យកអាសាគ្នាក្នុងគ្រាអាសន្នព្រោះសត្រូវឈ្លានពាន! ខ្មែរមានកំណើតខ្មែរក្រោម នាំអំណោយជូនជនភៀសសឹកនៅបន្ទាយមានជ័យ (Video inside)
16-12-2025 16:29
(បន្ទាយមានជ័យ)៖ សង្គ្រាមឈ្លានពានដោយកងទ័ពថៃ បានធ្វើឱ្យប្រជាពលរដ្ឋខ្មែរជិតកន្លះលាននាក់ហើយ បានភៀសខ្លួនចេញពីផ្ទះសម្បែងរកកន្លែងសុវត្ថិភាព និងកំពុងស្នាក់តាមទីតាំងដែលអាជ្ញាធរបានរៀបចំ។ ពលរដ្ឋភៀសសឹកជួបការលំបាកច្រើន ជាពិសេសមានតម្រូវការខ្ពស់លើស្បៀងអាហារ។
ស្ថិតក្នុងស្ថានភាពដ៏លំបាករបស់ប្រជាពលរដ្ឋខ្មែរជាជនភៀសសឹកនេះ ប្រជាពលរដ្ឋខ្មែរគ្រប់មជ្ឈដ្ឋានកំពុងធ្វើសកម្មភាពសប្បុរសយ៉ាងផុលផុសបំផុតផ្តល់ស្បៀងអាហារ និងសម្ភារប្រើប្រាស់នានាជូនដល់ជនភៀសសឹក។ ព្រះសង្ឃ និងប្រជាពលរដ្ឋខ្មែរមានកំណើតខ្មែរក្រោម តែងតែរួមសុខរួមទុក្ខជាប់ជានិច្ចជាមួយប្រជាពលរដ្ឋខ្មែរ ហើយធ្វើសកម្មភាពសប្បុរសជាបន្តបន្ទាប់ក្នុងពេលកម្ពុជាជួបការលំបាកព្រោះការឈ្លានរបស់កងទ័ពថៃ។
នៅព្រឹកថ្ងៃទី១៦ ខែធ្នូ ឆ្នាំ២០២៥នេះ គណៈកម្មាធិការសម្របសម្រួលខ្មែរក្រោម ដឹកនាំដោយលោក គីម វ៉ាន់ឆេង ដែលមានសមាគមខ្មែរក្រោមចំនួន៦ជាសមាជិក រួមជាមួយលេខាធិការដ្ឋានអង្គការសមាគមខែ្មរក្រោម ដែលមានសមាគមខ្មែរក្រោមចំនួន៩ ជាមាជិកដឹកនាំដោយ លោក សឺន យឿង រួមជាមួយបងប្អូនខ្មែរមានកំណើតខ្មែរក្រោម និងព្រះសង្ឃខ្មែរមានកំណើតខ្មែរក្រោមចំនួន ១០អង្គ និមន្តមពីវត្តអង្គតាមិញ វត្តសាមគ្គីរង្សី វត្តតាំងក្រសាំងខាងជេីង វត្តបុទុមវត្តី និងវត្តនាគវ័ន្ត បាននាំយកអំណោយមកជូនប្រជាពលរដ្ឋជាជនភៀសសឹកនៅខេត្តបន្ទាយមានជ័យចំនួន១៥០គ្រួសារ។ អំណោយរួមមាន អង្ករមួយតោនកន្លះ មុី ១៥០កេស ទឹកត្រី ១៥០យួរ ទឹកស៊ីអ៉ីវ ១៥០យួរ និងថវិកា ចំនួនមួយលាន និង៥០មុឺនរៀល និងពងមាន់ ១,០០០គ្រាប់។
លោក សាន សាង ទីប្រឹក្សាសម្តេចតេជោ ហ៊ុន សែន ប្រធានព្រឹទ្ធសភាកម្ពុជា ដែលបានចូលរួមសម្របសម្រួលក្នុងពិធីចែកអំណោយនេះ បានថ្លែងថា សកម្មភាពមនុស្សធម៌ចែកស្បៀងអាហារដល់ប្រជាពលរដ្ឋខ្មែរ ក៏ដូចជាយោធាក្នុងកំលុងពេលកងទ័ពថៃ ឈ្លានពានកម្ពុជា បានធ្វើចំនួន៩លើកមកហើយ។
លោក សាន សាង បានហៅសកម្មភាពសប្បុរសធម៌នេះ ជាស្មារតីនៃការរួមសុខរួមទុក្ខ ព្រមទាំងរំលែកការលំបាករបស់ព្រះសង្ឃ និងប្រជាពលរដ្ឋខ្មែរមានកំណើតខ្មែរក្រោមជាមួយប្រជាពលរដ្ឋខ្មែរ។ លោក សាន សាង បានហៅសកម្មភាពនេះ ជាស្មារតីរួបរួមជាធ្លុងរវាងខ្មែរ និងខ្មែរគ្រប់ទីកន្លែងស្របតាមឆន្ទៈរបស់សម្តេចតេជោ ហ៊ុន សែន។
លោក ឡាត វណ្ណារិទ្ធ មេឃុំបន្ទាយនាង ដែលមានឈាមជ័រជាខ្មែរក្រោមដែរនោះ បានវាយតម្លៃខ្ពស់ចំពោះទឹកចិត្តរបស់ព្រះសង្ឃ និងពលរដ្ឋខ្មែរមានកំណើតខ្មែរក្រោមក្នុងសកម្មភាពរំលែកនូវទុក្ខលំបាករបស់ប្រជាពលរដ្ឋខ្មែរក្នុងគ្រាលំបាក។ លោកមេឃុំ ចាត់ទុកសកម្មភាពសប្បុរសនេះ ជាកាយវិការមួយដ៏វិសេសវិសាល៕
