(តាកែវ)៖ នៅក្នុងឱកាសអញ្ជើញជួបសំណេះសំណាលជាមួយ ក្រុមគ្រួសារវីរកងទ័ពភៀសសឹក និងគ្រួសារស៊ីវិល ភៀសសឹក ដែលកំពុងស្នាក់នៅបណ្ដោះអាសន្ន នៅមូលដ្ឋានស្រុកសំរោង ចំនួន ២៨៧គ្រួសារ នាព្រឹកថ្ងៃពុធ ទី៧ ខែមករា ឆ្នាំ២០២៦ លោក វ៉ី សំណាង អភិបាលខេត្តតាកែវ បានលើកឡើងថា ប្រជាពលរដ្ឋទូទាំងប្រទេសចងចាំជានិច្ចចំពោះការលះបង់សាច់ស្រស់ឈាមស្រស់របស់វីរកងទ័ពដែលបានលះបង់ចំពោះជាតិមាតុភូមិ។

លោក វ៉ី សំណាង បានបន្តថា ការចុះជួបសំណេះ សំណាលជាមួយបងប្អូនជនភៀសសឹក និងគ្រួសារវីរកងទ័ពនៅក្នុងមូលដ្ឋានស្រុកសំរោង ថ្ងៃនេះ គឺជាការបង្ហាញពីការដឹងគុណ ចំពោះអ្នកដែលបានលះបង់សាច់ស្រស់ឈាមស្រស់ ដើម្បីការពារទឹកដីមិនឱ្យសត្រូវចូលមកឈ្លានពានទឹកដីកម្ពុជាយើងបាននោះទេ។

លោកអភិបាលខេត្តតាកែវ បានចាត់ទុកបងប្អូនអតីតយុទ្ធជនថា ជាសាក្សីរស់ ដែលដឹងច្បាស់បំផុតពីទុក្ខវេទនានៃភ្លើងសង្គ្រាម និងជាអ្នកដែលយល់ច្បាស់បំផុតពីតម្លៃនៃពាក្យថា «អរគុណសន្តិភាព»។

នៅក្នុងឱកាសនោះលោក វ៉ី សំណាង ក៏បានជំរុញឱ្យអាជ្ញាធរ និងប្រជាពលរដ្ឋទាំងអស់ រួមគ្នារក្សានូវសមិទ្ធផលដែលកើតចេញ ពីសន្តិភាព ព្រោះបើគ្មានសន្តិភាព ក៏គ្មានការអភិវឌ្ឍ សាលារៀន វត្តអារាម និងជីវភាពធូរធារដូចសព្វថ្ងៃនេះដែរ។ សន្តិភាព គឺជាដង្ហើមនៃជីវិត និងជាគ្រឹះនៃក្តីសង្ឃឹម ដូច្នេះយើងទាំងអស់គ្នាមានកាតព្វកិច្ច ថែរក្សាវាឱ្យបានទោះ ក្នុងតម្លៃណាក៏ដោយ៕