(ភ្នំពេញ)៖ លោក នេត្រ ភក្ត្រា រដ្ឋមន្ត្រីក្រសួងព័ត៌មាន បានបង្ហាញសង្ឃឹមថាសន្និបាតរបស់ក្រសួងព័ត៌មាន នឹងផ្តល់ឱកាសឱ្យថ្នាក់ដឹកនាំ និងមន្ត្រីរាជការទាំងអស់ ចូលរួមសាទរសមិទ្ធផលសម្រេចបាននៅឆ្នាំចាស់ ក៏ដូចជារួមគ្នាជាគំនិតដើម្បីកំណត់ទិសដៅការងារជាយុទ្ធសាស្ត្រក្នុងការលើកស្ទួយវិស័យព័ត៌មាន និងសោតទស្សន៍ ដែលជាធាតុដ៏សំខាន់ក្នុងការលើកកម្ពស់កិត្យានុភាពកម្ពុជា នៅក្នុងតំបន់ និងនៅលើឆាកអន្តរជាតិ ជាពិសេសក្នុងការថែរក្សាសន្តិភាព ស្ថិរភាពនយោបាយ សន្តិសុខ និងសណ្តាប់ធ្នាប់សង្គម។

ការបង្ហាញក្តីសង្ឃឹមបែបនេះរបស់រដ្ឋមន្ត្រីក្រសួងព័ត៌មាន បានធ្វើឡើងនៅព្រឹកថ្ងៃទី១៩ ខែមករា ឆ្នាំ២០២៦នេះ ក្នុងឱកាសអញ្ជើញជាអធិបតីភាពបើកសន្និបាតបូកសរុបលទ្ធផលការងារឆ្នាំ២០២៥ និងលើកទិសដៅការងារឆ្នាំ២០២៦ របស់ក្រសួងព័ត៌មាន ក្រោមមូលបទ៖ «ការពង្រឹងប្រសិទ្ធភាព និងសមត្ថភាពស្ថាប័នក្រោមរចនាសម្ព័ន្ធ មុខងារ និងភារកិច្ចថ្មី» នៅសាលចតុម្មុខមង្គល នៃទីស្តីការក្រសួងព័ត៌មាន។

រដ្ឋមន្ត្រី នេត្រ ភក្ត្រា បានលើកឡើងថា សន្និបាតរយៈពេល ៣ថ្ងៃនេះ មិនត្រឹមតែជាការបូកសរុបសមិទ្ធផលសំខាន់ៗដែលក្រសួងព័ត៌មានសម្រេចបានក្នុងរយៈពេលពេញមួយឆ្នាំ២០២៥ និងលើកទិសដៅការងារសម្រាប់ឆ្នាំថ្មី២០២៦ ឱ្យកាន់តែមានប្រសិទ្ធភាព និងស័ក្ដិសិទ្ធិភាពប៉ុណ្ណោះទេ វាក៏ជាឱកាសសម្រាប់ការជួបជុំមួយឆ្នាំម្តងរវាងថ្នាក់ដឹកនាំ និងមន្ត្រីរាជការទាំងអស់របស់ក្រសួងព័ត៌មាន ដើម្បីជជែកពិភាក្សា បំផុសគំនិតថ្មីៗ កំណត់បញ្ហាប្រឈមដែលអាចកើតមានឡើង ក៏ដូចជាស្វែងរកដំណោះស្រាយ និងសិក្សាអំពីឧត្តមានុវត្តសម្រាប់ចូលរួមអភិវឌ្ឍវិស័យព័ត៌មាន និងសោតទស្សន៍នៅកម្ពុជាឱ្យកាន់តែរីកចម្រើន។

នៅចំពោះមុខថ្នាក់ដឹកនាំ និងមន្ត្រីរាជការ, រដ្ឋមន្ត្រី នេត្រ ភក្ត្រា បានឱ្យដឹងថា ក្រោមការដឹកនាំប្រកបដោយភាពឈ្លាសវៃ និងចក្ខុវិស័យវែងឆ្ងាយរបស់សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្នុងនីតិកាលទី៧ នៃរដ្ឋសភា ក្រសួងព័ត៌មាន បានកំណត់ចក្ខុវិស័យរបស់ខ្លួនឱ្យក្លាយទៅជាស្ថាប័នទំនាក់ទំនងសាធារណៈ របស់រាជរដ្ឋាភិបាលប្រកបដោយបុរេសកម្ម សកម្ម អន្តរសកម្ម ប្រសិទ្ធភាព និងប្រសិទ្ធផល ដើម្បីគ្រប់គ្រងលំហព័ត៌មាន ធានានូវសន្តិសុខព័ត៌មាន និងសណ្តាប់ធ្នាប់សាធារណៈ។ ទន្ទឹមនេះដែរ ក្រសួងបាននិងកំពុងជំរុញ និងលើកកម្ពស់ការគោរពសិទ្ធិសេរីភាពសារព័ត៌មាន សិទ្ធិក្នុងការបញ្ចេញមតិ និងសិទ្ធិក្នុងការទទួលបានព័ត៌មាន ក្នុងចំណោមប្រតិបត្តិករព័ត៌មាន អ្នកសារព័ត៌មាន អ្នកផលិតមាតិកា និងអ្នកពាក់ព័ន្ធ ក្នុងបុព្វហេតុការពារសន្តិភាព ស្ថិរភាពនយោបាយ និងសណ្តាប់ធ្នាប់សង្គម។

