(ស្វាយរៀង)៖ លោក ប៉េង ពោធិ៍សា អភិបាលខេត្តស្វាយរៀង បានថ្លែងថា ការកសាងផែនការវិនិយោគ៣ឆ្នាំរំកិល ពិតជាមានសារៈសំខាន់ព្រោះវាស្ថិតនៅក្នុងសំណូមពរ និងតម្រូវការជាក់ស្តែងដែលប្រជាពលរដ្ឋ បានលើកឡើងក្នុងវេទិកាសាធារណៈ ដែលរដ្ឋបាលខេត្តបានរៀបចំបើកវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តនាពេលកន្លងទៅ។

លោកបានបន្តថា វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត ក៏បានលើកឡើងអំពីបញ្ហាប្រឈម ក្តីកង្វល់ និងសំណូមពរ ដែលជាតម្រូវការចាំបាច់ជាក់ស្តែងក្នុងមូលដ្ឋាន សម្រាប់ជាប្រយោជន៍ដល់សហគមន៍ ក៏ដូចជាប្រយោជន៍សាធារណៈរបស់ប្រជាពលរដ្ឋចង់បាន រួមមាន ផ្លូវថ្នល់ ប្រឡាយទឹក បណ្តាញអគ្គិសនី ទឹកស្អាត ទីផ្សារកសិកម្ម និងតម្រូវការសំខាន់ផ្សេងៗទៀត ដែលជាធាតុចូលនៅក្នុងការធ្វើផែនការវិនិយោគ៣ឆ្នាំរំកិល ហើយចងក្រងជាសៀវភៅដែលកិច្ចប្រជុំបានពិនិត្យក្នុងកិច្ចប្រជុំនៅថ្ងៃនេះផងដែរ។

ការថ្លែងលើកឡើងរបស់អភិបាលខេត្តស្វាយរៀងយ៉ាងដូច្នេះ បានធ្វើឡើងនៅក្នុងកិច្ចប្រជុំស្តីពីការពិនិត្យ និងផ្តល់យោបល់លើសេចក្តីព្រាងសៀវភៅកម្មវិធីវិនិយោគបីឆ្នាំរំកិល ២០២៦-២០២៨ ខេត្តស្វាយរៀង នាព្រឹកថ្ងៃទី១៦ ខែមករា ឆ្នាំ២០២៦។

កិច្ចប្រជុំនេះមានការចូលរួមពីលោកសមាជិកក្រុមប្រឹក្សាខេត្ត លោក លោកស្រី អភិបាលរងខេត្ត លោកនាយករងរដ្ឋបាលសាលាខេត្ត លោក លោកស្រី ប្រធានមន្ទីរអង្គភាពនានាក្នុងខេត្ត លោកអភិបាលក្រុង ស្រុកទាំង៨ លោក លោកស្រីនាយកទីចាត់ការអង្គភាពចំណុះសាលាខេត្ត លោកស្រីអនុប្រធានសមាគមក្រុមប្រឹក្សាថ្នាក់មូលដ្ឋានខេត្ត និងតំណាងគណៈកម្មាធិការពិគ្រោះយោបល់កិច្ចការស្ត្រី និងកុមាររបស់ក្រុមប្រឹក្សាខេត្ត។

លោកបានបន្ថែមថា កម្មវិធីវិនិយោគ៣ឆ្នាំរំកិលខេត្តស្វាយរៀង គឺជាឯកសារផែនការមួយដ៏មានសារសំខាន់បំផុតដែលបានប្រមូលផ្តុំគំនិត និងធនធានទាំងឡាយ ដើម្បីរៀបចំជាគម្រោងវិនិយោគសាធារណៈជាក់ស្ដែង សម្រាប់អនុវត្ត និងការគៀងគរប្រភពទុនដទៃទៀត ជំរុញដល់ការអភិវឌ្ឍខេត្តឲ្យបានកាន់តែឆាប់រហ័ស និងទាន់ពេលវេលា សំដៅឆ្លើយតបនូវតម្រូវការរបស់ប្រជាពលរដ្ឋនៅទូទាំងខេត្ត ដែលចេះតែកើនឡើងពីមួយឆ្នាំទៅមួយឆ្នាំ។

លើសពីនេះ សំដៅជំរុញឲ្យសម្រេចបាននូវចក្ខុវិស័យ គោលដៅ និងគោលបំណង នៃផែនការអភិវឌ្ឍន៍ខេត្តស្វាយរៀង ក្នុងរយៈពេល៥ឆ្នាំទៀតផង ដោយអាស្រ័យលើការរៀបចំកសាង និងចាត់ចែងអនុវត្តនូវកម្មវិធីវិនិយោគ៣ឆ្នាំរំកិលខេត្ត ប្រកបដោយភាពសុក្រឹត្យ ដោយផ្អែកលើធនធាន ឱកាស និងពេលវេលាដែលមានជាក់ស្តែង៕