(សៀមរាប)៖ លោក រ័ត្ន មុនី អគ្គនាយករង នៃអគ្គនាយកដ្ឋានពន្ធដារ តំណាងលោក គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាលទទួលបន្ទុក ជាអគ្គនាយកនៃអគ្គនាយកដ្ឋានពន្ធដារ នាព្រឹកថ្ងៃព្រហស្បតិ៍ ទី១៨ ខែធ្នូ ឆ្នាំ២០២៥នេះ បាននាំយកគ្រឿងឧបភោគបរិភោគចាំបាច់មួយចំនួន ចែកជូនប្រជាពលរដ្ឋភៀសសឹក ក្នុងខេត្តសៀមរាបចំនួន ៨០០គ្រួសារ។

ពិធីនេះមានការអញ្ជើញចូលរួមពីលោក សុខ ថុល អភិបាលរងនៃគណៈអភិបាលខេត្តសៀមរាបតំណាលោក ប្រាក់ សោភ័ណ្ឌ អភិបាលនៃគណៈអភិបាលខេត្តសៀមរាប ព្រមទាំងមានការចូលរួមពីថ្នាក់ដឹកនាំអមដំណើរនៃអគ្គនាយកដ្ឋានពន្ធដារ លោកប្រធានសាខាពន្ធដារខេត្តសៀមរាប ថ្នាក់ដឹកនាំស្រុក និងមន្ត្រីរាជការនៃសាខាពន្ធដារខេត្តសៀមរាប។

អំណោយដែលបានប្រគល់ជូន ក្នុងមួយគ្រួសាររួមមាន៖ អង្ករ១ប៉ាវ (២៥គីឡូក្រាម) មីកន្លះកេស នំ១ប្រអប់ ទឹកត្រី១ដប ទឹកស៊ីអ៊ីវ១ដប សៀងផ្អែម២ដប ប្រេងឆា១ដប និងត្រីខ៣កំប៉ុង។

ចំពោះគ្រួសារកងទ័ព និងស្រ្តីមានផ្ទៃពោះចំនួន ១១០គ្រួសារ ទទួលប្រាក់ឧបត្ថមបន្ថែមចំនួន ១០ម៉ឺនរៀលនិងភួយ១ ក្នុង១គ្រួសារ និងបានរៀបចំគ្រឿងឧបភោគបរិភោគ និងថវិកាមួយចំនួនជូនក្រុមគ្រូបង្រៀន ព្រមទាំងថ្នាំសង្កូវមួយចំនួន ជូនដល់ក្រុមគ្រូពេទ្យផងដែរ៕