(ព្រះសីហនុ)៖ រដ្ឋបាលខេត្តព្រះសីហនុបានបង្ហាញទីតាំងអាជីវកម្ម ក្រុមហ៊ុនតូចធំ ជាច្រើនកន្លែងក្នុងខេត្ត ដែលជាឱកាសល្អសម្រាប់ពលករខ្មែរដែលត្រឡប់មកពីប្រទេសថៃ និងបងប្អូននៅក្នុងស្រុក កំពុងជួបប្រទះខ្វះខាតការងារ។

លោក ម៉ាង ស៊ីណេត អភិបាលខេត្តព្រះសីហនុ នៅថ្ងៃទី១៦ ខែមករា ឆ្នាំ២០២៦ បានឲ្យដឹងថា ក្រោមការសម្របសម្រួលរបស់រដ្ឋបាលខេត្តព្រះសីហនុ ជាមួយមន្ទីរការងារ និងបណ្តុះបណ្តាលវិជ្ជាជីវៈខេត្ត បានបង្ហាញថា ទូរទាំងខេត្តព្រះសីហនុនាពេលបច្ចុប្បន្ននេះ ឱកាសការងារចំនួន១៦៥៩កន្លែង សម្រាប់ពលរដ្ឋខ្មែរ ជាពិសេសពលករដែលត្រឡប់មកពីប្រទេសថៃ ដែលមានបំណងស្វែងរកការងារធ្វើនៅខេត្តព្រះសីហនុ។

លោកថា «នេះបង្ហាញឲ្យឃើញថា ក្រោមការយកចិត្តទុកដាក់របស់រាជរដ្ឋាភិបាលកម្ពុជា ក្រសួងពាក់ព័ន្ធ ជាពិសេស ថ្នាក់ដឹកនាំខេត្តគ្រប់ជាន់ថ្នាក់ បានស្វះស្វែងសម្របសម្រួលជាមួយទីតាំងអាជីវកម្ម ក្រុមហ៊ុននានា ដើម្បីបានការងារជូនពលរដ្ឋខ្មែររកប្រាក់ចំណូលផ្គត់ផ្គង់គ្រួសារបន្ថែម»៕