ជនសង្ស័យ៤នាក់ ត្រូវកម្លាំងកងរាជអាវុធហត្ថខេត្តកំពង់ស្ពឺ ឃាត់ខ្លួនបញ្ជូនទៅតុលាការ ជាប់ពាក់ព័ន្ធករណី គ្រឿងញៀន
07-12-2025 11:06
(កំពង់ស្ពឺ)៖ កម្លាំងជំនាញកងរាជអាវុធហត្ថខេត្តកំពង់ស្ពឺ បានសម្រេចកសាងសំណុំរឿងបញ្ជូនសង្ស័យ ប្រុស-ស្រី ៤នាក់ ទៅសាលាដំបូងខេត្តកំពង់ស្ពឺ ដើម្បីចាត់ការតាមនីតិវិធី ក្រោយឃាត់ខ្លួនបាន កាលពីថ្ងៃទី០១ ខែធ្នូ ឆ្នាំ២០២៥កន្លងមកនេះ នៅចំណុចភូមិចិនដាំម្លូរ សង្កាត់វាំងចាស់ ក្រុងឧដុង្គម៉ែជ័យ ខេត្ដកំពង់ស្ពឺ ជាប់ពាក់ព័ន្ធករណី គ្រឿងញៀន។
កម្លាំងកងរាជអាវុធហត្ថខេត្តកំពង់ស្ពឺ បានបញ្ជាក់ឱ្យដឹង នៅថ្ងៃទី០៧ ខែធ្នូ ឆ្នាំ២០២៥នេះថា ក្រោមការដឹកនាំបញ្ជាដោយផ្ទាល់របស់លោកឧត្តមសេនីយ៍ត្រី ម៉េង ស្រ៊ុន មេបញ្ជាការ កងរាជអាវុធហត្ថខេត្តកំពង់ស្ពឺ និងមានការសម្របសម្រួលនីតិវិធីពី លោក សាយ វាសនា ព្រះរាជអាជ្ញារង អមសាលាដំបូងខេត្តកំពង់ស្ពឺ កាលពីថ្ងៃទី០១ ខែធ្នូ ឆ្នាំ២០២៥កន្លងមកនេះ កម្លាំងអង្គភាពនគរបាលយុត្តិធម៌ នៃបញ្ជាការដ្ឋានកងរាជអាវុធហត្ថខេត្តកំពង់ស្ពឺ ដឹកនាំដោយលោកអនុសេនីយ៍ទោ អ៊ុង សុភាព សហការជាមួយកម្លាំងមូលដ្ឋានកងរាជអាវុធហត្ថក្រុងឧដុង្គម៉ែជ័យ ដឹកនាំដោយលោកវរសេនីយ៍ត្រី សេង រ៉ាម៉ូវ មេបញ្ជាការ មូលដ្ឋានកងរាជអាវុធហត្ថក្រុងឧដុង្គម៉ែជ័យ និងកម្លាំងមូលដ្ឋានកងរាជអាវុធហត្ថស្រុកសំរោងទង ដឹកនាំដោយលោកវរសេនីយ៍ត្រី បេ ចំរើន មេបញ្ជាការ មូលដ្ឋានកងរាជអាវុធហត្ថស្រុកសំរោងទង បានបង្រ្កាបជាក់ស្តែង និងឃាត់ខ្លួនជនសង្ស័យ ចំនួន០៤នាក់ ពាក់ព័ន្ធករណី គ្រឿងញៀន នៅចំណុចភូមិចិនដាំម្លូរ សង្កាត់វាំងចាស់ ក្រុងឧដុង្គម៉ែជ័យ ខេត្ដកំពង់ស្ពឺ ។
ជនសង្ស័យមានទី១ ឈ្មោះ ឡុង លាងហាក់ ភេទប្រុស អាយុ២៦ឆ្នាំ មុខរបរជាងដែក ទីលំនៅបច្ចុប្បន្នភូមិចិនដាំម្លូរ សង្កាត់វាំងចាស់ ក្រុងឧដុង្គម៉ែជ័យ ខេត្ដកំពង់ស្ពឺ ។ ជនសង្ស័យមានទី២ ឈ្មោះ អ៉ិន ថាវី ភេទស្រី អាយុ ២២ឆ្នាំ មុខរបរកម្មការិនីរោងចក្រ រស់នៅភូមិអូរការ៉ុង សង្កាត់វាំងចាស់ ក្រុងឧដុង្គម៉ែជ័យ ខេត្តកំពង់ស្ពឺ ។ ជនសង្ស័យមានទី៣ ឈ្មោះ ចាន់ សុជាតិ ភេទប្រុស អាយុ ៣៤ឆ្នាំ មុខរបរកម្មករលើកបន្លែក្នុងផ្សារ ទីលំនៅបច្ចុនប្បន្ន ភូមិក្រាំពន្លៃ សង្កាត់ វាំងចាស់ ក្រុងឧដុង្គម៉ែជ័យ ខេត្តកំពង់ស្ពឺ ។ ជនសង្ស័យមានទី៤ ឈ្មោះ គង់ សម្បតិ ភេទប្រុស អាយុ៣០ឆ្នាំ មុខរបបើកឡានដឹកបន្លែ ទីលំនៅបច្ចនប្បន្ននៅភូមិសង្វរ ឃុំកំពង់ហ្លួង ស្រុកពញ្ញាឮ ខេត្តកណ្ដាល ។
ចាប់យកវត្ថុតាងបានរួមមាន ម្សៅពណ៌សថ្លាសង្ស័យថាសារធាតុញៀន ចំនួន ១៤កញ្ចប់ ទម្ងន់ ៣៤.៨១ក្រាម, ឧបករណ៍ប្រើប្រាស់គ្រឿងញៀនមួយចំនួន, ម៉ូតូ ចំនួន០១គ្រឿង, ទូរស័ព្ទ ចំនួន០៥គ្រឿង, ខ្សែក (លោហ:ធាតុពណ៌ស) ចំនួន ០១ខ្សែ, កាបូបដៃ ចំនួន០២ ។
បច្ចុប្បន្នជនសង្ស័យខាងលើ រួមនឹងវត្ថុតាងត្រូវបានកម្លាំងជំនាញកងរាជអាវុធហត្ថខេត្តកំពង់ស្ពឺ កសាងសំណុំរឿងបញ្ជូនទៅសាលាដំបូងខេត្តកំពង់ស្ពឺ ដើម្បីចាត់ការតាមនីតិវិធី៕
