(ចិន)៖ នាពេលថ្មីៗនេះ នៅទីស្នាក់ការសមាគមទំនាក់ទំនងយុវជនកម្ពុជា-ចិន (CCYA) និងសមាគមនិស្សិតកម្ពុជាប្រចាំសាធារណរដ្ឋប្រជាមានិតចិន (ACSC) បានរៀបចំកិច្ចប្រជុំ ជួបសំណេះសំណាល និងផ្តល់ប្រឹក្សាយោបល់ ក្នុងការរៀបចំឯកសារអាហារូបករណ៍ CSC Type A ព្រមទាំងជួយស្នើសុំលិខិតចូលរៀន នៅតាមសាកលវិទ្យាល័យនានា (Pre Admission Letter) ជូនបេក្ខជនដែលបានប្រឡងជាប់អាហារូបករណ៍ចិន ទាំងថ្នាក់បណ្ឌិត ថ្នាក់បរិញ្ញាបត្រជាន់ខ្ពស់ និងថ្នាក់បរិញ្ញាបត្រ តាមរយៈការប្រឡងជ្រើសរើស ដោយក្រសួងអប់រំ យុវជន និងកីឡា កាលពីដើមខែមករា ឆ្នាំ២០២៦ សរុបមានបេក្ខជន ចំនួន៧៥រូប។

នៅក្នុងអង្គប្រជុំ លោក អ៊ុំ វុទ្ធទី ស្ថាបនិក និងជាប្រធានក្រុមប្រឹក្សាភិបាលសមាគម ព្រមទាំងជាជំនួយការសម្តេចតេជោប្រធានព្រឹទ្ធសភា អមដោយ លោក ហោ តារា និង សៀន ដាវីន សមាជិកក្រុមប្រឹក្សាភិបាលសមាគម បានចូលរួមពិគ្រោះយោបល់ ណែនាំ និងចែករំលែកបទពិសោធន៍ការរៀបចំឯកសារអាហារូបករណ៍តាមរយៈការស្នើសុំតាមអនឡាញ (CSC Online Application Form) ជូនបេក្ខជនជ័យលាភីទាំងអស់។

លោកប្រធានក្រុមប្រឹក្សាភិបាលសមាគម បានជំរុញលើកទឹកចិត្តដល់និស្សិតជ័យលាភីទាំងអស់ ត្រូវខិតខំព្យាយាមប្រឹងប្រែងរៀនសូត្រ រៀនឱ្យខ្លាំង ប្រកបដោយគុណភាពខ្ពស់ ដើម្បីក្លាយទៅជាមូលធនមនុស្សប្រកបដោយសមត្ថភាពខ្ពស់ និងមានជំនាញច្បាស់លាស់ ដើម្បីចូលរួមជាមួយរាជរដ្ឋាភិបាលក្រោមដឹកនាំរបស់សម្តេចធិបតីនាយករដ្ឋមន្ត្រី ក្នុងពង្រឹងការអភិវឌ្ឍប្រទេសជាតិ ឱ្យរឹងមាំគ្រប់វិស័យ។

តាមរបាយការណ៍របស់លោកប្រធានក្រុមប្រឹក្សាភិបាលសមាគម បានលើកឡើងថា នេះមិនមែនជាលើកទី១ ដែលសមាគមនិស្សិត ស្ម័គ្រចិត្តជួយសម្រួលការរៀបចំឯកសារ ជូនបេក្ខជនក្រោយប្រកាសលទ្ធភាពប្រលងអាហារូបករណ៍របស់ក្រសួងអប់រំ យុវជន និងកីឡា។ ក្នុងរយៈពេល៧ឆ្នាំ កន្លងមកនេះ សមាគម តែងតែជួយណែនាំ និងសម្របសម្រួលដល់បេក្ខជ័យលាភី ដោយសារតែពួកគាត់ភាគច្រើន មិនសូវបានស្វែងយល់បានច្រើនអំពីការជ្រើសរើស ជំនាញ និងសាកលវិទ្យាល័យនានា នៅក្នុងប្រទេសចិន។
បច្ចុប្បន្ននេះ និស្សិតកម្ពុជាកំពុងសិក្សាខេត្តក្រុងចំនួន២៥ សរុបមានចំនួនប្រមាណ១៤០០នាក់ ស្ថិតនៅសាលលវិទ្យាល័យចំនួនប្រមាណ១០០ ទូទាំងប្រទេសចិន៕