(ព្រះវិហារ)៖ លោកឧកញ៉ា ហាក់ លាងហ៊ ប្រធានសមាគមភស្តុភារកម្មកម្ពុជា នៅថ្ងៃទី២៩ ខែធ្នូ ឆ្នាំ២០២៥ បានដឹកនាំក្រុមការងារនាំយកអំណោយជាគ្រឿងឧបភោគបរិភោគ សម្ភារសិក្សា និងសម្លៀកបំពាក់កុមារមួយចំនួន របស់មូលនិធិសមាគមភស្តុភារកម្មកម្ពុជា ទៅប្រគល់ជូនសិស្សានុសិស្សភៀសសឹក និងវីរៈកងទ័ព នៅមណ្ឌលសុវត្ថិភាពវត្តពើងព្រះគោ។ ពិធីនេះបានធ្វើឡើងក្រោមវត្តមានលោក អ៊ុក គឹមសាន អភិបាលរងខេត្តព្រះវិហារ និងជាប្រធានមណ្ឌល។

លោក អ៊ុក គឹមសាន បានថ្លែងថា មណ្ឌលសុវត្ថិភាពភៀសសឹកវត្តពើងព្រះគោ ស្ថិតក្នុងឃុំឈានមុខ ស្រុកត្បែងមានជ័យ បច្ចុប្បន្នមានជនភៀសសឹកចំនួន ១៣៧០ គ្រួសារ ស្មើនឹង ៤៥៤៥នាក់ ដែលកំពុងស្នាក់នៅទទួលការថែទាំ និងជំនួយពីអាជ្ញាធរ និងសប្បុរសជននានា។

លោកអភិបាលរងខេត្ត ថ្លែងបញ្ជាក់ទៀតថា អំណោយដែលបាននាំយកមកប្រគល់នៅថ្ងៃនេះ គឺជាការចូលរួមចំណែកដ៏មានអត្ថន័យ ក្នុងការជួយសម្រាលការលំបាក និងលើកទឹកចិត្តដល់បងប្អូនជនភៀសសឹក សិស្សានុសិស្ស និងកងកម្លាំងការពារជាតិ។

ក្នុងនាមលោក គីម រិទ្ធី អភិបាលខេត្តព្រះវិហារ, លោក អ៊ុក គឹមសាន បានថ្លែងអំណរគុណយ៉ាងជ្រាលជ្រៅចំពោះលោកឧកញ៉ា ហាក់ លាងហ៊ ប្រធានសមាគមភស្តុភារកម្មកម្ពុជា និងក្រុមការងារ ក៏ដូចជាសប្បុរសជនគ្រប់ទិសទី ដែលបានឧបត្ថម្ភអំណោយជួយដល់ជនភៀសសឹក និងប្រជាពលរដ្ឋដែលកំពុងជួបការលំបាក។

អភិបាលរងខេត្តព្រះវិហារ បានបញ្ជាក់ថា តាមរយៈសកម្មភាពសប្បុរសធម៌របស់សមាគមភស្តុភារកម្មកម្ពុជា និងសប្បុរសជនទាំងអស់ គឺបានបង្ហាញពីស្មារតីសាមគ្គីភាព មនុស្សធម៌ និងការចូលរួមទទួលខុសត្រូវចំពោះសង្គម ដែលជាកម្លាំងចិត្តដ៏សំខាន់ សម្រាប់ជួយឲ្យប្រជាពលរដ្ឋឆ្លងកាត់ការលំបាក។

អំណោយមួយផ្នែកទៀត លោកនឹងចាត់ចែងនាំទៅផ្តល់ជូនវីរៈកងទ័ពជួរមុខផងដែរ ដើម្បីជាការលើកទឹកចិត្ត និងគាំទ្រដល់កិច្ចខិតខំប្រឹងប្រែងរបស់កងកម្លាំងការពារជាតិ ក្នុងការពារប្រទេសជាតិ និងសន្តិសុខសង្គម៕