(ម៉ាឡេស៊ី)៖ lokបណ្ឌិត អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស នៅថ្ងៃទី១៦ ខែមករា ឆ្នាំ២០២៦ បានអញ្ជើញជួបពិភាក្សាការងារជាមួយលោក Dato' Mohamad Zaki S. Ahmad ប្រធានមូលនិធិ Yayasan Taqwa ដោយមានការចូលរួមពី Tuan Haji Abdullah Zuhdee bin Ab. Halim នាយកប្រតិបត្តិ Yayasan Taqwa ក្នុងគោលបំណងពង្រឹងកិច្ចសហប្រតិបត្តិការ លើវិស័យអប់រំ ជំនួយមនុស្សធម៌ និងសង្គមកិច្ច។

ក្នុងជំនួបនោះ លោកទេសរដ្ឋមន្ត្រី អូស្មាន ហាស្សាន់ បានលើកឡើងពីវឌ្ឍនភាពរបស់កម្ពុជា និងការអភិវឌ្ឍក្នុងសហគមន៍ឥស្លាម ព្រមទាំងគោលនយោបាយសុខដុមនីយកម្មជាតិសាសន៍ និងសាសនា នៅកម្ពុជា។

លោកបានបន្តថា នៅឆ្នាំ២០១៥ រាជរដ្ឋាភិបាលក្រោមការដឹកនាំដ៏ខ្ពង់ខ្ពស់ របស់សម្តេចតេជោ ហ៊ុន សែន អតីតនាយករដ្ឋមន្ត្រី និងជាបច្ចុប្បន្នជាប្រធានព្រឹទ្ធសភា និងបន្តមកសម្តេចធិបតី ហ៊ុន ម៉ាណែត នាយករដ្ឋមន្ត្រី បានផ្ដល់ក្របខណ្ឌគ្រូបង្រៀនខ្មែរឥស្លាមចំនួន១៥០០នាក់ និងគ្រូជាប់កិច្ចសន្យាចំនួន១៧៨ នាក់ នៃក្របខណ្ឌក្រសួងអប់រំ យុវជន និងកីឡា ដើម្បីទទួលបានប្រាក់បៀវត្ស និងផលប្រយោជន៍ដូចគ្រូទូទៅ ប៉ុន្តែបច្ចុប្បន្ននៅមានគ្រូស្ម័គ្រចិត្តជាង ១ពាន់នាក់ទៀត ដែលកំពុងបង្រៀនទៅតាមសហគមន៍ ដែលពួកគាត់រស់នៅ ហើយពួកគាត់ទទួលបានប្រាក់ឧបត្ថម្ភពីអាណាព្យាបាលសិស្ស តិចតួចប៉ុណ្ណោះ។

ក្នុងន័យនេះ លោកទេសរដ្ឋមន្ត្រី អូស្មាន ហាស្សាន់ បានស្នើមូលនិធិសប្បុរសធម៌ Yayasan Taqwa ជួយគាំទ្រដល់គ្រូបង្រៀនខ្មែរឥស្លាមស្ម័គ្រចិត្តខាងលើ ដើម្បីលើកកម្ពស់វិស័យអប់រំឥស្លាម ក្នុងសហគមន៍ និងជួយគាំទ្រផ្នែកមនុស្សធម៌ សម្រាប់សហគមន៍ឥស្លាមកម្ពុជា។

ជាការឆ្លើយតប លោកប្រធានមូលនិធិ Yayasan Taqwa បានសម្តែងនូវការអបអរសាទរចំពោះវឌ្ឍនភាពរបស់កម្ពុជា និងបានបញ្ជាក់ជំហរបន្តគាំទ្រលើវិស័យមនុស្សធម៌ និងអប់រំ ក៏ដូចជាសន្យា នឹងធ្វើពង្រឹងកិច្ចសហប្រតិបត្តិការ ជាមួយភាគីកម្ពុជា ដើម្បីជំរុញការងារឲ្យមានប្រសិទ្ធភាព នាពេលខាងមុខ។

សូមជម្រាបថា មូលនិធិសប្បុរសធម៌ Yayasan Taqwa គឺជាស្ថាប័នស្ថិតក្រោមការគ្រប់គ្រងរបស់ ក្រុមប្រឹក្សាសាសនាឥស្លាមរដ្ឋសហព័ន្ធម៉ាឡេស៉ី (MAIWP) ដែលផ្តោតសំខាន់លើការផ្សព្វផ្សាយសាសនា សុខុមាលភាព និងការអប់រំ មានស្នាក់ការកណ្តាល ស្ថិតនៅក្នុងទីក្រុងកូឡាឡាំពួ ប្រទេសម៉ាឡេស៉ី៕