(បន្ទាយមានជ័យ)៖ រហូតមកដល់វេលាម៉ោង ១២៖០០នាទីថ្ងៃត្រង់​ថ្ងៃទី​២៨ ខែធ្នូ ឆ្នាំ២០២៥នេះ សមរភូមិទល់ដែនកម្ពុជាបានស្ងប់ស្ងាត់រយៈ​ពេល២៤ម៉ោងហើយ បន្ទាប់ពីកម្ពុជា-ថៃ បានព្រមព្រៀងអនុវត្តន៍ឈប់​បាញ់បន្ទាន់ចាប់ពីម៉ោង ១២៖០០នាទីថ្ងៃត្រង់ថ្ងៃទី២៧ ខែធ្នូ ឆ្នាំ២០២៥​ម្សិលមិញនេះ។

ពីសំឡេងគ្រាប់លាន់ឮទ្រហឹងមកជាស្ងប់ស្ងាត់រយៈពេល២៤ម៉ោងកន្លងមក​នេះ បានធ្វើអារម្មណ៍ប្រជាពលរដ្ឋនៅតាមភូមិសាស្ត្រដែលមាន​សង្គ្រាម​​នោះ បានប្រែក្លាយពីការតាន់តឹង និងភិតភ័យ ត្រឡប់ធូរស្រាល​វិញផង​ដែរ​។

ប្រជាពលរដ្ឋនៅក្រុងសិរីសោភ័ណ ខេត្តបន្ទាយមានជ័យ ដែលជាខេត្តស​ម​រ​ភូមិដ៏ក្តៅគគុកផងដែរនោះ បានរៀបរាប់ថា រយៈពេល២០ថ្ងៃកន្លងទៅ​នេះ ពួកគាត់ស្តាប់ឮសំឡេងអាវុធ និងគ្រាប់ផ្លោងជារៀងរាល់ថ្ងៃ។ សំឡេង​​អាវុធ និងគ្រាប់ផ្លោងនេះ ធ្វើឱ្យអារម្មណ៍ពួកគាត់មិនស្ងប់ ភិត​ភ័យ និង​ខ្វាយ​ខ្វល់ជារៀងរាល់ថ្ងៃ។ សូម្បីតែពេលរាត្រី ក៏មិនអាចសម្រាក​សម្រាន្ត​បាន​ស្កប់នោះដែរ ព្រោះបារម្ភពីទម្ងន់គ្រាប់ដែលបាញ់ផ្លោង​ធ្លាក់​លើ​ផ្ទះ​សម្បែងរបស់ពួកគាត់។

នៅយប់ថ្ងៃទី២៧ ឈានចូលថ្ងៃទី២៨ ខែធ្នូ ឆ្នាំ២០២៥នេះ សំឡេងគ្រាប់​មិនលាន់ឮទៀតនោះទេ។ ភាពស្ងប់ស្ងាត់នៃសំឡេងគ្រាប់បានធ្វើឱ្យ​អា​រម្មណ៍ដែលភិតភ័យ ព្រួយបារម្ភរបស់ប្រជាពលរដ្ឋ បានរសាយ ហើយ​សម្រាក​សម្រាន្តបានស្កប់ស្កល់ផងដែរ។

ប្រជាពលរដ្ឋកម្ពុជា ជាជាតិសាសន៍ដែលបានហែលឆ្លងសមុទ្រទុក្ខនៃ​សង្គ្រាមពីអតីតកាលឆ្អែតឆ្អន់មកហើយ សង្គ្រាមនាពេលបច្ចុប្បន្នមិន​មែន​ជារឿងថ្មីនោះឡើយ។ ដូច្នេះពលរដ្ឋកម្ពុជា បានយល់ច្បាស់នូវផលអា​ក្រក់ទាំងឡាយកើតចេញពីភ្លើងសង្គ្រាម។

ការសម្រេចបាននូវបទឈប់បាញ់រវាងកម្ពុជា-ថៃ ធ្វើឱ្យស្ងាត់ទៅវិញនូវ​ការ​ផ្ទុះអាវុធរយៈពេលប្រមាណ២០ថ្ងៃនោះ បាននាំឱ្យប្រជាពលរដ្ឋ​កម្ពុជា ជាពិសេសអ្នកស្ថិតនៅភូមិសាស្ត្រសង្គ្រាមសម្តែងការស្វាគមន៍​យ៉ាងខ្លាំងក្លាបំផុត។

ពួកគាត់​ក៏ប្រាថ្នាឱ្យការអនុវត្តន៍បទឈប់បាញ់នេះ ត្រូវបានប្រកាន់ខ្ជាប់ ហើយនាំត្រឡប់មកវិញនូវសុខសន្តិភាពតាមព្រំដែនរវាងកម្ពុជា និងថៃ៕