(សៀមរាប)៖ រដ្ឋាភិបាលសាធារណរដ្ឋកូរ៉េ តាមរយៈទីភ្នាក់ងារសហប្រតិបត្តិការ​អន្តរជាតិ​កូរ៉េ (KOICA) ដោយសហការជាមួយអាជ្ញាធរបេតិកភណ្ឌកូរ៉េ (Korea Heritage Agency – KHA) ក្រសួងវប្បធម៌ និងវិចិត្រសិល្បៈ និងអាជ្ញាធរជាតិអប្សរា បានរៀប​ចំសិក្ខាសាលាចែករំលែកលទ្ធផលចុងក្រោយនៃគម្រោង «ការអភិរក្ស និងជួស​ជុល​ប្រា​សាទចម និងជញ្ជាំងដំរី» នៅខេត្តសៀមរាប ប្រទេសកម្ពុជា។

សិក្ខាសាលានេះត្រូវបានរៀបចំឡើងក្នុងគោលបំណងចែករំលែកសមិទ្ធផលសំខាន់ៗនៃគម្រោង ដែលបានអនុវត្តក្នុងអំឡុងឆ្នាំ២០១៩ ដល់ ឆ្នាំ២០២៦ និងពិចារណា​លើលទ្ធ​ផល​នៃកិច្ចសហប្រតិបត្តិការរវាងកម្ពុជា-កូរ៉េ ក្នុងកិច្ចការពារ និងថែរក្សាតំបន់បេតិក​ភណ្ឌ​ពិភពលោកក្នង់តំបន់អង្គរព្រមទាំងទិសដៅអនាគតសម្រាប់ការអភិរក្សបេតិកភណ្ឌវប្បធម៌ប្រកបដោយចីរភាព។

លោកស្រី ជយ មូនជុង (Ms. Choi Moon Jung) នាយិកាការិយាល័យ KOICA ប្រចាំ​កម្ពុជា បន្ទាប់មកជាសុន្ទរកថា ស្វាគមន៍ពីលោក គីម ដុងហា (Mr. Kim Dong-ha) នាយកប្រតិបត្តិផ្នែកផែនការគ្រប់គ្រង នៃអាជ្ញាធរបេតិកភណ្ឌកូរ៉េ (KHA)។

លោក គីម ចាងយ៉ុង (H.E. Kim Chang Yong) ឯកអគ្គរដ្ឋទូតសាធារណរដ្ឋកូរ៉េ​ប្រចាំកម្ពុជា បានបង្ហាញពីសារៈសំខាន់នៃកិច្ចសហប្រតិបត្តិការទ្វេភាគី ក្នុងការការពារ និងការគ្រប់គ្រងប្រកបដោយចីរភាព នៃតំបន់បេតិកភណ្ឌពិភពលោកអង្គរ។

លោកឯកអគ្គរដ្ឋទូត គីម បានលើកឡើងថា គម្រោងនេះបានបង្ហាញពីតម្លៃ​នៃកិច្ច​សហ​ប្រតិ​បត្តិការរវាងកម្ពុជា និងកូរ៉េ ក្នុងការអភិរក្សបេតិកភណ្ឌវប្បធម៌ ហើយលោក​បាន​បង្ហាញ​ក្តីសង្ឃឹមថា សន្និសីទនេះនឹងក្លាយជាមូលដ្ឋានសម្រាប់​ការសហការ​បន្ត​ទៅ​មុខ​ទៀត។

លោក ហង់ ពៅ អគ្គនាយកនៃអាជ្ញាធរជាតិអប្សរា បានថ្លែងអំណរគុណ​ដល់អ្នកចូល​រួម​ទាំងអស់ និងបានលើកឡើងពីសារៈសំខាន់នៃការអភិរក្សប្រាសាទព្រះពិធូរ និងលានដំរី ដោយបញ្ជាក់ថា គម្រោងនេះបានពង្រឹងសមត្ថភាពអ្នកជំនាញកម្ពុជា តាមរយៈការ​រួម​បញ្ចូល​ជំនាញពីកូរ៉េ និងជំនាញមូលដ្ឋាន។ លោក ហង់ ពៅ ក៏បានបង្ហាញក្តីសង្ឃឹម​ចំពោះ​ការបន្តកិច្ចសហប្រតិបត្តិការដោយផ្អែកលើទំនុកចិត្តទៅវិញទៅមកផងដែរ។

