(ពោធិ៍សាត់)៖ លោកស្រី ស៊ន់ ធារ៉ុន (ដន ម៉ាលីន) តំណាងក្រុមហ៊ុន CAMBODIAN AQ LA SHAN NONGMU AGRICULTURAL AND ANIMAL HUSBANDRY RESOUCES CO.,LTD ជាក្រុមហ៊ុនកសិកម្មដាំដុះដំណាំដំឡូងមី និងរោងចក្រផលិតម្សៅដំឡូងមីស្ងួត ដែលមានមូលដ្ឋានក្នុងភូមិកណ្តាល ឃុំឈើតុំ ស្រុកក្រគរ ខេត្តពោធិ៍សាត់ បានផ្តល់ជំនួយជាបន្តបន្ទាប់ ជូនដល់បងប្អូនគ្រួសារកងទ័ព និងពលរដ្ឋភៀសសឹក ដែលរងគ្រោះដោយសារសង្គ្រាមឈ្លានពាន មកស្នាក់នៅបណ្តោះអាសន្ន ក្នុងខេត្តពោធិ៍សាត់ ខេត្តសៀមរាប និងខេត្តបាត់ដំបង នូវអង្ករសរុបចំនួន២០០តោន, ត្រីងៀត២តោន និងថវិកាមួយចំនួន។

លោកស្រី ស៊ន់ ធារ៉ុន (ដន ម៉ាលីន) បានឱ្យដឹងថា ដោយបង្ហាញអារម្មណ៍ផ្ទាល់ខ្លួន ក្នុងនាមជាស្ត្រី ដែលមានស្វាមីនៅជួរមុខផងនោះ លោកស្រី រួមជាមួយលោកប្រធានក្រុមហ៊ុន CAMBODIAN AQ LA SHAN NONGMU AGRICULTURAL AND ANIMAL HUSBANDRY RESOUCES CO.,LTD ក៏មានទឹកចិត្តអាណិតអាសូរ គោរពស្រឡាញ់ និងបានសហការបរិច្ចាគធនធានផ្ទាល់ខ្លួន ជួយដល់រដ្ឋបាលខេត្តពោធិ៍សាត់ ខេត្តសៀមរាប និងខេត្តបាត់ដំបង ដោយបានផ្តល់នូវអង្ករជាបន្តបន្ទាប់សរុបចំនួន២០០តោន, ត្រីងៀត២តោន និងថវិកាមួយចំនួនធំ សម្រាប់ចែកជូនដល់បងប្អូនគ្រួសារកងទ័ព និងពលរដ្ឋភៀសសឹក ដែលរងគ្រោះដោយសារសង្គ្រាមឈ្លានពាន។

លោកស្រីបានលើកឡើងថា ការចូលរួមឧបត្ថម្ភជាស្បៀងអាហារ និងថវិកា ដល់គ្រួសារកងទ័ព និងពលរដ្ឋភៀសសឹកនាពេលនេះ ក៏ដូចជាពេលកន្លងមក គឺជាសកម្មភាពមនុស្សធម៌ដ៏ឧត្តុង្គឧត្តម និងជាការបង្ហាញនូវស្មារតីសាមគ្គីជាតិ យ៉ាងពិតប្រាកដ។ ពិតណាស់នៅពេលពួកគាត់ដឹងថា គ្រួសារនៅក្រោយមានការយកចិត្តទុកដាក់ ពួកគាត់នឹងមានស្មារតីរឹងមាំ និងគ្មានកង្វល់ក្នុងការបំពេញភារកិច្ចឈរជើងការពារបូរណភាពទឹកដី ជាក់ជាពុំខាន។

លោកស្រី សូមគោរពថ្លែងអំណរគុណចំពោះ សម្តេចតេជោ ហ៊ុន សែន និងសម្តេចបវរធិបតី ហ៊ុន ម៉ាណែត រួមទាំងថ្នាកដឹកនាំដ៏ទៃផ្សេងទៀត ដែលបានខិតខំក្នុងការទំនាក់ទំនងការទូតយ៉ាងស្វិតស្វាញ ក្នុងភាពអត់ធ្មត់គ្រប់កាលៈទេសៈ ឈានទៅដល់ការចុះកិច្ចព្រមព្រៀងអនុវត្តបទឈប់បាញ់ និងការពារបាននូវបូរណភាពទឹកដីកម្ពុជា និងធ្វើឱ្យកម្ពុជា ទទួលបាននូវសន្តិភាព។

ទន្ទឹមនឹងនេះ លោកស្រី ស៊ន់ ធារ៉ុន (ដន ម៉ាលីន) សូមឱ្យប្រជាពលរដ្ឋទាំងអស់ ជឿជាក់លើប្រមុខរាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ប្រធានព្រឹទ្ធសភា និងសម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ព្រមទាំងថ្នាក់ដឹកនាំគ្រប់លំដាប់ថ្នាក់ ដែលកំពុងតែអនុវត្តការងារយ៉ាងសកម្មមមាញឹកបំផុត ដើម្បីស្វែងរកសុខសន្តិភាព និងសុខសុវត្ថិភាព ឈានទៅដោះស្រាយនូវស្បៀងអាហារ ការស្នាក់នៅ ជូនប្រជាពលរដ្ឋទូទាំងប្រទេស មិនឱ្យខ្វះខាត និងដាច់ស្បៀងនោះឡើយ៕