ដល់ថ្ងៃកំណត់បញ្ឈប់ការលក់ដូរនៅតាមចិញ្ចើមផ្លូវ និងទ្រូងផ្លូវនៅតំបន់ជុំវិញផ្សារដើមគ! អ្នកនាំពាក្យសាលារាជធានីភ្នំពេញ អំពាវនាវអាជីវករទៅលក់នៅផ្សារដើមគរថ្មី ចាប់ពីថ្ងៃស្អែកនេះតទៅ
17-01-2026 16:19
(ភ្នំពេញ)៖ នៅថ្ងៃទី១៧ ខែមករា ឆ្នាំ២០២៦នេះ គឺជាថ្ងៃចុងក្រោយហើយ ដែលជាការកំណត់របស់រដ្ឋបាលរាជធានីភ្នំពេញ ដើម្បីបញ្ឈប់ការលក់ដូរនៅតាមចិញ្ចើមផ្លូវ និងទ្រូងផ្លូវ នៅតំបន់ជុំវិញផ្សារដើមគ ហើយតម្រូវឲ្យអាជីវករទាំងអស់ទៅលក់ដូរនៅផ្សារដើមគថ្មីវិញ ចាប់ពីថ្ងៃទី១៨ ខែមករា ស្អែកនេះតទៅ។
អ្នកនាំពាក្យរដ្ឋបាលរាជធានីភ្នំពេញ លោកស្រី ដោ សម្ផស្ស បានបញ្ជាក់ថា ចាប់ពីថ្ងៃទី១៨ ខែមករា ឆ្នាំ២០២៦ស្អែកនេះតទៅ រដ្ឋបាលរាជធានីភ្នំពេញ នឹងរៀបចំសម្អាតអនាម័យ នៅតាមមហាវិថីម៉ៅសេទុង មហាវិថីព្រះមុន្នីរ៉េត ផ្លូវ២៣០ និងតំបន់ជុំវិញពាក់ព័ន្ធ ជាពិសេសគឺរៀបចំជួសជុល និងកែលម្អហេដ្ឋារចនាសម្ព័ន្ធឲ្យល្អប្រសើរឡើងវិញ ដែលអាចនឹងបង្កការកកស្ទះចរាចរណ៍នៅតំបន់ជុំវិញនោះ។
ក្នុងន័យនេះ សូមប្រជាពលរដ្ឋចូលរួមសហការជាមួយអាជ្ញាធរ និងយោគយល់អធ្យាស្រ័យ ដោយក្តីអនុគ្រោះបំផុត៕
