(សៀមរាប)៖ អ្នកឧកញ៉ាមហាឧបាសិកាធម្មបណ្ឌិត ញឹក ប៊ុនថា ប្រធានមជ្ឈមណ្ឌលវប្បធម៌ ព្រះពុទ្ធសាសនាកម្ពុជា និងក្រុមកាងារ នៅថ្ងៃទី៣១ ខែធ្នូ ឆ្នាំ២០២៥នេះ បានសួរសុខទុក្ខ និងនាំយកអំណោយរបស់សប្បុរសជន មកប្រគល់ជូនក្រុមគ្រួសារវីរកងទ័ព និងប្រជាពលរដ្ឋភៀសសឹកចំនួន ៤០០គ្រួសារ ដែលកំពុងស្នាក់នៅក្នុងមណ្ឌលសុវត្ថិភាព នៃខេត្តសៀមរាប។

ក្នុងឱកាសនោះ អ្នកឧកញ៉ាអគ្គមហាឧបាសិកាធម្មបណ្ឌិត ញឹក ប៊ុនថា ក៏បានសាកសួរសុខទុក្ខ និងអប់រំព្រះធម៌ដល់គ្រួសារវីរកងទ័ព និងប្រជាពលរដ្ឋភៀសសឹក ដោយក្ដីនឹករលឹក និងអាណិតអាសូរជាទីបំផុត ក្នុងស្ថានភាពដែលតំបន់ព្រំដែន មានសភាពតានតឹងខ្លាំង បង្ខំឱ្យប្រជាពលរដ្ឋត្រូវចាកចោលលំនៅដ្ឋាន ផ្ទះសម្បែងមួយរយៈដើម្បីជំលៀសខ្លួន និងគ្រួសារចេញមករកតំបន់ដែលធានាសន្តិសុខ សុវត្ថិភាពសម្រាប់ស្នាក់នៅជាបណ្តោះអាសន្នសិន។

ប្រធានមជ្ឈមណ្ឌលវប្បធម៌ ព្រះពុទ្ធសាសនាកម្ពុជា បានបន្តថា ក្រៅពីការងារមនុស្សធម៌ និងការអប់រំចិត្ត ដល់គ្រួសារកងទ័ព និងអ្នកភៀសសឹក ក្រុមការងាររបស់អ្នកឧកញ៉ាមហាឧបាសិកាធម្មបណ្ឌិត តែងតែបានផ្សាយមេត្តាចិត្ត និងឧទ្ទិសកុសលដល់កងទ័ពពលី ក្នុងបុព្វហេតុការពារជាតិ រួមទាំងបានចូលគោរពនៅទីសក្ការៈនានា ដើម្បីបួងសួងសុំសេចក្តីសុខ សន្តិភាព និងភាពជោគជ័យ សម្រាប់ប្រទេសកម្ពុជា។

អ្នកឧកញ៉ាមហាឧបាសិកាធម្មបណ្ឌិត ញឹក ប៊ុនថា បានបន្ថែមថា ថ្នាក់ដឹកនាំកម្ពុជា តែងតែបានណែនាំដល់អាជ្ញាធរគ្រប់លំដាប់ថ្នាក់ ឱ្យយកចិត្តទុកដាក់គិតគូរពីសុខទុក្ខ និងជីវភាព ហើយត្រូវជួយអន្តរាគមន៍ ជួយដោះស្រាយសម្រាលទុក្ខលំបាករបស់ប្រជាជនកម្ពុជា ក៏ដូចជាវីរកងទ័ព និងគ្រួសារភៀសសឹកឱ្យទាន់ពេលវេលា ដោយមិនរើសអើង ឬនិន្នាការនយោបាយអ្វីឡើយ ជាមួយនេះ អ្នកឧកញ៉ាអគ្គមហាឧបាសិកាធម្មបណ្ឌិត បានក្រើនរំលឹកដល់ប្រជាពលរដ្ឋភៀសសឹកត្រូវខិតខំថែទាំសុខភាព ឱ្យបានល្អតាមវិធានការអនាម័យ ស្អាត ៣យ៉ាង ដើម្បីបង្ការ ទប់ស្កាត់ ការពារការឆ្លងនៃជំងឺរាតត្បាតនានា ទាំងក្នុងរយៈពេលនៃការស្នាក់នៅ និងធ្វើដំណើរព្រោះថា បើមានការធ្វេសប្រហែសវាអាចនាំឱ្យប៉ះពាល់ដល់សុខភាពផ្ទាល់ខ្លួន និងសុវត្ថិភាពរបស់បងប្អូនផងដែរ។

ប្រធានមជ្ឈមណ្ឌលវប្បធម៌ ព្រះពុទ្ធសាសនាកម្ពុជា អំពាវនាវដល់ពលរដ្ឋទាំងអស់សូមមានស្មារតី និងរឹងមាំជឿទុកចិត្តទៅលើជំហរយ៉ាងមុតមាំ និងស្វាហាប់ ប្រកបដោយគតិបណ្ឌិតដ៏ខ្ពង់ខ្ពស់ របស់ថ្នាក់ដឹកនាំកំពូលកម្ពុជា គឺមានសម្តេចតេជោ ហ៊ុន សែន ប្រធានព្រឹទ្ធសភា និងសម្ដេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលសម្តេចទាំងពីរមានភាពប្រាជ្ញាឈ្លាសវៃ មានបទពិសធន៍ក្នុងការច្បាំងការពារ ក៏ដូចជាកសាងប្រទេសជាតិ ធ្វើឱ្យព្រះពុទ្ធសាសនា បានរស់ឡើងវិញក្រោយផ្តួលរំលំរបបខ្មែរក្រហម ដូច្នេះហើយ ទើបពលរដ្ឋខ្មែរគោរពស្រលាញ់ និងដឹកងគុណរាជរដ្ឋាភិបាល។

គួរបញ្ជាក់ថា សម្រាប់សម្ភារឧបត្ថម្ភជូនគ្រួសារកងទ័ព និងជនភៀសសឹក រួមមានអង្ករចំនួន ១០គីឡូ សារ៉ុង ក្រម៉ា និងទឹកបរិសុទ្ធ ព្រមទាំងថវិកា ២ម៉ឺនរៀលក្នុងមួយគ្រួសារ ។ ជាមួយនេះ អ្នកឧកញ៉ាមហាឧបាសិកាធម្មបណ្ឌិត ញឹក ប៊ុនថា និងក្រុមការងារ បានអញ្ជើញបួងសួងនៅទីសក្ការលោកតារាជ នាប្រាសាទអង្គរវត្ត និងនៅវត្តប្រាសាទព្រះវិហារប្រាំពីរល្វែង និងទៅសមាធិ សុំសេចក្តីសុខ រួមទាំរាប់បាតព្រះសង្ឃចំនួន៦៥អង្គ និងជូនទានដល់ ដូនជីតាជី ៥០នាក់ ដើម្បីឧទ្ទិសកុសលដល់វីរកងទ័ពពលីផងដែរ៕