(សៀមរាប)៖ ព្រះវិចិត្រវង្សា ហែម គឹមសាន ញាតិធម្មោ ព្រះគ្រូចៅអធិការវត្តប្រាសាទគោកចក នៅរសៀលថ្ងៃទី១៦ ខែធ្នូ ឆ្នាំ២០២៥នេះ បានទទួលអង្គរ៥តោន រួមជាមួយត្រីខ ចំនួន៥០០កំប៉ុង ពីអង្គការសង្រ្គោះជីវិតប្រទេសសិង្ហបូរី ដែលផ្តល់តាមរយៈពុទ្ធិកសមាគមកម្ពុជរដ្ឋ ដើម្បីធ្វើការផ្គត់ផ្គង់ និងចាត់ចែងធ្វើម្ហូបអាហារជូនបងប្អូនភៀសសឹក ដែលកំពុងតែស្នាក់នៅក្នុងវត្តប្រមាណ ជាង២០០គ្រសារ។

ព្រះវិចិត្រវង្សា ហែម គឹមសាន មានថេរដីការថា វត្តអារាមមិនត្រឹមតែជាទីសក្ការបូជាប៉ុណ្ណោះទេ គឺបានក្លាយជា «ផ្ទះទីពីរ ឬ ទីជម្រកសុវត្ថិភាព» សម្រាប់បងប្អូនជនភៀសសឹក ដែលកំពុងរងទុក្ខវេទនាទាំងផ្លូវកាយនិងផ្លូវចិត្ត។ វត្តអារាម គឺជារបស់យើងទាំងអស់គ្នា ហើយនៅទីនេះ គឺជាទីស្នាក់អាស្រ័យនៃសេចក្តីស្ងប់ ជាទីដែលយើងបានរស់នៅដោយផ្អែកលើធម៌មេត្តា និងធម៌ករុណា របស់ព្រះសង្ឃ។

ព្រះវិចិត្រវង្សា មានថេរដីកាបន្តថា ព្រះពុទ្ធសាសនាបានបង្រៀនយើងថា ជីវិតគឺប្រកបដោយ ទុក្ខ សុខ លាភ និងយស ដែលតែងតែផ្លាស់ប្តូរជានិច្ច មិនឋិតថេរឡើយហើយបងប្អូនទាំងអស់គ្នាបានឆ្លងកាត់នូវទុក្ខលំបាកដ៏ធ្ងន់ធ្ងរនៃការភៀសខ្លួនចេញពីស្រុកកំណើត មកដោយសារតែការភ័យខ្លាចសង្គ្រាម។

ព្រះគ្រូចៅអធិការវត្តប្រាសាទគោកចក ហែម គឹមសាន មានថេរដីកា ថ្លែងអំណរគុណអង្គការសង្រ្គោះជីវិតនៃប្រទេសសិង្ហបុរី ដែលផ្តល់តាមរយ:ពុទ្ធិកសមាគមកម្ពុជរដ្ឋ ដែលបានផ្តលគ្រឿងឧបភោគបរិភោគ ដើម្បីធ្វើការផ្គត់ផ្គង់ដល់ជនភៀសសឹក ដែលមានចិត្តសប្បុរស ក្នុងស្មារតី «ខ្មែរជួយខ្មែរ» ដោយចូលរួមឧបត្ថម្ភគាំទ្រនូវធនធានផ្ទាល់ខ្លួន ដល់បងប្អូនប្រជាពលរដ្ឋយើង ដែលបានជម្លៀសខ្លួនមកកាន់ខេត្តសៀមរាប។

ជាមួយនេះដែរ ព្រះគ្រូចៅអធិការ ក៏សូមអំពាវនាវដល់សប្បុរសជនទាំងអស់ បន្តជួយឧបត្ថម្ភគាំទ្របន្ថែមទៀត ទាំងស្បៀងអាហារ និងសម្ភារប្រើប្រាស់ ព្រមទាំងថវិកា ដើម្បីជួយផ្គត់ផ្គង់បន្តដល់បងប្អូនជនភៀសសឹក ដែលកំពុងស្នាក់នៅក្នុងវត្ត រួមនឹងទីតាំងផ្សេងៗទៀត ក្នុងភូមិសាស្ត្រខេត្តសៀមរាបផងដែរ៕