រដ្ឋមន្ត្រីក្រសួងព័ត៌មាន បានឱ្យដឹងថា កាលពីខែវិច្ឆិកា ចុងឆ្នាំ២០២៥ ថ្មីៗនេះ ក្រសួងក៏បានកំណត់នូវលក្ខខណ្ឌគុណវុឌ្ឍ និងវិជ្ជជីវៈសារព័ត៌មាន សម្រាប់អ្នកអនុវត្តសកម្មភាព ក្នុងវិស័យព័ត៌មាន និងងសោតទស្សន៍ ក្នុងគោលបំណងពង្រឹងសណ្ដាប់ធ្នាប់សារព័ត៌មាន លើកកម្ពស់វិជ្ជាជីវៈសារព័ត៌មាន គុណភាពសារព័ត៌មាន និងសុវត្ថិភាពព័ត៌មាន សម្រាប់សាធារណជន។ ការអភិវឌ្ឍធនធានមនុស្ស និងបណ្តុះស្មារតីមនសិការវិជ្ជាជីវៈ ជាទិសដៅយុទ្ធសាស្ត្រទី៣ នៃផែនការយុទ្ធសាស្ត្រអភិវឌ្ឍន៍វិស័យព័ត៌មាន និងសោតទស្សន៍ ឆ្នាំ២០២៤-២០២៨។ ការកសាងធនធានមនុស្សជាការវិនិយោគដ៏វែងឆ្ងាយរបស់រាជរដ្ឋាភិបាល ក៏ដូចជាក្រសួងព័ត៌មាន ដើម្បីឈានទៅបង្កើតមូលធនមនុស្សពិតប្រាកដប្រកបដោយសមត្ថភាព ជំនាញ និងចំណេះដឹងដ៏មានសក្តានុពលដែលសង្គមជាតិត្រូវ
ការជាចាំបាច់។

បន្ថែមពីនេះ រដ្ឋមន្ត្រី នេត្រ ភក្ត្រា បានគូសបញ្ជាក់ថា ក្រសួងព័ត៌មាន បានរៀបចំផែនការកសាង និងអភិវឌ្ឍន៍មូលធនមនុស្សក្នុងវិស័យព័ត៌មាន និងសោតទស្សន៍ ឆ្នាំ២០២៥-២០២៨ ដែលមានវិសាលភាពចំពោះមន្ត្រីរាជការក្រសួងព័ត៌មានដោយផ្តោតលើ១) ការកសាង និងអភិវឌ្ឍជំនាញវិជ្ជាជីវៈ (បរិញ្ញាបត្រ បរិញ្ញាបត្រជាន់ខ្ពស់២) កម្មវិធីបណ្តុះបណ្តាលជំនាញបច្ចេកទេសវិជ្ជាជីវៈ និងការគ្រប់គ្រង ៣) ការបង្កើនសមត្ថភាពផ្នែកច្បាប់សម្រាប់ការគ្រប់គ្រងអង្គភាព និង៤) ការលើកកម្ពស់សមត្ថភាពការងារទំនាក់ទំនងសាធារណៈ និងកិច្ចសហប្រតិបត្តិការ។ ជាលទ្ធផលក្រុមការងារបានបណ្តុះបណ្តាលមន្ត្រីក្រសួងព័ត៌មាន និងអ្នកសារព័ត៌មានមកពីអង្គភាពសារព័ត៌មានឯកជនជិត ១ ០០០នាក់ ចាប់តាំងពីខែកុម្ភៈ ឆ្នាំ២០២៥មក។

រដ្ឋមន្ត្រីក្រសួងព័ត៌មាន បានបញ្ជាក់ថា សមិទ្ធផលដែលសម្រេចបានក្នុងឆ្នាំ២០២៥ គឺជាលទ្ធផលដែលបានមកពីការខិតខំប្រឹងប្រែង ការសហការគ្នាយ៉ាងជិតស្និទ្ធ និងស្មារតីទទួលខុសត្រូវខ្ពស់របស់ថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់នៃក្រសួងព័ត៌មាន ក្នុងការអនុវត្តការងារដែលក្រសួងបានដាក់ចេញ៕