើម្បីរួមចំណែកលើកកម្ពស់ជីវភាពពលរដ្ឋបានមួយកម្រិតថែមទៀត។

លោក ហាក់ ម៉ុងហួត បានបន្ថែមថា ការចូលរួមចែកជូនចង្រ្កានសន្សំសំចៃថាមពលឱ្យប្រជាពលរដ្ឋបានប្រើប្រាស់នាពេលនេះ ដេីម្បីចូលរួមចំណែកគាំទ្រការការពារបរិស្ថាន ព្រមទាំងកាត់បន្ថយការប្រែប្រួលអាកាសធាតុនៅកម្ពុជា ក៏ដូចជាលើកកម្ពស់ជីវភាពរស់នៅ និងសុខភាពរបស់ប្រជាពលរដ្ឋនៅសហគមន៍ ក្នុងការជួយកាត់បន្ថយថ្លៃចំណាយលើការប្រើប្រាស់អុស និងជួយបរិស្ថាន និងបង្កភាពងាយស្រួល សម្រាប់ប្រជាពលរដ្ឋក្នុងការប្រើប្រាស់ប្រចាំថ្ងៃផងដែរ។

លោក ហាក់ ម៉ុងហួត ក៏បានផ្តាំផ្ញើដល់ប្រជាពលរដ្ឋទាំងអស់សូមយកចង្ក្រានសន្សំសំចៃថាមពលទៅប្រើប្រាស់ឱ្យបានត្រឹមត្រូវតាមការណែនាំរបស់ក្រុមហ៊ុន ហើយត្រូវបន្តថែរក្សាសុខភាព អនាម័យ ដោយរស់នៅស្អាត ហូបស្អាត ផឹកស្អាតក្នុងរដូវរំហើយនេះ ដើម្បីចៀសឆ្ងាយពីជំងឺឆ្លងផ្សេងៗ ហើយត្រូវជួយអប់រំកូនចៅ ឲ្យចូលរួមគោរពច្បាប់ចរាចរណ៍ រាល់ការបើកបរម៉ូតូ ត្រូវពាក់មួយសុវត្ថិភាពទាំងអ្នកបើកបរ និងអ្នករួមដំណើរ ព្រមទាំងណែនាំកូនចៅបងប្អូនឱ្យជៀសឲ្យឆ្ងាយពីគ្រឿងញៀនពិសេសត្រូវជំរុញកូនចៅឱ្យរៀនសូត្របានគ្រប់គ្នាបានខ្ពង់ខ្ពស់ដែលជាការរួមចំណែកក្នុងការកសាងមូលធនមនុស្ស និងជំនាញបច្ចេកទេស ក្នុងការអភិវឌ្ឍប្រទេសជាតិ៕