(ព្រះវិហារ)៖ លោកស្រី សុខា គងពិសី គីម រិទ្ធី ភរិយាលោក គីម រិទ្ធី អភិបាលខេត្តព្រះវិហារ នៅថ្ងៃទី១៧ ខែធ្នូ ឆ្នាំ២០២៥ បានដឹកនាំក្រុមការងារ អញ្ជើញចុះសួរសុខទុក្ខ និងនាំយកអំណោយចែកជូនដល់កុមារ និងទារកភៀសសឹក ដែលកំពុងស្នាក់នៅបណ្ដោះអាសន្ន ក្នុងមណ្ឌលសុវត្ថិភាពវត្តពើងអង្កាម ហៅវត្តបាក់កាំ ស្ថិតក្នុងភូមិបាក់កាំ ឃុំឈានមុខ ស្រុកត្បែងមានជ័យ ខេត្តព្រះវិហារ។

អំណោយដែលបាននាំយកទៅចែកជូនក្នុងឱកាសនេះ រួមមាន សម្ភារៈប្រើប្រាស់ចាំបាច់ប្រចាំថ្ងៃមាន៖ នំ ខោទឹកនោម ម្សៅទឹកដោះគោ ដបទឹកដោះគោ កន្សែងសើម ទឹកសុទ្ធ មុង ខ្នើយ ភួយទារក ទឹកដោះគោ និងធុងទឹក សម្រាប់កុមារ និងទារក ដើម្បីជួយសម្រាលការលំបាក និងលើកកម្ពស់សុខុមាលភាពរបស់ពួកគេ ក្នុងអំឡុងពេលស្នាក់នៅបណ្ដោះអាសន្ន។

ក្នុងឱកាសជួបសំណេះសំណាលនោះលោកស្រី សុខា គងពិសី គីមរិទ្ធី បានសម្តែងនូវការអាណិតអាសូរចំពោះកុមារ និងទារកភៀសសឹក ព្រមទាំងលើកទឹកចិត្តឲ្យអាជ្ញាធរ និងអ្នកពាក់ព័ន្ធ បន្តខិតខំថែទាំ និងផ្តល់ការគាំទ្រយ៉ាងពេញទំហឹង ដើម្បីធានាសុវត្ថិភាព សុខភាព និងជីវភាពរស់នៅរបស់ពួកគេឲ្យបានល្អប្រសើរជានិច្ច។

សកម្មភាពមនុស្សធម៌នេះ បានបង្ហាញពីការយកចិត្តទុកដាក់ខ្ពស់របស់ថ្នាក់ដឹកនាំខេត្តព្រះវិហារ ចំពោះសុខទុក្ខប្រជាពលរដ្ឋ ជាពិសេសកុមារ និងទារក ដែលជាកម្លាំងស្នូលសម្រាប់អនាគតរបស់សង្គមជាតិ៕