(កណ្ដាល)៖ ព្រះឃោសធម្មបណ្ឌិត លន់ សុគន្ធា ព្រះរាជាគណៈថ្នាក់ទោ ព្រះវិន័យធម៌គណខេត្តកណ្តាល និងជាព្រះអនុគណក្រុងអរិយក្សត្រ បានដឹកនាំពិធីចម្រើនព្រះបរិត្តផ្សាយមេត្តាធម៌ និងសមាធិដើម្បីសន្តិភាព កាលពីចុងសប្ដាហ៍នេះ នៅសាលាអនុគណក្រុងអរិយក្សត្រ (វត្តស្វាយជ្រុំ)។

ពិធីនេះ មានការនិមន្ត និងវត្តមានចូលដោយព្រះសង្ឃ លោកអាចារ្យ គណ:កម្មការ លោកយាយ លោកតា ពុទ្ធបរិស័ទ សមណសិស្សចំនួន២៧វត្ត សរុបជាង ៥០០ អង្គ/នាក់ ។

ព្រះឃោសធម្មបណ្ឌិត លន់ សុគន្ធា បានមានថេរដីកាឲ្យដឹងថា គោលបំណងនៃពិធីនេះ ធ្វើឡើងដើម្បីផ្សាយមេត្តាធម៌ដល់វីរកងទ័ពយើង ពួកទេវតា វត្ថុសក្ដិសិទ្ធ ជាពិសេសទសបារមី គុណព្រះពុទ្ធ ព្រះធម៌ ព្រះសង្ឃ ព្រះរតនត្រ័យ រតនបរិត្ត ច័ន្ទបរិត្តិ សុរិយបរិត្ត បុទ្ធជ័យមង្គល ធម្មចក្រវឌ្ឍនៈសូត្រ ដែលជាធម្មដ៏ខ្លាំងក្លាដែលទៅជួយទប់ស្កាត់នឹងមារសត្រូវ ឲ្យខ្លបខ្លាច ហើយឲ្យទ័ពរបស់យើងជោគជ័យមានសេចក្ដីសុខ និងមួយផ្នែកទៀត ក៏ដើម្បីជាការផ្សាយមេត្តាធម៌ដល់វីរកងទ័ពយើងដែលបានពលី បូជាជីវិតចំពោះជាតិសាសនា ព្រះមហាក្សត្រ សូមឲ្យដួងវិញ្ញាក្ខណ្ឌអ្នកទាំងអស់ អញ្ជើញសោយសុខទៅកាន់សុគតិភពគ្រប់ៗជាតិកុំបីឃ្លាងឃ្លាតឡើយ។

ម្យ៉ាងទៀត ក៏ជាផ្ដល់ថាមពលកម្លាំងចិត្តដល់កងទ័ពឲ្យដឹងថា អ្នកនៅជួរខាងក្រោយ មិនព្រងើយកន្តើយឡើង ពួកយើងរកវិធីសព្វគ្រប់បែបយ៉ាងទាំងអស់ ដើម្បីជួយជ្រោមជ្រែង ដោយបានរៀបចំនូវការប្រមូលស្បៀងអាហារ សម្ភារៈ ថវិកា ជួយទៅកាន់កងទ័ព និងបងប្អូនជនភៀសសឹក ដែលជាផ្នែករាងកាយ និងផ្នែកផ្លូវចិត្ត ផ្នែកគុណព្រះពុទ្ធ ព្រះធម៌ ព្រះសង្ឃនេះហើយ។

សូមជម្រាបថា ចាប់តាំងពីចោរសៀមចូលឈ្លានពានទឹកដីកម្ពុជាពីដំបូងលើកទី១ និងលើកទី២ មកនេះ ព្រះឃោសធម្មបណ្ឌិត លន់ សុគន្ធា បានខ្នះខ្នែងខ្លាំងណាស់ ចំពោះការកោះហៅ រៀបចំ និងអំពាវនាវឲ្យមានការប្រមូលស្បៀងអាហារ សម្ភារៈ ថវិកា ដើម្បីជួយផ្គត់ផ្គង់ទៅកាន់កងទ័ពយើង និងបងប្អូនពលរដ្ឋរងគ្រោះក្លាយជាជនភៀសសឹក ដែលគិតមកដល់ពេលនេះ ទាំងអាហារ សម្ភារៈ ថវិការទាំងនោះយ៉ាងច្រើនសន្ធឹកសន្ធាប់ បានបញ្ជូនទៅកាន់គោលដៅ និងដល់ដៃពួកគាត់អស់ហើយ និងនៅតែបន្តអំពាវនាវប្រមូលស្បៀងអាហារ សម្ភារៈ ថវិកា ជាបន្តបន្ទាប់ទៀត ដើម្បីជួយជ្រោមជ្រែងពីជួរក្រោយនេះ អស់ពីកម្លាំងកាយ កម្លាំងចិត្ត ព្រោះនេះជាទឹកចិត្តស្នេហាជាតិ មាតុភូមិកម្ពុជា និងបង្ហាញពីក្ដីស្រលាញ់ និងគាំទ្រដល់គ្រប់វីរកងទ័ពទាំងអស់ ដែលបានចេញច្បាំងកម្ទេចខ្លាំងសត្រូវឈ្លានពានទាំងអស់ ដើម្បីរកសន្តិភាព សុខសុវត្ថិភាព ការពារមាតុភូមិខ្លួនពីការឈ្លានពានរបស់ចោរសៀមតែប៉ុណ្ណោះ៕