(ភ្នំពេញ)៖ ក្នុងកិច្ចខិតខំប្រឹងប្រែងរកដំណោះស្រាយព្រំដែនឱ្យបានឆាប់រហ័ស រាជរដ្ឋាភិបាលកម្ពុជា តាមរយៈរដ្ឋលេខាធិការដ្ឋានកិច្ចការព្រំដែន បានផ្ញើកំណត់ទូតទៅភាគីថៃ ដើម្បីជំរុញកិច្ចការនេះ ដោយស្នើសាជាថ្មីទៅភាគីថៃ កាលពីថ្ងៃទី១៣ ខែមករា ឆ្នាំ២០២៦ ដូចតទៅ៖

១- ស្នើចាត់បញ្ជូនក្រុមការងារវាស់វែងចម្រុះភាគីកម្ពុជា-ថៃ ដើម្បីបន្តអនុវត្តការងារបោះបង្គោលបណ្តោះអាសន្ននៅកំណាត់ខ្សែព្រំដែនចន្លោះបង្គោលលេខ៤២-៤៧ និងបង្គោលលេខ ៥២-៥៩ នៅពេលវេលាសមស្របណាមួយចន្លោះពីថ្ងៃទី១៩ ដល់ថ្ងៃទី២៣ ខែមករា ឆ្នាំ២០២៦។

២- ស្នើចាត់ក្រុមវាស់វែងចម្រុះនៃភាគីទាំងពីរ ចុះធ្វើការលើដីជាក់ស្តែងនៅចុងខែមករា ឆ្នាំ២០២៦នេះ ដើម្បីសាងសង់ឡើងវិញនូវបង្គោលព្រំដែនចំនួន១៥ តាមគំរូដើមបង្គោលជំនាន់បារាំង នៅទីតាំងដើមពិតប្រាកដដែលភាគីទាំងពីរបានឯកភាពគ្នា។

រដ្ឋលេខាធិការដ្ឋានកិច្ចការព្រំដែនបញ្ជាក់ថា ការចាត់បញ្ជូនក្រុមវាស់វែងចម្រុះដើម្បីបន្តចុះធ្វើលើដីជាក់ស្តែងគឺធ្វើឡើងស្របតាមនីតិវិធីនិងបែបបទការងារ ដែលបានឯកភាពគ្នា និងស្របតាមខ្លឹមសារកំណត់ហេតុកិច្ចប្រជុំពិសេស JBC កម្ពុជា-ថៃ ក៏ដូចជាសេចក្តីប្រកាសរួម GBC នៅថ្ងៃទី២៧ ខែធ្នូ ឆ្នាំ២០២៥ ត្រង់ចំណុចទី៣។

គូសបញ្ជាក់ថា ក្រុមវាស់វែងចម្រុះនៃភាគីទាំងពីរកម្ពុជា-ថៃ បានចាប់ផ្ដើមធ្វើការវាស់វែង និងបោះបង្គោលបណ្តោះអាសន្ន នៅកំណាត់ខ្សែព្រំដែនចន្លោះបង្គោលលេខ ៤២-៤៧ កាលពីថ្ងៃទី១៩ ខែវិច្ឆិកា ឆ្នាំ២០២៥ និងនៅកំណាត់ខ្សែព្រំដែនចន្លោះបង្គោលលេខ ៥២-៥៩ កាលពីថ្ងៃទី៨ ខែវិច្ឆិកា ឆ្នាំ២០២៥ ហើយ៕