(សៀមរាប)៖ លោក ឌុច សារ៉េត អនុប្រធានសមាគមទេសចរណ៍ខេត្តសៀមរាប នៅថ្ងៃទី១៧ ខែមករា ឆ្នាំ២០២៦នេះ បានលើកឡើងថា តម្លៃស្នូលដ៏សំខាន់របស់កម្ពុជា គឺវប្បធម៌ និងអរិយធម៌ ដែលមានប្រវត្តិសាស្ត្រយូរលង់ រួមមាន ម្ហូបអាហារ ប្រពៃណី សម្លៀកបំពាក់ និងរបៀបរស់នៅ ដែលជាធាតុសំខាន់ ក្នុងការទាក់ទាញភ្ញៀវទេសចរជាតិ និងអន្តរជាតិមកទស្សនា។

ថ្លែងប្រាប់អ្នកសារព័ត៌មាន, អនុប្រធានសមាគមទេសចរណ៍ខេត្តសៀមរាប បញ្ជាក់ថា ភ្ញៀវទេសចរមិនមែនមកកម្សាន្តត្រឹមតែទីតាំង ឬទេសភាពប៉ុណ្ណោះទេ ប៉ុន្តែចង់ស្វែងយល់អំពីជីវិត និងវប្បធម៌របស់មនុស្សក្នុងមូលដ្ឋាន ចាប់ពីប្រវត្តិសាស្ត្រអតីតកាល រហូតដល់អត្តសញ្ញាណបច្ចុប្បន្នថា តំបន់នីមួយៗ មានរឿងរ៉ាវ និងលក្ខណៈពិសេសអ្វីខ្លះ។

លោក ឌុច សារ៉េត បន្តថា នៅតំបន់ប្រាសាទអង្គរវត្ត បច្ចុប្បន្នមានការលើកកម្ពស់ការស្លៀកពាក់សម្លៀកបំពាក់ប្រពៃណី និងសម្លៀកបំពាក់តាមបែបតំបន់ ដើម្បីផ្សាភ្ជាប់ភ្ញៀវទេសចរជាមួយវប្បធម៌ និងអនុស្សាវរីយ៍នៃទីកន្លែង។ ការផ្តល់បទពិសោធន៍បែបនេះ ធ្វើឲ្យភ្ញៀវមានអារម្មណ៍ថា ការធ្វើដំណើរមកទស្សនាមិនត្រឹមតែបានឃើញប្រាសាទទេ ប៉ុន្តែបានយកអនុស្សាវរីយ៍វប្បធម៌ត្រឡប់ទៅជាមួយ តាមរយៈរូបភាព និងបទពិសោធន៍ផងដែរ។

ក្នុងន័យនេះ លោក ឌុច សារ៉េត បានអំពាវនាវឲ្យប្រជាពលរដ្ឋក្នុងមូលដ្ឋាន និងអ្នកប្រតិបត្តិការណ៍ទេសចរណ៍ នៅតាមតំបន់ទេសចរណ៍នានា ចូលរួមស្វែងរក និងលើកស្ទួយអត្តសញ្ញាណវប្បធម៌របស់ខ្លួន ដើម្បីបង្កើនភាពទាក់ទាញ និងបង្កើតបទពិសោធន៍ដ៏មានន័យសម្រាប់ភ្ញៀវទេសចរ ជួយឲ្យវិស័យទេសចរណ៍សៀមរាប និងកម្ពុជាមានការរីកចម្រើនប្រកបដោយចីរភាព៕