(កំពង់ឆ្នាំង)៖ ប្រជាពលរដ្ឋ មន្ត្រីរាជការ កងកម្លាំងប្រដាប់អាវុធ និងអាជ្ញាធររួមទាំងព្រះសង្ឃ ក្នុងខេត្តកំពង់ឆ្នាំងជាច្រើនអង្គ/អ្នក នៅព្រឹកថ្ងៃទី១៧ ខែធ្នូ ឆ្នាំ២០២៥នេះ បានឈរតម្រង់ជួរនៅតាមដងផ្លូវ រង់ចាំទទួល និងអមដំណើរសពវីរយុទ្ធជនដែលបានពលីនៅសមរភូមិមុខក្នុងបុព្វហេតុការពារមរណភាពទឹកដី ដែលត្រូវដឹកយកមកធ្វើបុណ្យទៅតាមប្រពៃណីនៅស្រុកកំណើត ស្ថិតក្នុងភូមិត្របែក ឃុំត្រង៉ិល ស្រុកកំពង់លែង ខេត្តកំពង់ឆ្នាំង ប្រកបដោយអារម្មណ៍ក្តុកក្តួលយ៉ាងក្រៃលែង ដោយសារតែការអាណិត អាសូរ និងការស្ងប់ស្ងែងនូវវីរភាពក្នុងការលះបង់យ៉ាងធំធេងចំពោះជាតិមាតុភូមិ។

ការដឹកសពវីរយុទ្ធជន ដើម្បីធ្វើបុណ្យនៅស្រុកកំណើតខាងលើនេះផងដែរ មានការរៀបចំទទួលនិងដឹកជញ្ជូនយ៉ាងត្រឹមត្រូវពីអាជ្ញាធរខេត្តកំពង់ឆ្នាំង។ សពវីរយុទ្ធជន ត្រូវបានដឹកតាមទូកដរ ចេញពីមាត់ទន្លេផ្សារក្រោមឆ្ពោះទៅកាន់ទីរួមស្រុកកំពង់លែង និងត្រូវបានរថយន្តដឹកបន្តទៅកាន់ស្រុកកំណើត ដែលនៅទីនោះអាជ្ញាធរ និងក្រុមគ្រួសារបានរៀបចំទីតាំងសម្រាប់ធ្វើបុណ្យទៅតាមប្រពៃណីរួចជាទុកជាស្រេចផងដែរ។

បើតាមការបញ្ជាក់ពីអាជ្ញាធរមូលដ្ឋាន បានឲ្យដឹងថា សពវីរយុទ្ធជនដែលបានពលីនៅសមរភូមិប្រាសាទតាក្របីខាងលើនេះ មានឈ្មោះ លោកពលបាលឯក ហៃ ហ៉ីម បម្រើជាកងទ័ពនៅក្នុងអង្គភាពកងពលតូចអន្តរាគមន៍លេខ៥ ឈរជើងនៅទិសប្រាសាទតាក្របីខេត្តឧត្តរមានជ័យបានពលី នៅសមរភូមិប្រាសាទតាក្របី នៅថ្ងៃទី១៧ ខែធ្នូ ឆ្នាំ២០២ ៥ មានប្រពន្ធឈ្មោះ ពិន ឆេងអៀង រស់នៅក្នុងភូមិឃុំខាងលើសពត្រូវបានក្រុមគ្រួសារ និងអាជ្ញាធរជាថ្នាក់ដឹកនាំស្រុក-ខេត្ត រួមទាំងប្រជាពលរដ្ឋក្នុងមូលដ្ឋានបានរៀបចំចាត់ចែងធ្វើបុណ្យទៅតាមប្រពៃណីខ្មែរយ៉ាងយកចិត្តទុកដាក់ជាទីបំផុត។

ស្ថិតក្នុងកាលៈទេសៈដ៏ក្រៀមក្រំបំផុតនេះ ក្នុងនាមរដ្ឋបាលខេត្តកំពង់ឆ្នាំង និងក្នុងនាមលោកអភិបាលខេត្តផ្ទាល់ លោកសូមចូលរួមរំលែកនូវមរណ ទុក្ខជាមួយក្រុមគ្រួសារនៃសពទាំងអស់ ចំពោះការបាត់បង់នាយទាហានរងមួយរូប ដែលជាទីគោរពស្រឡាញ់ដ៏ជ្រាលជ្រៅបំផុតប្រកបដោយព្រហ្មវិហារធរ គុណធម៌ មេត្តាធម៌យោគយល់អធ្យាស្រ័យ ដ៏ល្អប្រពៃចំពោះក្រុមគ្រួសារ និងប្រទេសជាតិមាតុភូមិ ហើយក៏ជាការបាត់បង់ដ៏ធំធេងបំផុតនូវវីរកងទ័ពដ៏អង្គអាចក្លាហាន ស្នេហាជាតិដ៏ល្អឆ្នើមមួយរូបហ៊ានពលីជីវិតក្នុងការការពារអធិបតេយ្យភាព ជាតិមាតុភូមិកម្ពុជានៃយើងដែលតទៅយើងទាំងអស់គ្នានឹងចងចាំនៅវីរភាពនេះ ព្រមទាំងគោរពក្នុងចិត្តថា លោកពលបាលឯក ហៃ ហ៊ីម និងវីរកងទ័ព ដែលបានពលីជីវិតនៅក្នុងសមរភូមិទាំងអស់របស់យើង ដែលបានលះបង់អាយុជីវិតក្នុងការការពារមរណភាពទឹកដី គឺជាវីរកងទ័ពស្នេហាជាតិដ៏អង់អាចក្លាហានរបស់ព្រះរាជាណាចក្រកម្ពុជា ជារៀងរហូតតទៅ។

ក្នុងនោះដែរក្នុងនាមប្រជាពលរដ្ឋទូទាំងខេត្តកំពង់ឆ្នាំង និងថ្នាក់ដឹកនាំខេត្តទាំងអស់សូមឧទ្ទិសបួងសួងដល់ដួងវិញ្ញាណក្ខន្ធរបស់លោកពលបាលឯក ហៃ ហ៊ីម និងវីរយុទ្ធ ជនស្នេហាជាតិដទៃទៀត ដែលបានពលីជីវិតក្នុងសមរភូមិសូមបានទៅកាន់សុគតិភពកុំបីឃ្លៀងឃ្លាតឡើយ។

ពិធីបុណ្យសពលោកពលបាលឯក ហៃ ហ៊ីម គឺបានប្រារព្ធធ្វើនៅគេហដ្ឋានរបស់លោក ឯក្នុងស្រុកកំពង់លែង ខេត្តកំពង់ឆ្នាំង ក្នុងនោះលោក កែវ ពិសិដ្ឋ និពន្ធនាយករងអង្គភាពព័ត៌មាន Fresh News និងក្រុមការងាររបស់លោក ក៏បានចូលរួមរំលែកទុក្ខដល់ក្រុមគ្រួសារនៃសព និងបាnចូលរួមក្នុងពិធីបុណ្យសពចំនួន ២០ម៉ឺនរៀលផងដែរ៕