ព្រះចៅអធិការវត្តសន្សំកុសល នាំគ្រឿងឧបភោគ បរិភោគ ជូនប្រជាពលរដ្ឋភៀសសឹក និងគ្រួសារកងទ័ព
24-12-2025 14:32
(ភ្នំពេញ)៖ នៅព្រឹកថ្ងៃទី២៤ ខែធ្នូ ឆ្នាំ២០២៥នេះ ព្រះញាណកោសល យឹម ចំរេីន ព្រះរាជាគណៈថ្នាក់ចត្វា ព្រះវិន័យធរអនុគណខណ្ឌមានជ័យ និងជាព្រះចៅអធិការវត្តសន្សំកុសល រួមជាមួយ លោក សួស សារិន ចៅសង្កាត់បឹងទំពន់ទី១ ក្រុមប្រឹក្សាសង្កាត់ បានសំណេះសំណាលជាមួយ ក្រុមគ្រួសារកងទ័ពដែលឈរជេីងនៅសមរភូមិ ចំនួន១៦គ្រួសារ និងជនភៀសសឹក ចំនួន៦៧គ្រួសារ ដែលបានភៀសខ្លួនមកស្នាក់នៅក្នុងមូលដ្ឋានសង្កាត់បឹងទំពន់ទី១។
ឆ្លៀតក្នុងឱកាសនោះ ព្រះញាណកោសល យឹម ចំរេីន ព្រះរាជាគណៈថ្នាក់ចត្វា ព្រះវិន័យធរអនុគណខណ្ឌមានជ័យ និងជាព្រះចៅអធិការវត្តសន្សំកុសល បានសាកសួរសុខទុក្ខ និងបានឧបត្ថម្ភ គ្រឿងឧបភោគ បរិភោគ មួយចំនួនសម្រាប់ដោះស្រាយជីវភាពមួយរយៈពេល។
សូមជម្រាបថា កាលពីថ្ងៃទី២០ ខែធ្នូ ឆ្នាំ២០២៥កន្លងទៅ ព្រះញាណកោសល យឹម ចំរេីន ព្រះរាជាគណៈថ្នាក់ចត្វា និងជាព្រះចៅអធិការវត្តសន្សំកុសល លោក សួស សារិន ចៅសង្កាត់បឹងទំពន់ទី១ រួមជាមួយព្រះមន្ត្រីសង្ឃ ក្រុមប្រឹក្សាសង្កាត់ ពុទ្ធបរិស័ទ ចំណុះជេីងវត្តសន្សំកុសល បាននាំយកគ្រឿងឧបភោគ បរិភោគ របស់មូលនិធិវត្តសន្សំកុសល ជូនដល់ប្រជាជនភៀសសឹក ចំនួន២ទីតាំង ៤៥០គ្រួសារ។
ក្នុងនោះទីតាំងទី១ ចំនួន១០០គ្រួសារ និងទីតាំងទី២ ចំនួន៣៥០គ្រួសារ ដែលរងការប៉ះពាល់ដោយសារសង្គ្រាមយោធាថៃ ឈ្លានពានកម្ពុជា នៅខេត្តព្រះវិហារ៕
