(កំពង់ឆ្នាំង)៖ លោកបណ្ឌិត ហ៊ឺ វីរៈ អ្នកតំណាងរាស្ត្រមណ្ឌលខេត្តកំពង់ឆ្នាំង នៅថ្ងៃទី២៣ ខែធ្នូ ឆ្នាំ២០២៥នេះ បានអញ្ជើញជួបសំណេះសំណាល និងសួរសុខទុក្ខគ្រួសារជនភៀសសឹក ដែលមកស្នាក់អាស្រ័យនៅឃុំតាជេសចំនួន ១៤គ្រួសារ ឃុំឈូកសចំនួន ៣៧គ្រួសារ​ ឃុំច្រេស​ចំនួន​ ១១គ្រួសារ​ និង​ឃុំ​ពានី​ចំនួន​ ១៥គ្រួសារ​ ក្នុងស្រុកកំពង់ត្រឡាច ខេត្តកំពង់ឆ្នាំង។

ការ​ជួប​សំណេះសំណាល​នេះ ក៏មាន​ការ​ចូលរួម​ពី​លោក អុិត បូព៌ារដ្ឋាដេត អនុប្រធានក្រុមការងារចុះមូលដ្ឋានស្រុកកំពង់ត្រឡាច លោក វន ស៊ីផា អភិបាលស្រុកកំពង់ត្រឡាច លោក​អភិបាល​រង​ស្រុក​ រដ្ឋបាលស្រុក និងរដ្ឋបាលឃុំតាជេស ឃុំឈូកស​ ឃុំ​ច្រេស​ និង​ឃុំ​ពានីផងដែរ។

ជាមួយគ្នានោះលោកបណ្ឌិត បាននាំនូវប្រសាសន៍ផ្ដាំផ្ញើដ៏ខ្ពង់ខ្ពស់របស់សម្ដេចតេជោ ហ៊ុន សែន ប្រធានព្រឹទ្ធសភា និងសម្ដេចមហាបវរធបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោកជំទាវបណ្ឌិត ដែលជានិច្ចកាលតែងតែគិតគូពីសុខទុក្ខវីរកងទ័ព និងបងប្អូនជនភៀសសឹក អំពីការហូបចុក កន្លែងស្នាក់នៅ សុខភាព និងអនាម័យ។

ក្នុង​នោះ​ដែរ​លោកបណ្ឌិត ក៏បាននាំយកគឿងឧបភោគបរិភោគ ចែកជូនក្នុងមួយគ្រួសារទទួលបានអង្ករ ២៥គីឡូក្រាម មី ១កេស ត្រីខ ១យួរ ទឹកត្រី ៣ដប ទឹកស៊ីអុីវ ៣ដប និងថវិកាមួយចំនួនផងដែរ៕