(កណ្ដាល)៖ សហគមន៍ខ្មែរឥស្លាមខេត្តកណ្ដាល បានរៃអង្គាសស្បៀងអាហារមួយចំនួនធំដើម្បីបញ្ជូនទៅកាន់កងទ័ព និងបងប្អូនពលរដ្ឋដែលកំពុងរងគ្រោះក្លាយជាជនភៀសសឹកដោយសារសៀមឈ្លានពានទឹកដី ។

លោកម៉ាត់ សាលីម ជំទប់ទី១​ ឃុំស្វាយ​ប្រទាល​ ស្រុកស្អាង បានឲ្យដឹងនៅថ្ងៃទី ២២ ខែធ្នូ ឆ្នាំ ២០២៥នេះថា លោកបានធ្វើការអំពាវនាវ រៃអង្គាសស្បៀងតាំងពីថ្ងៃផ្ទុះសង្រ្គាមថ្ងៃដំបូងមកម្លេះ ហើយមានការឈឺចាប់យ៉ាងខ្លាំងដោយសារយោធាសៀម បានឈ្លានពានមកដែនអធិបតេយ្យជាតិខ្មែរយើង ហើយបង្ករឲ្យមានជនភៀសសឹករាប់សិបមឺននាក់ ។

លោកបន្តថា ដ្បិតថា រៃអង្គាសបានតិចតួចក្ដី តែទាំងនេះជាទឹកចិត្តដ៍ប្រពៃរបស់បងប្អូនពលរដ្ឋខ្មែរឥស្លាមយើងដែលមានជីវភាពលំបាកស្រាប់ប៉ុន្តែសុទ្ធតែជាអ្នកមានបេះដូង អាណិតដល់ជនភៀសសឹក និងអាណិតដល់កងទ័ពដែលកំពុងច្បាំង តតាំងនឹងសត្រូវឈ្លានពាន ។
លោកថា អំណោយទាំងទាំងនេះ បានប្រគល់មកជូនលោក ស៊ូ សេន អីម៉ាំខេត្តកណ្ដាល ដើម្បីចាត់ចែងបន្តទៅកាន់គោលដៅ ។

លោកស៊ូ សេន អីម៉ាំខេត្តកណ្ដាល និងជាសមាជិកក្រុមប្រឹក្សាខេត្ត បានថ្លែងអំណរគុណដល់លោក ម៉ាត់ សាលីម និងក្រុមការងារទាំងអស់ដែលបានខិតខំប្រមូលស្បៀងអាហារទាំងនេះ ដែលនេះសបញ្ជាក់ឲ្យឃើញពីទឹកចិត្តរបស់បងប្អូនខ្មែរឥស្លាមដែលស្រលាញ់ជាតិ អាណិតអាសូរដល់កងទ័ព និងជនភៀសសឹកទាំងអស់ ។

លោកថា លោកបានរៀបចំការរៃអង្គាសជំនួយនេះផងដែរតាំងពីថ្ងៃបំដូងមកម្លេះ ហើយបានបញ្ជូនស្បៀងទៅជួយជាបន្តបន្ទាប់រហូតមក ។ លោកក៍សូមបន្តអំពាវនាវដល់បងប្អូនប្រជាពលរដ្ឋទាំងអស់ មេត្តាបន្តជួយផ្ដល់ជំនួយបន្ថែមទៀត ទោះតិចតួចក្ដី ដើម្បីជួយដល់កងទ័ពសមរភូមិមុខ និងជួយដល់ជនភៀសសឹកយើងដែលកំពុងរងគ្រោះដោយសារចោរសៀមឈ្លានពាន។

សូមជម្រាបថា អំណោយ​ទាំង​អស់​របសយក្រុមការងារលិកម៉ាត់ សាលីម រួម​មាន​៖ អង្ករ​ ៣៥ បាវ ទឹក​សុទ្ធ​ ៥២៦ យួរ មី​ ៤៨កេស ទឹក​ស៊ីអ៊ីវ​ ទឹក​ត្រី​៤០យួរ មុង​ ២០ ភួយ​ ១០ កន្ទេល​ ៥ សំលៀកបំពាក់​ ២បាវធំ ឆៃប៉ូវ​ ៣០ គីឡូ​ ផ្អក​ ប្រហុក​ ១០ គីឡូ​ រួមទាំង​ នំកញ្ចប់​ ,ម៉ាស់​ ,​កាហ្វេ​ ,ទឹកដោះ​គោ​ ,​គ្រឿង​ទេស​ និង​សំភារៈ​ប្រេី​ប្រាស់​ជាច្រើន​ទៀត​៕