(កំពង់ធំ)៖ លោកស្រី ឃួន ឃុនឌី សមាជិកព្រឹទ្ធសភា និងជាប្រធានក្រុមការងារចុះមូលដ្ឋានស្រុកកំពង់ស្វាយ បានអំពាវនាវដល់បងប្អូនប្រជាពលរដ្ឋ ជឿជាក់លើការដឹកនាំរបស់រាជរដ្ឋាភិបាល នៅក្នុងការខិតខំប្រឹងប្រែងការពារបូរណភាពទឹកដី។

លោកស្រី ឃួន ឃុនឌី បានថ្លែងបែបនេះ ពេលចុះជួបសំណេះសំណាលសួរសុខទុក្ខគណ:កម្មាធិការបក្សឃុំ លោក លោកស្រីសមាជិកអចិន្ត្រៃយ៍គណបក្សឃុំសាន់គរ នៅកស្នាក់ការគណបក្សឃុំសាន់គរ ស្រុកកំពង់ស្វាយ ខេត្តកំពង់ធំ ថ្ងៃទី០៧ ខែមករា ឆ្នាំ២០២៦។

ពិធីនេះមានការអញ្ជើញចូលរួមពីលោកស្រី យស ថានារី សមាជិករដ្ឋសភា និងជាអនុប្រធានក្រុមការងារគណបក្សចុះមូលដ្ឋានស្រុក លោកប្រធានគណ:កម្មាធិការបក្សឃុំ លោក លោកស្រីសមាជិកអចិន្ត្រៃយ៍គណបក្សឃុំ លោក លោកស្រី ប្រធាន អនុប្រធាន សមាជិកសាខាគណបក្សភូមិ ចំនួន៥៦នាក់ ផងដែរ។

ជាមួយគ្នានោះដែរ លោកស្រីបានរំលឹកពីវីរភាព និងការលះបង់របស់យុទ្ធជនក្នុងការរំដោះប្រទេស ព្រមទាំងចងចាំមហាវីរភាព និងដឹងគុណដល់យុទ្ធជនជំនាន់មុន។ ជាពិសេសគឺ ៧ មករា ដែលជាការចងចាំពីការសង្គ្រោះជីវិតប្រជាជនកម្ពុជា ហើយក៏ជាការនាំមកនូវសិទ្ធិសេរីភាព និងការអភិវឌ្ឍលើគ្រប់វិស័យ ធ្វើឱ្យកម្ពុជាមានកិត្យានុភាពលើឆាកអន្តរជាតិដល់ពេលនេះ។

លោកស្រីបន្តថា ប្រជាពលរដ្ឋកម្ពុជាទូទាំងប្រទេសចាត់ទុកថ្ងៃទី៧ ខែមករា ជាប្រវត្តិសាស្ត្រ ដែលបានបញ្ចប់របបកម្ពុជាប្រជាធិបតេយ្យ ក្នុងរយៈពេល ៣ឆ្នាំ ៨ខែ ២០ថ្ងៃ និងធ្វើឱ្យមានមនុស្សស្លាប់ជិត ៣លាននាក់។ របបដ៏ឃោរឃៅខ្មៅងងឹតមួយនេះ ត្រូវបានកងកម្លាំងរបស់រណសិរ្សសាមគ្គីសង្គ្រោះជាតិកម្ពុជា ដែលពេលនេះជារណសិរ្សសាមគ្គី អភិវឌ្ឍន៍ មាតុភូមិកម្ពុជា ដោយសហការជាមួយកងកម្លាំងស្ម័គ្រចិត្តវៀតណាម បានចូលមកជួយរំដោះប្រទេស និងប្រជាជនកម្ពុជាបានទាន់ពេលវេលា ជួយសង្គ្រោះប្រជាជនស្លូតត្រង់រាប់លាននាក់ពីការសម្លាប់។

លោកស្រី បានជម្រាបជូនបងប្អូនប្រជាពលរដ្ឋអំពីសភាពការណ៍វិវត្តនៃសង្រ្គាមកម្ពុជា-ថៃ ជាពិសេស គឺកិច្ចខិតខំប្រឹងប្រែងរបស់រាជរដ្ឋាភិបាល នៅលើសមរភូមិការទូត ផ្លូវច្បាប់ និងយោធា ក៏ដូចជាវីរភាពដ៏អង់អាចក្លាហានរបស់វីរយុទ្ធជនរបស់យើងដែលកំពុងឈរជើងការពារបូរណភាពទឹកដី ព្រមទាំងអំពាវនាវដល់បងប្អូនប្រជាពលរដ្ឋទាំងអស់ ជឿជាក់លើការដឹកនាំរបស់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាអតីតនាយករដ្ឋមន្ត្រី និងសម្ដេចមហាបវរធិបតី ហ៊ុន ម៉ាណែត ដែលជាប្រមុខនៃរាជរដ្ឋាភិបាលកម្ពុជា នៅក្នុងការខិតខំប្រឹងប្រែងការពារបូរណភាពទឹកដីកម្ពុជា និងស្តារឡើងវិញនូវសន្តិភាព និងស្ថិរភាពនៅតាមបន្ទាត់ព្រំដែន ហើយក៏គ្មានការចចារប្តូរយកសន្តិភាពជាមួយនឹងការកាត់ទឹកដីនោះឡើយ៕