(ភ្នំពេញ)៖ ជាមួយនឹងវិធាននៃការប្រើប្រាស់ទិន្នន័យ វិធាននៃការរក្សាទិន្នន័យ វិធាននៃការដែលធ្វើឲ្យទិន្នន័យទំនាក់ទំនងគ្នា ដើម្បីជាផលប្រយោជន៍សេដ្ឋកិច្ចជាតិ លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានថ្លែងបញ្ជាក់ថា បើទិន្នន័យនៅដាច់ៗដោយឡែកពីគ្នា ទិន្នន័យនោះជាទិន្នន័យស្អុយ តែបើទិន្នន័យអាចឆ្លងឆ្លើយគ្នា អាចប្រើប្រាស់នៅក្នុងប្រព័ន្ធមួយរួមបាន ទិន្នន័យនោះក្លាយទៅជាទិន្នន័យមាស។

លោក ជា វ៉ាន់ដេត បានថ្លែងដូចនេះនាថ្ងៃទី០៦ ខែធ្នូ ឆ្នាំ២០២៥ នាឱកាសអញ្ជើញបើកវេទិកាអភិបាលកិច្ចអ៉ីនធឺណិតកម្ពុជា ឆ្នាំ២០២៥ ដែលជាព្រឹត្តិការណ៍អមក្នុងវេទិការដ្ឋាភិបាលឌីជីថល ពិព័រណ៍បច្ចេកវិទ្យាឌីជីថល និងព្រឹត្តិការជាតិ-អន្តរជាតិពាក់ព័ន្ធ។

លោក ជា វ៉ាន់ដេត បានថ្លែងដូចនេះថា «យើងក៏បានគិតគូរអីពីវិធាននៃការប្រើប្រាស់ទិន្នន័យ វិធាននៃការរក្សាទិន្នន័យ វិធាននៃការដែលធ្វើឲ្យទិន្នន័យទំនាក់ទំនងគ្នា ដើម្បីជាផលប្រយោជន៍សេដ្ឋកិច្ច, បើទិន្នន័យនៅដាច់ៗ ដោយឡែកពីគ្នា ទិន្នន័យនោះ ជាទិន្នន័យស្អុយ តែបើទិន្នន័យអាចឆ្លងឆ្លើយគ្នា អាចប្រើប្រាស់នៅក្នុងប្រព័ន្ធមួយរួមបាន ទិន្នន័យនោះក្លាយទៅជាទិន្នន័យមាស»។

លោក ជា វ៉ាន់ដេត បានថ្លែងទៀតថា ក្រសួងប្រៃសណីយ៍ និងទូរគមនាគមន៍ តែងតែអញ្ជើញថ្នាក់ដឹកនាំរបស់ក្រសួងផ្សេងៗមក ដើម្បីជជែកគ្នា ដើម្បីឲ្យមានទស្សនៈរួមគ្នាថា ទិន្នន័យមិនមែនជាកម្មសិទ្ធិរបស់ក្រសួងណាមួយទេ ទិន្នន័យជាកម្មសិទ្ធិរបស់ប្រទេសយើងទាំងមូល ហើយយើងត្រូវប្រើប្រាស់ទិន្នន័យនេះឲ្យចំគោលដៅ ឲ្យបម្រើដល់ផលប្រយោជន៍ជាតិ មិនមែនយកទិន្នន័យទៅលួចទៅលក់ឲ្យអ្នកណាមួយដែលមិនត្រឹមត្រូវនោះទេ៕

សូមស្តាប់ការលើកឡើងរបស់លោក ជា វ៉ាន់ដេត៖