អភិបាលស្រុកតាំងគោក នាំយកអំណោយចុះចែកជូនជនចាស់ជរា មានជីវភាពខ្វះខាត ១៥គ្រួសារ នៅឃុំអណ្តូងពោធិ៍
03-01-2026 14:36
(កំពង់ធំ)៖ លោក ហាក់ ម៉ុងហួត អភិបាលស្រុកតាំងគោក នាព្រឹកថ្ងៃទី០៣ ខែមករា ឆ្នាំ២០២៦នេះ បានដឹកនាំក្រុមការងារចុះជួបសំណេះសំណាលសាកសួរសុខទុក្ខប្រជាពលរដ្ឋ លោកតា លោកយាយ មានជីវភាពខ្វះខាត ១៥គ្រួសារ មកពី ៣ភូមិ នៅក្នុងឃុំអណ្តូងពោធិ៍ ស្រុកតាំងគោក ខេត្តកំពង់ធំ។
នៅក្នុងឱកាសនោះលោក ហាក់ ម៉ុងហួត បាននាំនូវការផ្តាំផ្ញើសួរទុក្ខពីសំណាក់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ស្ត្រីទី១របស់កម្ពុជា ក៏ដូចជាលោកបណ្ឌិត ថោង ខុន ទេសរដ្ឋមន្រ្តី និងលោក នួន ផារ័ត្ន អភិបាលខេត្តកំពង់ធំ និងបានបញ្ជាក់ថា លោកទាំងទ្វេតែងតែបានផ្តាំផ្ញើឱ្យយកចិត្តទុកដាក់ឱ្យបានខ្ពស់ដល់ប្រជាពលរដ្ឋនៅក្នុងមូលដ្ឋាន។
បន្ថែមពីនេះទៀតលោក ហាក់ ម៉ុងហួត ក៏បានផ្តាំផ្ញើដល់លោកតា លោកយាយទាំងអស់ ស្ថិតនៅក្នុងរដូវត្រជាក់នេះត្រូវថែរក្សាសុខភាពឱ្យបានល្អជាប់ជាប្រចាំ ជាពិសេសនោះគ្រួសារដែលមានសមាជិកចាស់ៗ សូមមានការប្រុងប្រយ័ត្នឲ្យបានខ្ពស់ចំពោះសុខភាព ដោយត្រូវត្រៀមសម្លៀកបំពាក់ក្រាស់ៗ ភួយជាដើម។
លោកអភិបាលស្រុកតាំងគោក ក៏បានក្រើនរំលឹកដល់ប្រជាជនគ្រប់រូបយកចិត្តទុកដាក់ក្នុងការតាមដានសុខភាព ដោយការពិនិត្យនៅតាមមណ្ឌលសុខភាព ពេទ្យបង្អែកដែលនៅជិតបំផុត ខណៈដែលសព្វថ្ងៃនេះសេវាសុខាភិបាលកាន់តែទំនើប និងមានក្រុមគ្រូពេទ្យជំនាញៗផងដែរ។
ជាមួយគ្នានោះដែរ លោក ហាក់ ម៉ុងហួត ក៏បានក្រើនរំលឹកដល់ថ្នាក់ដឹកនាំ ភូមិ ឃុំ ធ្វើការតាមដាន និងចុះសួរសុខទុក្ខប្រជាពលរដ្ឋជាប្រចាំ ដើម្បីដឹងពីបញ្ហាផ្សេងៗ និងត្រូវសូមរាយការណ៍ដល់ថ្នាក់លើដើម្បីដោះស្រាយ និងអន្តរាគនម៍ឲ្យទាន់ពេលវេលា។
សូមបញ្ជាក់ដែរថា អំណោយដែលបានប្រគល់ជូនលោកតា លោកយាយ ទាំង១៥គ្រួសារនោះ រួមមានក្នុងមួយគ្រួសារ ទទួលបាន អង្ករ មី ទឹកត្រី ទឹកស៊ីអ៉ីវ ត្រីខ រួមទាំងថវិកា មួយចំនួនទៀតផងដែរ៕
