(សៀមរាប)៖ លោក អុល វណ្ណដា នាយកគ្រប់គ្រង Angkor Wildlife and Aquarium នៅថ្ងៃទី១៧ ខែមករា ឆ្នាំ២០២៥នេះ បានអំពាវនាវឲ្យប្រជាពលរដ្ឋ និងភ្ញៀវទេសចរ ចូលរួមកាត់បន្ថយការប្រើប្រាស់ផ្លាស្ទីក និងឈប់បរិភោគត្រីដែលកំពុងជិតផុតពូជ ដើម្បីការពារបរិស្ថានទឹក និងជីវចម្រុះសត្វទឹកនៅកម្ពុជា។

ថ្លែងប្រាប់អ្នកសារព័ត៌មាន លោកបានបញ្ជាក់ថា បច្ចុប្បន្ន Angkor Wildlife and Aquarium ផ្ដោតសំខាន់លើការអភិរក្សសត្វទឹក ជាពិសេសត្រីីគល់រាំង ដែលត្រូវបានដាក់ជាត្រីតំណាងជាតិ តាំងពីឆ្នាំ២០០៥ ហើយនៅតាមប្រាសាទអង្គរ ក៏មានចម្លាក់រូបត្រីប្រភេទនេះជាច្រើនផងដែរ។

ជាមួយគ្នានេះ Aquarium បានអនុវត្តកម្មវិធីកាត់បន្ថយផ្លាស្ទីក និងប្រមូលសម្រាម នៅតំបន់ភូមិកំពង់ភ្លុក និងកំពង់ឃ្លាំង ដោយអប់រំពលរដ្ឋឲ្យយល់ដឹងអំពីការថែរក្សាបរិស្ថាន និងការចិញ្ចឹមត្រី តាមលក្ខណៈបច្ចេកទេសត្រឹមត្រូវ។ លោកបានបន្ដថា បរិស្ថានស្អាត នឹងជួយទាក់ទាញភ្ញៀវទេសចរ និងបង្កើនចំណូលសហគមន៍ ខណៈបរិស្ថានបំពុល នឹងប៉ះពាល់ដល់សត្វត្រី និងសុខភាពអ្នកបរិភោគ។

លោកនាយកគ្រប់គ្រង Angkor Wildlife and Aquarium បានបញ្ជាក់ថា គោលដៅសំខាន់របស់ Angkor Wildlife and Aquarium គឺ «សង្គ្រោះ បង្កាត់ពូជ និងប្រលែង» សត្វទឹកទៅកាន់ធម្មជាតិវិញ ហើយកំពុងអនុវត្តគោលការណ៍ «plastic is last option» ដោយប្រើផ្លាស្ទីកតែនៅពេលចាំបាច់ប៉ុណ្ណោះ។

ក្រៅពីជាគោលដៅទេសចរណ៍កម្សាន្ត Angkor Wildlife and Aquarium ក៏ជាមជ្ឈមណ្ឌលអប់រំអំពី ការអភិរក្ស ដោយលើកទឹកចិត្តឲ្យមនុស្សពេញវ័យឈប់បរិភោគត្រីដែលហាមឃាត់ ឬកំពុងជិតផុតពូជ និងអំពាវនាវឲ្យកុមារៗ មកទស្សនា សិក្សាស្វែងយល់អំពីសារៈសំខាន់ នៃការថែរក្សាបរិស្ថានទឹក ដើម្បីរក្សាជីវចម្រុះសម្រាប់ជំនាន់ក្រោយ៕