(សៀមរាប)៖ ព្រះគ្រូវិចិត្រវង្សា ហែម គឹមសាន ព្រះគ្រូចៅអធិការវត្តប្រាសាទគោកចក សង្កាត់គោកចក ក្រុងសៀមរាប និងព្រះមហាចារ សំ សារ៉ូន ព្រះគ្រូចៅអធិការវត្តខ្មែរពុទ្ធិការាម (វត្តវេឡូរ៍) រដ្ឋកាលីហ្វ័រញ៉ា សហរដ្ឋអាមេរិក នៅរសៀលថ្ងៃទី០៥ ខែមករា ឆ្នាំ២០២៦ បាននិមន្តចុះសួរសុខទុក្ខ និងចែកអំណោយជាគ្រឿងឧបភោគបរិភោគ, សម្ភារៈប្រើប្រាស់ និងបច្ច័យមួយចំនួន ដល់វីរកងទ័ពនៅជួរមុខ ចំនួន០៣ទីតាំង ក្នុងភូមិសាស្រ្តខេត្តឧត្តរមានជ័យ។

ព្រះវិចិត្រវង្សា ហែម គឹមសាន និងព្រះមហាចារ សំ សារ៉ូន មានព្រះថេរដីកា ថ្លៃអអំណរគុណដល់បងប្អូនវីរៈកងទ័ពជួរមុខ ដែលបានខិតខំប្រឹងប្រែងការពារបូរណភាពទឹកដី និងរក្សាសន្តិសុខជូនជាតិមាតុភូមិ។ ហើយបងប្អូនវីរកងទ័ព ក៏ត្រូវប្រឈមនឹងការលំបាកសព្វបែបយ៉ាង និងឆ្ងាយពីកូន ប្រពន្ធ គ្រួសារសាច់ញាតិ និងឪពុកម្តាយ ហាលភ្លៀងហាលខ្យល់ ដើម្បីការពារទឹកដីខ្មែរ ព្រមទាំងប្រជាពលរដ្ឋឲ្យរស់នៅបានសុខ។

ព្រះអង្គមានថេរដីកាបន្តថា ការការពារខ្លួន និងការពារទ្រព្យសម្បត្តិ ទឹកដី ព្រមទាំងអាយុជីវិតរបស់ប្រជាពលរដ្ឋ គឺយើងត្រូវតែការពារក្នុងករណីមានគេមកបំពាន់ ឬមកឆក់ប្លន់។ ព្រោះការការពារទឹកដីនេះ ជាការបំពេញកតញ្ញូដ៏ប្រសើរណាស់ ហើយផលនៃកតញ្ញូនេះនឹងនាំឲ្យកងកម្លាំងប្រកបតែនឹងសុខចម្រើនជានិច្ច។

ព្រះអង្គក៏បានបួងសួងដល់វត្ថុស័ក្តសិទ្ធិទាំងអស់ នៅលើលោក សូមជួយថែរក្សាកងកម្លាំងប្រដាប់អាវុធទាំងអស់ឲ្យទទួលបានជោគជ័យលើសត្រូវដែលឈ្លានពាន និងយកទឹកដីរបស់យើង ដើម្បីថែរក្សាការពារសុខសន្តិភាព។

ក្នុងនោះដែរ តំណាងវីរកងទ័ព ក៏បានធ្វើការថ្លែងអំណរគុណដល់ព្រះគ្រូចៅអធិការទាំងពីរ និងព្រះសង្ឃ បងប្អូនពុទ្ធបរិស័ទ ដែលបាននាំយកអំណោយជាគ្រឿងឧបភោគបរិភោគ និងសម្ភារៈប្រើប្រាស រួមទាំងថវិកា ក្នុងការទ្រទ្រង់ដល់កងកម្លាំងជួរមុខ ដែលបានកំពុងការពារអធិបតេយ្យភាព បូរណភាពទឹកដី ដើម្បីសុខសន្តិភាព ស្ថិរភាពជូនជាតិមាតុភូមិ។

ជាមួយនេះ លោកបញ្ជាក់ថា ទោះបីមានភាពលំបាកយ៉ាងណាក៏ដោយ ក៏យុទ្ធមិត្តយើងនឹងប្រគៀកស្មាគ្នា ដើម្បីការពារបូរណភាពទឹកដី មិនឲ្យខ្លាំងសត្រូវឈ្លានពានបានឡើយ៕