(ណាននីង)៖ ក្នុងស្មារតីពង្រឹងចំណងមិត្តភាពដែកថែប និងពង្រីកទំហំពាណិជ្ជកម្មទ្វេភាគី អ្នកឧកញ៉ា លី ឃុនថៃ ប្រធានសមាគមសហព័ន្ធអ្នកវិនិយោគកម្ពុជា នាថ្ងៃទី០៩ ខែមករា ឆ្នាំ២០២៦ បានដឹកនាំគណៈប្រតិភូជាន់ខ្ពស់ចូលរួមក្នុង «សន្និសីទសហប្រតិបត្តិការ ពាណិជ្ជកម្មកសិកម្ម កម្ពុជា-ចិន» នៅទីក្រុងណាននីង សាធារណរដ្ឋប្រជាមានិតចិន ដើម្បីស្វែងរកឱកាសវិនិយោគថ្មីៗ ពិសេសលើវិស័យចិញ្ចឹមសត្វ និងការនាំចេញ-នាំចូលផលិតផលកសិកម្ម។

ក្នុងសុន្ទរកថានាឱកាសនោះ អ្នកឧកញ៉ា លី ឃុនថៃ បានបង្ហាញការចាប់អារម្មណ៍យ៉ាងខ្លាំង លើសក្តានុពល កសិកម្មនៃតំបន់ស៊ីអ៊ូជូមូឈីន ជាពិសេសផលិតផល «កូនចៀមអ៊ូជីមឈីន» ដែលជាម៉ាកផលិតផលកសិកម្ម ដ៏ល្បីល្បាញរបស់ចិន។ លោកបានបញ្ជាក់ថា កម្ពុជាកំពុងមានតម្រូវការខ្ពស់លើសាច់សត្វដែលមានស្តង់ដារអនាម័យ និងគុណភាពខ្ពស់ ដើម្បីឆ្លើយតបទៅនឹងកំណើនសេដ្ឋកិច្ច និងកម្រិតជីវភាពរបស់ប្រជាពលរដ្ឋ ដែលកាន់តែប្រសើរឡើង។

សម្រាប់ទិសដៅយុទ្ធសាស្ត្រ និងការតភ្ជាប់តំបន់អាស៊ាន អ្នកឧកញ៉ា លី ឃុនថៃ បានគូសបញ្ជាក់ពីចំណុចគន្លឹះចំនួន ៣ ដើម្បីជំរុញ កិច្ចសហប្រតិបត្តិការនេះ ឱ្យសម្រេចបានលទ្ធផលជាក់ស្តែង៖

*ការតភ្ជាប់ទីផ្សារ៖ ប្រើប្រាស់កម្ពុជាជាមជ្ឈមណ្ឌលចែកចាយផលិតផលកសិកម្មចិន ទៅកាន់ទីផ្សារអាស៊ាន ដែលមានអតិថិជនជាង ៦០០ លាននាក់។

*ការទាក់ទាញការវិនិយោគ៖ លើកទឹកចិត្តឱ្យសហគ្រាសចិនមកបង្កើតរោងចក្រកែច្នៃ និងឡូជីស្ទិកនៅកម្ពុជា ដើម្បីពង្រឹងខ្សែច្រវាក់ផ្គត់ផ្គង់ក្នុងស្រុក។

*យន្តការទំនាក់ទំនងរយៈពេលវែង៖ បង្កើតប្រព័ន្ធទំនាក់ទំនងទៀងទាត់រវាងសមាគម និងភាគីចិន ដើម្បីសម្របសម្រួល ពាណិជ្ជកម្ម និងដោះស្រាយបញ្ហាប្រឈមនានា។

អ្នកឧកញ៉ា លី ឃុនថៃ បានសង្កត់ធ្ងន់ថា ក្រោមក្របខ័ណ្ឌនៃកិច្ចព្រមព្រៀង RCEP និងគម្រោងយុទ្ធសាស្ត្រ «ផ្លូវ និងខ្សែក្រវាត់» កិច្ចសហប្រតិបត្តិការនេះ នឹងក្លាយជាកម្លាំងចលករថ្មីមួយក្នុងការជំរុញសេដ្ឋកិច្ច។ លោកបានបន្តថា៖ «យើងនឹងរួមគ្នាធ្វើឱ្យផលិតផលកសិកម្មដ៏ល្អឥតខ្ចោះពីទឹកដីចិន មកបំពេញតម្រូវការនៅកម្ពុជា និងរីកសាយភាយទៅទូទាំងតំបន់អាស៊ាន»។

សន្និសីទនេះ បានបញ្ចប់ទៅដោយផ្លែផ្កាដែលឆ្លុះបញ្ចាំងពីការប្តេជ្ញាចិត្តយ៉ាងមុតមាំរបស់សមាគមសហព័ន្ធអ្នកវិនិយោគកម្ពុជា ក្នុងការនាំមកនូវបច្ចេកវិទ្យា និងផលិតផលថ្មីៗ ដើម្បីបម្រើដល់ការអភិវឌ្ឍសេដ្ឋកិច្ចជាតិ៕