(ភ្នំពេញ)៖ លោកស្រី ​យូ បូរី អនុប្រធានសមាគមសហគ្រិនស្រ្តីកម្ពុជា ​បានបង្ហាញសុទិដ្ឋនិយមចំពោះសន្ទុះនៃការផលិត​របស់ក្រុមសហគ្រិនស្រ្តីនៅកម្ពុជា ដោយបានបង្កើនទាំង​បរិមាណផលិតផល​ បន្តកែច្នៃផលិតផលថ្មីៗឱ្យកាន់តែមានភាពចម្រុះ និងបច្ចេកវិទ្យាក្នុងការផលិតឱ្យកាន់តែប្រសើរជាងមុន។​

លោកស្រីបានឱ្យដឹងថា សន្ទុះនៃការផលិតកើនឡើងនេះ ដោយសារការកាត់បន្ថយការនាំចូលទំនិញពីក្រៅប្រទេស និងទទួលបានការលើកទឹកចិត្តពីការអ្នកប្រើប្រាស់ ដែលនាំឱ្យអ្នកផលិតផលក្នុងស្រុកមានឱកាសក្នុ ងការបង្កើនការផលិត បន្តការកែច្នៃអភិវឌ្ឍន៍ផលិតផលថ្មី និងពង្រឹងគុណភាពផលិត ឱ្យកាន់តែប្រសើរឡើង។​ ដូច្នេះហើយ លោកស្រីអំពាវនាវដល់ប្រជាពលរដ្ឋទាំងអស់ សូមបង្កើនការប្រើប្រាស់ផលិតផលក្នុងស្រុកឱ្យច្រើនជាអតិបរមា ជាពិសេ​សក្នុងបរិបថនាពេលបច្ចុប្បន្ននេះ ដែលត្រូវតែផ្តោតមកប្រើប្រាស់ផលិតផលក្នុងស្រុកឱ្យបានខ្លាំងក្លា ដើម្បីធ្វើឱ្យសេដ្ឋកិច្ចជាតិរឹងមាំ និងលើកទឹកចិត្តដល់ផលិតករប្រឹងប្រែងផលិតឱ្យបានល្អ​ និងលើកទឹកចិត្តដល់កសិករ ខិតខំក្នុងការដាំដុះ សម្រាប់ផ្គត់ផ្គង់វត្ថុធាតុដើមដល់រោងចក្រ សហគ្រាស ​ក្នុងការផលិត។ ​

លើសពីនេះ លោកស្រីក៏ជំរុញឱ្យអ្នកផលិត កែច្នៃទាំងអស់ប្រើប្រាស់វត្ថុធាតុដើម ក្នុងស្រុកឱ្យអស់លទ្ធភាព ​ដើម្បីការបន្ថយការនាំចេញ​វត្ថុធាតុដើម ​ទៅក្រៅប្រទេសដែលមានតម្លៃទាប​ និងធ្វើឱ្យតម្លៃកសិផល គ្មានស្ថេរភាព។ ព្រមជាមួយគ្នា សូមឱ្យផលិតករ បន្តផលិតឱ្យបានច្រើន និងផ្តោតទៅលើគុណភាពជាសំខាន់ ដើម្បីអាចប្រកួតប្រជែងជាមួយផលិតនាំ​ចូល។

បើតាមលោកស្រី ​យូ បូរី បច្ចុប្បនេះសមាជិករបស់សហគ្រិនស្រ្តីមានចំនួនជាង ៦០០នាក់នៅរាជធានីភ្នំពេញ និងមានសាខាសមាគមនៅ ៥ខេត្តទៀត រួមមាន សៀមរាប បាត់ដំបង កោះកុង កំពង់ធំ និងរតនគិរី ដោយមានផលិតនូវផលិតផលជាច្រើន រួមមាន ម្ហូបអាហារ ​របស់របរប្រើប្រាស់ប្រចាំថ្ងៃ​ ដូចជាសាប៊ូលាងចាន សាប៊ូបោកខោអាវ និងគ្រឿងទេសជាដើម​៕