ឧបនាយករដ្ឋមន្ត្រី ស៊ុន ចាន់ថុល ផ្តល់បទសម្ភាសន៍ជូនភ្នាក់ងារសារព័ត៌មានកម្រិតពិភពលោក Nikkei Asia
13-01-2026 20:52
(ភ្នំពេញ)៖ នៅថ្ងៃអង្គារ ទី១៣ ខែមករា ឆ្នាំ២០២៦នេះ លោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា បានផ្តល់កិច្ចសម្ភាសន៍ពិសេសជូនភ្នាក់ងារសារព័ត៌មាន Nikkei Asia ដែលជាស្ថាប័នព័ត៌មានសេដ្ឋកិច្ច និងនយោបាយឈានមុខគេមួយនៅអាស៊ី និងជាសំឡេងដ៏មានឥទ្ធិពលក្នុងចំណោមវិនិយោគិន និងអ្នកកំណត់គោលនយោបាយជុំវិញពិភពលោក។
ការជ្រើសរើសផ្តល់កិច្ចសម្ភាសន៍ជូន Nikkei Asia ដែលជាស្ថាប័នល្បីល្បាញខាង វិភាគស៊ីជម្រៅលើច្រវាក់ផ្គត់ផ្គង់សកល និងភូមិសាស្ត្រនយោបាយ គឺជាយុទ្ធសាស្ត្រដ៏សំខាន់ក្នុងការបញ្ជូនសារស្តីពីការបង្កើនភាពជឿជាក់ កាលានុវត្តភាព និងឧត្តមភាពរបស់កម្ពុជាទៅកាន់មជ្ឈដ្ឋានធុរកិច្ចអន្តរជាតិ។
ក្នុងកិច្ចសម្ភាសន៍នោះ លោកឧបនាយករដ្ឋមន្ត្រី ស៊ុន ចាន់ថុល បានលើកឡើងចំណុចគន្លឹះមួយចំនួនរួមមាន៖
១៖ បច្ចុប្បន្នភាពនៃបរិយាកាសវិនិយោគនៅកម្ពុជា៖ លោកឧបនាយករដ្ឋមន្ត្រី បានបង្ហាញពីភាពរឹងមាំនៃស្ថិរភាពនយោបាយ និងច្បាប់វិនិយោគដែលមានភាពបត់បែន និងផ្តល់នូវកញ្ចប់លើកទឹកចិត្តប្រកបដោយភាពទាក់ទាញបំផុតសម្រាប់ការវិនិយោគដោយផ្ទាល់ពីបរទេស។
២៖ ការធ្វើពិពិធកម្មរចនាសម្ព័ន្ធឧស្សាហកម្ម៖ លោកឧបនាយករដ្ឋមន្ត្រី បានលើកពីរបត់នៃការវិនិយោគដែលកំពុងផ្លាស់ប្តូរពីឧស្សាហកម្មកាត់ដេរ ឆ្ពោះទៅកាន់ឧស្សាហកម្មដែលមានតម្លៃបន្ថែមខ្ពស់មានជាអាទិ៍ ឧស្សហកម្មបង្គុំគ្រឿងអេឡិកត្រូនិច, ឧស្សាហកម្មកែច្នៃចំណីអាហារ និងឧស្សាហកម្មយានយន្តជាដើម។
៣៖ ភាពធន់ក្នុងបរិការណ៍ប្រែប្រួលនៃពិភពលោក៖ លោកឧបនាយករដ្ឋមន្ត្រី បានបង្ហាញពីការត្រៀមលក្ខណៈរបស់កម្ពុជា តាមរយៈការកសាងហេដ្ឋារចនាសម្ព័ន្ធនានា ការបណ្តុះបណ្តាលកម្លាំងពលកម្មជំនាញ និងការបង្កើនការចាប់យកឌីជីថលូបនីយកម្មលើកំណែទម្រង់សេវាសាធារណៈ ដើម្បីឆ្លើយតបនឹងការប្រែប្រួលឥតឈប់ឈរនៃសេដ្ឋកិច្ចសកល។
៤៖ យុទ្ធសាស្ត្រព្រំដែន និងស្ថិរភាពតំបន់៖ លោកឧបនាយករដ្ឋមន្ត្រី បានបញ្ជាក់ពីជំហរការទូត និងយុទ្ធសាស្ត្រឆ្លើយតបនឹងបញ្ហាព្រំដែនកម្ពុជា-ថៃ ដោយផ្តោតលើការកសាងតំបន់ព្រំដែនសន្តិភាព និងកិច្ចសហប្រតិបត្តិការសេដ្ឋកិច្ចដែលផ្តល់ផលប្រយោជន៍ឱ្យគ្នាទៅវិញទៅមក។
កិច្ចសម្ភាសន៍នេះ គឺជាសក្ខីភាពនៃការបើកចំហ និងការត្រៀមខ្លួនជាស្រេចរបស់រាជរដ្ឋាភិបាលកម្ពុជា ក្រោមការដឹកនាំប្រកបដោយទស្សនវិស័យមុតស្រួចរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក្នុងការធ្វើការងារយ៉ាងជិតស្និទ្ធជាមួយដៃគូអន្តរជាតិ ជាពិសេសតាមរយៈបណ្តាញព័ត៌មានដែលមានវិជ្ជាជីវៈខ្ពស់ដូចជា Nikkei Asia ដើម្បីបង្កើនទំនុកចិត្ត សំដៅទាក់ទាញទុនវិនិយោគប្រកបដោយគុណភាព សម្រាប់ជំរុញកំណើនសេដ្ឋកិច្ចជាតិប្រកបដោយចីរភាព និងសម្រេចឱ្យបាននូវ ចក្ខុវិស័យកម្ពុជាឆ្នាំ២០៥០ ជាប្រទេសមានចំណូលខ្ពស់៕
