សមាគមអតីតយុទ្ធជន និងនិវត្តជនកម្ពុជា, ធនាគារអភិវឌ្ឍន៍ជនបទ និងកសិកម្ម និងសមាគមបណ្ដាញកសិករតេជោ រួមគ្នាលើកកម្ពស់សេដ្ឋកិច្ចគ្រួសារអតីតយុទ្ធជន និងនិវត្តជនកម្ពុជា
25-12-2025 14:28
(កណ្ដាល)៖ ធនាគារអភិវឌ្ឍន៍ជនបទ និងកសិកម្ម បានចុះហត្ថលេខាលើអនុស្សរណៈនៃការយោគយល់គ្នា ជាមួយសមាគមអតីតយុទ្ធជន និងនិវត្តជនកម្ពុជា និងសមាគមបណ្ដាញកសិករតេជោ ដើម្បីជំរុញការផ្ដល់ហិរញ្ញប្បទាន គាំទ្រលើកតម្កើងសេដ្ឋកិច្ចគ្រួសារអតីតយុទ្ធជន និងនិវត្តជនកម្ពុជា និងការអភិវឌ្ឍន៍សេដ្ឋកិច្ចជនបទ។
ពិធីចុះហត្ថលេខានេះប្រព្រឹត្តទៅនៅថ្ងៃទី២៥ ខែធ្នូ ឆ្នាំ២០២៥ នៅទីស្នាក់ការសមាគមអតីតយុទ្ធជន និងនិវត្តជនកម្ពុជា ក្រោមអធិបតីភាពដ៏ខ្ពង់ខ្ពស់របស់កិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធាន និងជាអគ្គលេខាធិការសមាគមអតីតយុទ្ធជន និងនិវត្តជនកម្ពុជា លោកបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម និង លោក ជេត ភិរម្យ អនុប្រធាននៃសមាគមបណ្ដាញកសិករតេជោ និងមានការអញ្ជើញចូលរួមពីថ្នាក់ដឹកនាំសមាគមអតីតយុទ្ធជន និងនិវត្តជនកម្ពុជា ថ្នាក់ដឹកនាំធនាគារ ARDB និងតំណាងសមាគមបណ្ដាញកសិករតេជោ សរុបជាង ៥០ នាក់។
អនុស្សរណៈនៃការយោគយល់គ្នានេះ មានគោលបំណងបង្កើតកិច្ចសហប្រតិបត្តិការ ផ្លាស់ប្ដូរព័ត៌មាន និងចែករំលែកបទពិសោធកសិកម្ម ផ្ដល់ហិរញ្ញប្បទានគាំទ្រលើកតម្កើងសេដ្ឋកិច្ចគ្រួសារអតីតយុទ្ធជន និងនិវត្តជនកម្ពុជា និងការអភិវឌ្ឍន៍សេដ្ឋកិច្ចជនបទ និងផ្ដល់ការគាំទ្រជំនួយបច្ចេកទេសកសិកម្ម និងការតភ្ជាប់ទីផ្សារលក់ផលិតផលកសិកម្ម។
លោក កៅ ថាច បានលើកឡើងថា បើតាមស្ថិតិក្នុងខែសីហា ឆ្នាំ២០២៥ អតីតយុទ្ធជនមានចំនួនសរុប ១១២ ៧៣៦នាក់ ហើយមានអ្នកស្ថិតក្នុងបន្ទុកសរុបចំនួន ១៥៥ ០០៧នាក់។ ដូច្នេះ កម្លាំងពលកម្មដែលអាចចូលរួមអភិវឌ្ឍសេដ្ឋកិច្ចខ្មែរបាន មានចំនួនប្រមាណជាង ១១ម៉ឺននាក់ តាមរយៈការប្រកបរបរកសិកម្ម ឬកែច្នៃផលិតផលកសិកម្មជាដើម។
លោកបន្តថា ដោយមើលឃើញសក្តានុពលកម្លាំងពលកម្មដ៏មហិមានេះហើយ ទើបលោកបានចូលរួមចុះអនុស្សារណៈយោគយល់គ្នារវាង ធនាគារអភិវឌ្ឍន៍ជនបទ និងកសិកម្ម និងសមាគមបណ្តាញកសិករតេជោ ជាមួយសមាគមអតីតយុទ្ធជន និងនិវត្តន៍ជនកម្ពុជា សំដៅលើកកម្ពស់ជីវភាពរបស់អតីតយុទ្ធជននិងនិវត្តន៍ជនកម្ពុជា និងចូលរួមអភិវឌ្ឍវិស័យកសិកម្ម និងកសិ-ឧស្សាហកម្ម ក៏ដូចជាចូលរួមលើកម្ពស់ការផលិត កែច្នៃ និងលក់ក្នុងស្រុកអោយបានច្រើន ហើយជំនួសឱ្យការនាំចូល៕
