(ក្រចេះ)៖ អនុសេនីយ៍ ពុំ ស្មៃ ជាវីរយុទ្ធជនដ៏អង់អាចក្លាហានមួយរូប ដែល​​បាន​ពលីជីវិត​នៅ​លើសមរភូមិអានសេះ ស្ថិតក្នុងស្រុកជាំក្សាន្ត ខេត្ត​ព្រះវិហារ។ សព​ត្រូវ​បានរៀបចំធ្វើបុណ្យតាមប្រពៃណីនៅគេហដ្ឋាននាស្រុកកំណើត ក្នុង​ភូមិភ្នំខៀវ ឃុំ​អូរគ្រៀងសែនជ័យ ស្រុកអូរគ្រៀងសែនជ័យ ខេត្តក្រចេះ។

ពុំ ស្មៃ បានចូលបំពេញការងារជាយោធានៅឆ្នាំ២០១៨ ដែលមកទល់​នឹងរូប​គេពលី​ជីវិត​លើសមរភូមិនេះ រូបគេបានបំពេញការងារជាយោធាជិត១០ឆ្នាំមកហើយ។

អនុសេនីយ៍ ពុំ ស្មៃ មានវ័យ២៧ឆ្នាំ ត្រូវបានអង្គភាពចាត់ឱ្យទៅឈរជើងការពារ​ទឹក​ដីនៅសមរភូមិទិសអានសេះ ក្នុងស្រុកជាំក្សាន្ត ខេត្តព្រះវិហារ តាំងពី​មុន​ពេល​ផ្ទុះ​សង្គ្រាមលើកទី១មកម្ល៉េះ។ ក្នុងសង្គ្រាមឈ្លានពានលើកទី១ចន្លោះពីថ្ងៃទី២៤ ដល់ថ្ងៃទី២៨ ខែកក្កដា ពុំ ស្មៃ បានប្រយុទ្ធដ៏អង់អាចក្លាហានបំផុតជាមួយសត្រូវ​ឈ្លាន ដើម្បីការពារទឹកដី។

ជាអកុសលនៅក្នុងសង្គ្រាមឈ្លានពានលើកទី២ ពីថ្ងៃទី៧ ដល់ថ្ងៃទី២៧ ខែធ្នូ ពុំ ស្មៃ ត្រូវកងទ័ពថៃឈ្លានពាន បាញ់ប្រហារបណ្តាលឱ្យស្លាប់បាត់បង់ជីវិត។

ការពលីរបស់ ពុំ ស្មៃ បន្សល់នូវកិត្តិយសដ៏ធំធេងបំផុតសម្រាប់ខ្លួនរបស់គេ និង​ក្រុម​គ្រួសារ ព្រោះជាការពលីក្នុងបុព្វហេតុការពារជាតិ និងទឹកដី។ បើទោះបីការ​ពលី​ពោរពេញដោយកិត្តិយសយ៉ាងណាក្តី តែ ពុំ ស្មៃ មិនទាន់បានសម្រេចបំណង​ប្រាថ្នា និងការទទួលខុសត្រូវលើកាតព្វកិច្ចជាឪពុក និងស្វាមីដ៏ល្អនៅឡើយ។

មរណភាពរបស់ ពុំ ស្មៃ បានបន្សល់ទុកកូនស្រីពីររូបឱ្យរស់នៅកំព្រាឪពុក ជា​មួយ​នឹងម្តាយដែលមិនមានមុខរបរអ្វីនោះឡើយ។ កូនស្រីច្បងមានអាយុ៦ឆ្នាំ និងកូន​ស្រី​ទី២ មានអាយុទើបជាង២ឆ្នាំ។ កាលនៅមានជីវិត ពុំ ស្មៃ បានប្រឹងប្រែង​សន្សំ​ប្រាក់​បៀវត្សរ៍របស់ខ្លួន ដើម្បីធ្វើផ្ទះចូនកូនៗ និងភរិយាធ្វើជាជម្រក។

ផ្ទះតូចនេះ សាងសង់រយៈពេលប្រមាណ៣ឆ្នាំមកហើយ តែមិនទាន់រួច​រាល់​នៅ​ឡើយទេ។ នៅពេលនេះ ពុំ ស្មៃ ជាស្មាបង្អែកគ្រួសារ ជាដៃឱបក្រសោប​គ្រួសារ​នោះ បានពលីជីវិតទៅហើយ។ គ្រាដែលការពលីរបស់ ពុំ ស្មៃ ពោរពេញដោយ​មោទន​ភាព និងកិត្តិយស តែកូនៗ និងភរិយារបស់គេ ត្រូវបាត់បង្អែកជីវិត និងមិនអាចសម្រេចបំណងប្រាថ្នាសង់ផ្ទះដ៏កក់ក្តៅ។

នៅ ស្រីលាប ជាភរិយា ពុំ ស្មៃ បានរៀបរាប់ថា កាលនៅមានជីវិត ពុំ ស្មៃ ជាស្វាមី និងជាឪពុកដ៏ល្អ ហើយគេតែងសន្យាជាមួយកូន និងភរិយាថា នឹងសាងសង់ផ្ទះ​នេះ​ឱ្យ​រួចរាល់ជាជម្រកដ៏កក់ក្តៅសម្រាប់កូន និងភរិយា។

បើតាម នៅ ស្រីលាប ផ្ទះដែល ពុំ ស្មៃ បានប្រឹងប្រែងសាងសង់នោះ សម្រេចទើប​បានប្រមាណ៤០ភាគរយប៉ុណ្ណោះ ពោលបានប្រក់ដំបូល រៀបជញ្ជាំង​ឥដ្ឋមួយ​ចំនួន ហើយមិនទាន់ចាក់សាបនៅឡើយ។

បងប្អូនមានបំណងប្រាថ្នាសម្រេចក្តីប្រាថ្នាវីរយុទ្ធជនដ៏អង់អាចក្លាហានរបស់កម្ពុជា សង់បង្ហើយផ្ទះសូមទាក់ទងភរិយារបស់ ពុំ ស្មៃ តាមទូរស័ព្ទលេខ៖ 097 577 6487 ឬបរិច្ចាគតាម QR ធនាគាររបស់ភរិយា ដែលភ្ជាប់នៅក្នុងអត្ថបទនេះ។

ការរួមចំណែករបស់បងប្អូន នឹងជួយឱ្យវិញ្ញាណក្ខន្ធរបស់ ពុំ ស្មៃ បានស្ងប់សុខ ព្រោះបានសម្រេចបំណងផ្តល់ជម្រកជូនកូន និងភរិយា៕