សិក្ខាសាលានេះបានប្រមូលផ្តុំអ្នកតំណាងជាន់ខ្ពស់ពីប្រទេសទាំងពីររួមមានមន្ត្រីមកពីស្ថានទូតសាធារណរដ្ឋកូរ៉េ KOICA អាជ្ញាធរបេតិកភណ្ឌកូរ៉េ ក្រសួងវប្បធម៌ និងវិចិត្រ​សិល្បៈ និងអាជ្ញាធរជាតិអប្សរា ព្រមទាំងអ្នកជំនាញជាតិ និងអន្តរជាតិផ្នែក​អភិរក្ស​បេតិ​ក​ភណ្ឌវប្បធម៌។

តាមរយៈគម្រោងនេះ ការងារអភិរក្ស និងជួសជុលប្រាសាទចម និងផ្នែកមួយចំនួន​នៃ​ទីលានជល់ដំរី ត្រូវបានបញ្ចប់ដោយជោគជ័យ ដោយបានពង្រឹងស្ថិរភាពរចនាសម្ព័ន្ធ ខណៈដែលនៅតែរក្សាបាននូវតម្លៃប្រវត្តិសាស្ត្រ វប្បធម៌ និងស្ថាបត្យកម្មដ៏សំខាន់​របស់​បេតិកភណ្ឌទាំងនេះ។ លើសពីនេះ គម្រោងក៏បានផ្តល់ឧបករណ៍អភិរក្ស និងវិភាគ​ទំនើប​ៗ សម្រាប់ការប្រើប្រាស់រួមរវាងអាជ្ញាធរជាតិអប្សរា និងក្រុមអភិរក្សអន្តរជាតិ ដោយបាន​រួមចំណែកពង្រឹងសមត្ថភាពបច្ចេកទេសសម្រាប់ការអភិរក្សបេតិកភណ្ឌនៅកម្ពុជា។ គម្រោង​នេះក៏បានផ្តោតសំខាន់លើការអភិវឌ្ឍធនធានមនុស្សផងដែរ។

អ្នកជំនាញផ្នែកបេតិកភណ្ឌជាង ១៥០នាក់ បានទទួលអត្ថប្រយោជន៍ពីកម្ម​វិធីកសាង​សមត្ថភាព រួមមានការបណ្តុះបណ្តាល ការណែនាំ និងវគ្គបណ្តុះបណ្តាល​តាមការ​អញ្ជើញ ខណៈដែលដំណើរទស្សនកិច្ចតាមទីតាំងនិងការបង្ហាញបច្ចេកទេស បានចូល​រួមដោយអ្នកចូលរួមសរុបចំនួន ៥៦០នាក់។ កិច្ចខិតខំទាំងនេះបានគាំទ្រ​ដល់ការ​ផ្ទេរ​ចំណេះដឹងបច្ចេកទេស និងរួមចំណែកដល់ភាព​ចីរភាពនៃការអភិរក្សបេតិកភណ្ឌលើស​ពីការងារអភិរក្សផ្ទាល់។

សិក្ខាសាលា​នេះ​បានបញ្ជាក់ឡើងវិញថា គម្រោងនេះ ដែលបានអនុវត្តតាម​រយៈកិច្ច​សហ​ការយ៉ាងជិតស្និទ្ធរវាងរដ្ឋាភិបាលសាធារណរដ្ឋកូរ៉េ និងស្ថាប័នដៃគូរបស់កម្ពុជា គឺជាគំរូ​មួយនៃកិច្ចសហប្រតិបត្តិការអភិវឌ្ឍអន្តរជាតិ ក្នុងវិស័យអភិរក្សបេតិកភណ្ឌវប្បធម៌។

KOICA នឹងបន្តធ្វើការជិតស្និទ្ធជាមួយកម្ពុជា ដើម្បីពង្រឹងសមត្ថភាព​អភិរក្ស​បេតិ​កភណ្ឌ​វប្បធម៌ និងគាំទ្រដល់ការការពារបេតិកភណ្ឌពិភពលោកក្នុងរយៈពេលវែង តាមរយៈ​កិច្ច​សហប្រតិបត្តិការអភិវឌ្ឍប្រកបដោយចីរភាព៕