(ភ្នំពេញ)៖ តុលាការខេត្តព្រៃវែង នៅថ្ងៃទី៧ ខែធ្នូ ឆ្នាំ២០២៥ បានចេញដីកាបង្គាប់ឱ្យឃុំខ្លួនមុខសញ្ញាជួញដូរគ្រឿងញៀនម្នាក់ ដាក់ពន្ធធាគារ បន្ទាប់ពីរូបគេត្រូវបានកម្លាំងនគរបាលឃាត់ខ្លួន បញ្ជូនទៅសាលាដំបូងខេត្ត ពាក់ព័ន្ធបទល្មើសប្រើប្រាស់គ្រឿងញៀន ហើយបង្ហោះលើបណ្តាញសង្គម។

ជនត្រូវចោទមានឈ្មោះ មោក ណា ភេទប្រុស អាយុ ២២ឆ្នាំ ជនជាតិខ្មែរ មុខរបរ មិនពិតប្រាកដ រស់នៅភូមិតាអ៊ួក ឃុំរក្សជ័យ ស្រុកបាភ្នំ ខេត្តព្រៃវែង ត្រូវបានចោទប្រកាន់ពីបទ ជួញដូរដោយខុសច្បាប់នូវសារធាតុញៀន។ នេះបើតាមដីកាបង្គាប់ឱ្យឃុំខ្លួន របស់តុលាការខេត្តព្រៃវែង។

សូមជម្រាបថា ក្រោមការសហការរវាងមន្ទីរប្រឆាំងគ្រឿងញៀន និងនាយកដ្ឋានប្រឆាំងបទល្មើសបច្ចេកវិទ្យា បានកំណត់អត្តសញ្ញាណជនសង្ស័យខាងលើ និងផ្តល់ព័ត៌មានជូននគរបាលជំ​នាញនៃស្នងការដ្ឋាននគរបាលខេត្តព្រៃវែង ទើបនៅថ្ងៃទី០៥ ខែធ្នូ ឆ្នាំ២០២៥ វេលាម៉ោង១៤ និង៣០នាទី នៅចំណុចផ្ទះជនសង្ស័យ ស្ថិតនៅភូមិតាអ៊ួក ឃុំរក្សជ័យ ស្រុកបាភ្នំ ខេត្តព្រៃវែង កម្លាំងជំនាញការិយាល័យប្រឆាំងគ្រឿងញៀនខេត្តព្រៃវែង សហការជាមួយកម្លាំងជំនាញអធិការដ្ឋាននគរបាលស្រុកបាភ្នំ បានធ្វើការឃាត់ខ្លួនមុខសញ្ញាជួញដូរគ្រឿងញៀន ១នាក់ ឈ្មោះ មោក ណា ភេទប្រុស អាយុ ២២ឆ្នាំ ជនជាតិ ខ្មែរ មុខរបរ មិនពិតប្រាកដ រស់នៅភូមិតាអ៊ួក ឃុំរក្សជ័យ ស្រុកបាភ្នំ ខេត្តព្រៃវែង ដកហូតបានទូរស័ពដៃចំនួន០១គ្រឿង, ឧបករណ៍ប្រើប្រាស់គ្រឿងញៀនចំនួន០១គ្រឿង, លទ្ធផលធ្វើតេស្ត អវិជ្ជមាន។

ទង្វើបែបនេះ មន្ទីរប្រឆាំងគ្រឿងញៀន សូមអំពាវនាវដល់បងប្អូនប្រជាពលរដ្ឋ ពិសេសយុវជន យុវនារី សូមកុំយកតម្រាប់តាមជនខាងលើនេះ ត្រូវនៅឱ្យឆ្ងាយពីគ្រឿងញៀន កុំចង់សាកជាមួយគ្រឿងញៀន ព្រោះគ្រឿងញៀនបំផ្លាញអ្នក គ្រួសារ និងសង្គមជាតិទាំងមូល។

មន្ទីរប្រឆាំងគ្រឿងញៀន ក៏សូមធ្វើការអំពាវនាវដល់ប្រជាពលរដ្ឋ មេត្តាចូលរួមសហការជាមួយសមត្ថកិច្ច រាយការណ៍ពីទីតាំងសង្ស័យ លួចលាក់ផលិត, រក្សាទុក ជួញដូរ និងប្រើប្រាស់គ្រឿងញៀន អោយបានទាន់ពេលវេលា តាមរយៈលេខ Hotline ៦៧០ (ខលមិនគិតកម្រៃសម្រាប់ប្រព័ន្ធ Cellcard) និង 093 456 888 / 011 24 8888 ដើម្បីសមត្ថកិច្ចធ្វើការបង្ក្រាប៕