(ភ្នំពេញ)៖ លោក គង់ វិមាន អគ្គលេខាធិការនៃអគ្គលេខាធិការដ្ឋានក្រុមប្រឹក្សាអភិវឌ្ឍន៍កម្ពុជា (ក.អ.ក.) និងជាប្រធានក្រុមការងារគណបក្សចុះមូលដ្ឋានសង្កាត់ចាក់អង្រែលើ តំណាងលោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក.អ.ក. និងប្រធានក្រុមកាងារចុះមូលដ្ឋានខណ្ឌមានជ័យ អមដោយសមាជិក សមាជិកា នាព្រឹកថ្ងៃសៅរ៍ ទី៣ ខែមករា ឆ្នាំ២០២៦ បានចុះជួបសួរសុខទុក្ខ និងសំណេះសំណាលជាមួយប្រជាពលរដ្ឋ ក្នុងមូលដ្ឋានភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ។

ក្នុងឱកាសនេះ លោកបានពាំនាំនូវការផ្តាំផ្ញើសួរសុខទុក្ខ និងការជូនពរក្នុងឱកាសឆ្នាំថ្មី ឆ្នាំសកល២០២៦ ពីឧបនាយករដ្ឋមន្រ្តី ស៊ុន ចាន់ថុល ព្រមទាំងបាននាំយកសម្ភារៈប្រើប្រាស់មួយចំនួនដូចជា៖ អង្ករ​​ ទឹកសុទ្ធ​ ទឹកត្រី​ មី​ ក្រមា ភួយ និងថវិកាឧបត្ថម្ភជូនពលរដ្ឋមួយចំនួន។ ក្នុងនោះដែរក្រុមការងារក៏បានប្រគេន ជូនវត្តចាក់អង្រែលើនូវសម្ភារៈប្រើប្រាស់ដូចមានរៀបរាប់ខាងលើ និងបច្ច័យមួយចំនួនផងដែរ។

លោកគ្គលេខាធិការ បានជម្រាបជូនលោកយាយ អ៊ុំ ពូ មីង​ អំពីវឌ្ឍនភាពថ្មីៗនៃបញ្ហាព្រំដែនកម្ពុជា-ថៃ និងកិច្ចខិតខំប្រឹងប្រែងរបស់រាជរដ្ឋាភិបាល ក្នុងការដោះស្រាយបញ្ហាជូនប្រជាជន តាមបណ្ដោយព្រំដែនដែលទទួល រងផលប៉ះពាល់ផ្ទាល់។

ជាមួយគ្នានេះដែរ លោកអគ្គលេខាធិការ ក៏បានណែនាំឱ្យក្រុមការងារចុះមូលដ្ឋានទាំងអស់បន្តការចុះសួរសុខទុក្ខ និងស្វែងយល់អំពីបញ្ហាប្រឈមរបស់ប្រជាពលរដ្ឋក្នុងមូលដ្ឋាន ដើម្បីជំរុញឱ្យការទទួលបានសេវាសាធារណៈ បានកាន់តែប្រសើរ។

លោក គង់ វិមាន ក៏បានចុះពិនិត្យមើលទីតាំងត្រៀមបញ្ចុះបឋមសិលាសាងសង់ព្រះវិហារថ្មីនៅក្នុងវត្តចាក់អង្រែលើ ដែលនឹងត្រូវធ្វើឡើងនៅចុងសប្តាហ៍ខាងមុខ ក្រោមវត្តមានលោកឧបនាយករដ្ឋមន្រ្តី ស៊ុន ចាន់ថុល៕