លោក ចាប តូ នាំអំណោយរដ្ឋមន្ត្រីសង្គមកិច្ច ជូនវីរៈកងទ័ព និងជនភៀសសឹក នៅខេត្តបន្ទាយមានជ័យ
06-01-2026 12:58
(បន្ទាយមានជ័យ)៖ នៅរសៀលថ្ងៃទី៥ ខែមករា ឆ្នាំ២០២៦ លោក ចាប តូ អនុរដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា ដែលជាជនមានពិការភាពនៅកម្ពុជា បាននាំយកអំណោយរបស់លោក ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងលោកស្រី ជា ផល្គុន ជូនដល់វីរៈកងទ័ព និងជនភៀសសឹកនៅក្នុងខេត្តបន្ទាយមានជ័យ។
ក្នុងពិធីនោះក៏មានការអញ្ជើញចូលរួមពីសំណាក់លោក ឃុន វុទ្ធី ប្រធានមន្ទីរ ស.អ.យ ខេត្តបន្ទាយមានជ័យ លោក ចូវ សង្អៀប ប្រធានមន្ទីរ ស.អ.យ ខេត្តឧត្តរមានជ័យ និងក្រុមការងារមន្រ្តីជនមានពិការភាពភ្នែក សិល្បករ សិល្បការិនី យុវជនស្ម័គ្រចិត្តសមាគមតន្ត្រីសំនៀងជនពិការផងដែរ។
ឆ្លៀតក្នុងឱកាសនោះ លោកអនុរដ្ឋលេខាធិការ ក៏បានពាំនាំប្រសាសន៍ផ្ដាំផ្ញើសាកសួរសុខទុក្ខពីសំណាក់លោក ជា សុមេធី និងលោកស្រី ជូនដល់វីរៈកងទ័ព និងជនភៀសសឹកទាំងអស់ផងដែរ។
សូមបញ្ជាក់ថា សម្ភារៈ និងគ្រឿងឧបភោគ បរិភោគ ដែលបានយកចែកជូនជូនវីរៈកងទ័ព ជនភៀសសឹក ជនមានពិការភាព និងកុមាររួមមាននាពេលនោះរួមមាន៖
* សម្រាប់ជនមានពិការភាពសរុបចំនួន ១១៥គ្រួសារ ក្នុងមួយគ្រួសារទទួលបានអង្ករ ១០គីឡូ នំក្រពង ទឹកត្រី ទឹកស៊ីអ៉ីវ ត្រីខ មុង ភួយ ថ្នាំ អំបុក។
* សម្រាប់កុមារចំនួន៣០០នាក់ ក្នុងម្នាក់ៗទទួលបាន សៀវភៅ ៥ក្បាល ប៊ិច ខ្មៅដៃ គូល័រ ប្រដាប់ខួងខ្មៅដៃ នំសូកូឡា។
សម្រាប់វីរកងទ័ពនៅខេត្តឧត្តរមានជ័យវិញ ទទួលបានអង្ករ ៣,៤០០គីឡូ តង់៣០ ទំហំ ៤ម៉ែត្រ គុណ៦ម៉ែត្រ ធុងទឹក ២៣០ធុង (ចំណុះ ៣៥លីត្រ) កាំបិត១០ ពូថៅ១០ និងគ្រឿងឧបភោគបរិភោគចំនួន ៣៤២ឈុត ក្នុងនោះរួមមាន៖ ថ្នាំ នំក្រពង ទឹកត្រី ទឹកស៊ីអ៉ីវ ត្រីខ បាយក្ដាំង មុង ភួយ ស្ករ ប៊ីចេង អំបិល ប្រេងឆា អង្ករសុខភាព អាវយឺត៕
