(សៀមរាប)៖ អាជ្ញាធរជាតិអប្សរា នៅថ្ងៃទី១៦ ខែមករា ឆ្នាំ២០២៥នេះ បានចេញសេចក្តីជូនដំណឹង ស្តីពី ការបិទចរាចរណ៍បណ្តោះអាសន្ននៅស្ពានហាលខាងលិចប្រាសាទអង្គរវត្ត ដើម្បីរៀបចំកម្មវិធី «សំណេរអង្គរ» លើកទី៣ ដែលនឹងប្រព្រឹត្តិទៅចំនួន ២ថ្ងៃ គិតចាប់ពីថ្ងៃទី១៧ ដល់ ថ្ងៃទី១៨ ខែមករា ឆ្នាំ២០២៦ ខាងមុខនេះ។

តាមរយៈសេចក្ដីជូនដំណឹងរបស់អាជ្ញាធរជាតិអប្សរា បានបញ្ជាក់ថា អាជ្ញាធរជាតិអប្សរានឹងបិទការ ធ្វើចរាចរណ៍ជាបណ្តោះអាសន្ននៅស្ពានហាលខាងលិចប្រាសាទអង្គរវត្ត ចំនួន២ថ្ងៃ គិតចាប់ពីថ្ងៃទី១៧ ដល់ ថ្ងៃទី១៨ ខែមករា ឆ្នាំ២០២៦ ដើម្បីអនុញ្ញាតជូនក្រសួងអប់រំ យុវជន និងកីឡា ក្រសួងវប្បធម៌ និងវិចិត្រសិល្បៈ ក្រសួងទេសចរណ៍ និងស្ថាប័នពាក់ព័ន្ធរៀបចំការប្រឡងប្រជែងសរសេរតាមអាន «សំណេរអង្គរ» លើកទី៣ ក្នុងគោលបំណងចូលរួមចំណែកផ្សព្វផ្សាយ និងលើកកម្ពស់អក្សរសាស្ត្រខ្មែរ។ ក្នុងអំឡុងពេលនៃការបិទចរាចរណ៍ខាងលើនេះ ភ្ញៀវទេសចរជាតិ-អន្តរជាតិ ព្រមទាំងសាធារណជនទាំងអស់ អាចប្រើប្រាស់ស្ពានបណ្តែតទឹក ជាបណ្តោះអាសន្ន សម្រាប់ការចេញ-ចូលទស្សនាប្រាសាទអង្គរវត្ត។

សូមជម្រាបថា ព្រឹត្តិការណ៍សំណេរអង្គរ មានបេក្ខជន និងបេក្ខសមណ ដាក់ពាក្យប្រឡង ចំនួន ១៨៦០នាក់/អង្គ។ ក្នុងចំណោមនោះ មានវត្តមាន ព្រះសង្ឃចំនួន ២៣១ អង្គ ខណៈបេក្ខជនចាស់ជាងគេមានអាយុ ៨២ ឆ្នាំ និងក្មេងជាងគេមានអាយុ ៥ ឆ្នាំ។ ចំនួននេះកើនឡើងច្រើន បើធៀបនឹងការប្រកួតពីរលើកកន្លងមក។

កម្មវិធីសំណេរអង្គរ ត្រូវបានរៀបចំជាបន្តបន្ទាប់រយៈពេល ៣ ឆ្នាំមកហើយ ដែលកើតចេញពីគំនិត និងឆន្ទៈរបស់មួយក្រុមមកពីស្ថាប័នឯកជន និងរដ្ឋដែលជាអ្នកស្រលាញ់ អភិរក្ស និងលើកស្ទួយអក្សរសាស្រ្តជាតិ។ ការបង្កើតកម្មវិធីនេះឡើង មិនមែនដើម្បីស្វែងរកប្រាក់ចំណេញឡើយ ពោលមានគោលបំណងរួមតែមួយគត់ គឺថែរក្សាមរតកអត្តសញ្ញាណអក្សរសាស្ត្រជាតិឱ្យគង់វង្ស៕