(បាងកក)៖ ការបារម្ភភ័យខ្លាចកំពុងកើនឡើងនៅក្នុងចំណោមចង្កោមអ្នកនាំចេញ និងអ្នកវិនិយោគនៅក្នុងប្រទេសថៃ​ ខណៈភាពមិនច្បាស់លាស់កាន់តែស៊ីជម្រៅក្នុងទំនាក់ទំនងជាមួយទីក្រុងវ៉ាស៊ីនតោន ជាពិសេសគឺការបារម្ភថាប្រធានាធិបតីអាមេរិក លោក ដូណាល់ ត្រាំ អាចនឹងលុបចោលកិច្ចចរចាពាណិជ្ជកម្ម ព្រមទាំងដំឡើងពន្ធគយខ្ពស់កប់ពពកលើថៃ ជុំវិញជម្លោះព្រំដែនជាមួយកម្ពុជា។ នេះបើតាមការចេញផ្សាយដោយសារព័ត៌មាន Thai Examiner។

កាលពីថ្ងៃទី១២ ខែធ្នូ ឆ្នាំ២០២៥ លោក ត្រាំ បានបើកកិច្ចពិភាក្សាតាមទូរស័ព្ទជាមួយនាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត និងនាយករដ្ឋមន្ត្រីថៃ​ លោក អានុទីន។ ក្រោយជំនួបនេះលោក ត្រាំ បានប្រកាសថា ភាគីជម្លោះទាំង២ បានយល់ព្រមបញ្ឈប់ការប្រយុទ្ធគ្នា ដោយវិលត្រឡប់ទៅរកបទឈប់បាញ់វិញ។ ក្រោយមកទៀត នាយករដ្ឋមន្ត្រីម៉ាឡេស៊ី លោក អាន់វ៉ា អ៉ីប្រាហ៉ីម ក៏បានជំរុញឱ្យមានបទឈប់បាញ់ផងដែរ តែលោក អានុទីន បានច្រានចោលបទឈប់បាញ់ ខណៈសម្ដេចធិបតីស្វាគមន៍សំណើរបស់លោក អាន់វ៉ា ។

លោក ត្រាំ នៅក្នុងបទសម្ភាសន៍ផ្ដាច់មុខជាមួយ Wall Street Journal បាននិយាយថា លោកបានគំរាមដំឡើងពន្ធលើកម្ពុជា និងថៃ ក្នុងជំនួបតាមទូរស័ព្ទជាមួយមេដឹកនាំនៃប្រទេសទាំង២ ប្រសិនបើមិនមានបទឈប់បាញ់ទេនោះ។ រហូតដល់នៅថ្ងៃអង្គារ ទី១៦ ខែធ្នូ រដ្ឋមន្ត្រីពាណិជ្ជកម្មថៃ លោកស្រី Suphajee Suthamphan បានទទួលស្គាល់ថា កិច្ចចរចាពាណិជ្ជកម្មជាមួយ សហរដ្ឋអាមេរិកមិនមានភាពរីកចម្រើននោះទេ ជាមួយការបញ្ជាក់ថាសហរដ្ឋអាមេរិកបានកែប្រែលក្ខខណ្ឌរបស់ខ្លួនឡើយ៕