(បាត់ដំបង)៖ លោក សុខ លូ អភិបាលខេត្តបាត់ដំបង នៅរសៀលថ្ងៃទី៨ ខែមករា ឆ្នាំ២០២៦នេះ បានអញ្ជើញប្រកាស តែងតាំង លោក សើ សាម៉េត ចូលកាន់មុខតំណែងជាអភិបាលស្រុករតនមណ្ឌលថ្មី ជំនួសលោក គុយ វណ្ណូ ដែលត្រូវបានផ្ទេរទៅបម្រើការងារនៅរដ្ឋបាលខេត្តបាត់ដំបង។

ពិធីនេះធ្វើឡើង នៅបរិវេណសាលាស្រុករតនមណ្ឌល ដោយមានការអញ្ជើញចូលរួមពីអភិបាលរងខេត្ត នាយករដ្ឋបាលសាលាខេត្ត ប្រធានមន្ទីរ អង្គភាព និងអាជ្ញាធរមូលដ្ឋាន។

បើយោងតាមអនុក្រឹត្យរបស់រាជរដ្ឋាភិបាល លោក សើ សាម៉េត ត្រូវបានផ្ទេរភារកិច្ចពីអភិបាលស្រុកសំឡូត ឱ្យកាន់មុខតំណែងជាអភិបាលស្រុករតនមណ្ឌលជំនួសលោក គុយ វណ្ណូ ដែលត្រូវផ្ទេរភារកិច្ចពីអភិបាលស្រុករតនមណ្ឌល ឱ្យទៅបម្រើការងារនៅរដ្ឋបាលខេត្តបាត់ដំបង។

លោក សើ សាម៉េត បានប្ដេជ្ញា អនុវត្តតួនាទី ភារកិច្ចរបស់ខ្លួនក្នុងការពង្រឹងសន្តិភាព ស្ថិរភាពនយោបាយ ស្ថិរភាពសង្គម និងការអភិវឌ្ឍសេដ្ឋកិច្ចសង្គមនៅក្នុងមូលដ្ឋានស្រុករតនមណ្ឌល និងចូរួមក្នុងការអនុវត្តកម្មវិធីនយោបាយ និងយុទ្ធសាស្ត បញ្ចកោណរបស់រាជរដ្ឋាភិបាលសម្រាប់នីតិកាលទី៧នៃរដ្ឋសភា និងគោលនយោបាយកំណែទម្រង់នានា។

ក្នុងឱកាសនេះ លោក សុខ លូ បានណែនាំដល់លោក សើ សាម៉េត ដែលជាអភិបាលស្រុកទើបប្រកាសចូលកាន់មុខតំណែងថ្មី ត្រូវបន្តយកចិត្តទុកដាក់ការបង្រ្កាបបទល្មើសគ្រឿងញៀន ល្បែងស៊ីសង និងក្មេងទំនើង ឱ្យអស់ពីក្នុងមូលដ្ឋាន។

លោកអភិបាលខេត្តបន្តណែនាំឱ្យគណៈបញ្ជាការឯកភាពស្រុកត្រូវយកចិត្តទុកដាក់ឱ្យបានខ្ពស់ សហការទប់ស្កាត់បង្ក្រាបបទល្មើសធនធានរ៉ែ ការកាប់ព្រៃឈើ ការកាយយកថ្មភ្នំ និងក្រួសជាដើមឱ្យមានប្រសិទ្ធភាពខ្ពស់និងបន្តតាមដាន សហការអនុវត្តការពារដែនអភិរក្សបរិស្ថាន តំបន់ប្រើប្រាស់ច្រើនយ៉ាងសំឡូតឱ្យម៉ត់ចត់ និងទប់ស្កាត់បទល្មើសឱ្យខាងតែបាន។

លោកអភិបាលខេត្ត បន្តណែនាំដល់អាជ្ញាធរ បន្តអប់រំប្រជាពលរដ្ឋ ថែរក្សាអនាម័យបរិស្ថាន មិនត្រូវដុតសំរាមនាំឱ្យមានផ្សែងបំពុលបរិស្ថាន ព្រមទាំងបញ្ឈប់ការចាក់គ្រឿងបំពងសំឡេងរំខានខ្លាំងជាដើម។

លោក សុខ លូ ជំរុញឱ្យអាជ្ញាធរត្រូវបន្តអនុវត្តយុទ្ធនាការផ្ទះមួយខ្នងដើមឈើមួយដើមដោយបង្កើនការដាំដើមឈើឱ្យបានច្រើននៅតាមទីប្រជុំជន និងទីសាធារណៈនានាក្នុងមូលដ្ឋានរបស់ខ្លួន៕