(តាកែវ)៖ មន្ទីរកសិកម្ម រុក្ខាប្រមាញ់ និងនេសាទ ខេត្តតាកែវ បានសហការជាមួយក្រុមហ៊ុនយី តាក់ គ្រុប និងក្រុមហ៊ុនភាគហ៊ុនជីប៊ិញឌៀន រៀបចំកម្មវិធីវគ្គបណ្តុះបណ្តាល «ដាំដុះស្រូវឆ្លាតវៃស្របទៅនឹងបម្រែបម្រួលអាកាសធាតុ» ក្រោមអធិបតីភាព លោក តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងលោក ទុយ សុភ័ក្រ្ដ អភិបាលរងខេត្តតាកែវ នាថ្ងៃទី១៨ ខែមករា ឆ្នាំ២០២៦។

លោក ញ៉ិប ស្រ៊ន ប្រធានមន្ទីរកសិកម្មខេត្តតាកែវ បានសម្តែងក្តីសោមនស្សរីករាយ និងថ្លែងអំណរគុណនូវវត្តមាន របស់ថ្នាក់ដឹកនាំទាំងអស់ ទាំងថ្នាក់ជាតិ ថ្នាក់ក្រោមជាតិ វិស័យឯកជន និងមន្រ្តីជំនាញទាំងអស់ ដែលបានចូលរួមកម្មវិធីនេះ និងទទួលយល់ដឹងនូវសមិទ្ធផលការងារ ក្នុងវិស័យកសិកម្ម ជាពិសេសការកាត់បន្ថយថ្លៃដើម និងទទួលបានចំណូលខ្ពស់ សម្រាប់កសិករ។

ក្នុងឱកាសនេះ អ្នកឧកញ៉ា សុខ ឆេង អគ្គនាយករងក្រុមហ៊ុន យីតាក់គ្រុប និងលោក ផាន់ វ៉ាន់តឹម អគ្គនាយករងក្រុមហ៊ុនជីភាគហ៊ុនប៊ិញឌៀន មានកិត្តិយសជាខ្លាំង ក្នុងការក្លាយ ជាចំណែកមួយជួយរាជរដ្ឋាភិបាល អភិវឌ្ឍន៍វិស័យកសិកម្ម តាមរយៈការផ្តល់វគ្គបណ្តុះបណ្តាលពីដំណាំស្រូវ ការសហការជិតសិទ្ធ ជាមួយក្រសួង-មន្ទីរកសិកម្ម និងការគាំទ្រ គោលនយោបាយជាតិ ស្តីពីការកាត់បន្ថយថ្លៃដើមផលិត បណ្តុះបណ្តាលកសិករ មន្រ្តីកសិកម្មឃុំ និងការប្រើប្រាស់ជីថ្នាំកសិកម្ម ប្រកបដោយប្រសិទ្ធភាពខ្ពស់។

ជាមួយគ្នានេះ លោកបណ្ឌិត គង់ គា ប្រធាននាយកដ្ឋានដំណាំស្រូវ នៃអគ្គនាយកដ្ឋានកសិកម្ម បានថ្លែងចំណាប់អារម្មណ៍រីករាយ ដែលបានចែករំលែក និងលើកឡើង ពីវិស័យដំណាំស្រូវទូទាំងប្រទេស និងក្នុងខេត្តតាកែវ ដែលជាខេត្តសក្តានុពលផងដែរ ក្នុងការចូលរួមចំណែកលើក កម្ពស់សេដ្ឋកិច្ចជាតិ និងសេដ្ឋកិច្ចប្រជាពលរដ្ឋ។

លោក ទុយ សុភ័ក្រ្ដ បានគូសបញ្ជាក់អំពីគោលនយោបាយអាទិភាពទី៥ និងទី៦ ធ្វើ យ៉ាងណាឱ្យប្រជាពលរដ្ឋ មានហូប មានប្រើ មានបាន និងមានរហូត ពោលគឺធ្វើឱ្យខេត្តតាកែវ មានការជំរុញទីផ្សារផលិតកម្មកសិកម្ម ការរក្សាលំនឹងថ្លៃ ការចងក្រងសហគមន៍កសិកម្មទំនើប និងការផ្សារភ្ជាប់មន្រ្តីកសិកម្មឃុំ ជាមួយនឹងកសិករនៅមូលដ្ឋាន។

កម្មវិធីនេះ បានបិទបញ្ចប់នារសៀលថ្ងៃដដែល ក្រោមអធិបតីភាព លោក តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ដោយលោកបានលើកឡើង អំពីវិស័យកសិកម្មកម្ពុជា ការកែច្នៃផលិតផលកសិកម្ម និងជំរុញឱ្យមានវគ្គបណ្តុះបណ្តាល សម្រាប់មន្រ្តីកសិកម្មឃុំ ផ្សារភ្ជាប់នឹងកសិករ។

ជាទីបញ្ចប់ លោករដ្ឋលេខាធិការ បានណែនាំដល់មន្រ្តីកសិកម្មឃុំ គួរយកចំណេះដឹងចុះផ្សព្វផ្សាយបច្ចេកទេសដល់មូលដ្ឋានជាក់ស្តែង ពីការប្រើប្រាស់ ថ្នាំពុលកសិកម្ម ជីកសិកម្ម ស្របតាមបច្ចេកទេស មានគុណភាពខ្ពស់ មានស្មារតីទទួលខុសត្រូវ ក្នុងការងារដោះស្រាយទុក្ខកង្វល់របស់កសិករ យកចិត្តទុកដាក់តាមដានពីតម្លៃស្រូវ និងក្លាយជាមន្រ្តីកសិកម្មឃុំវៃឆ្លាត ជួយលើកកម្ពស់ប្រជាពលរដ្ឋ៕