(ព្រះវិហារ)៖ អំណោយមនុស្សធម៌របស់រាជរដ្ឋាភិបាលចិន រួមជាមួយការឧបត្ថម្ភពីសប្បុរសជននានា ត្រូវបានអាជ្ញាធរខេត្តព្រះវិហារ នាំយកទៅចែកជូនដល់បងប្អូនប្រជាពលរដ្ឋភៀសសឹកចំនួន៧០០គ្រួសារ ដែលកំពុងស្នាក់នៅបណ្តោះអាសន្ន មណ្ឌលសុវត្ថិភាពវត្តកំពង់សង្កែ ស្ថិតក្នុងភូមិសង្កែ ឃុំកំពង់ស្រឡៅមួយ ស្រុកឆែប នាព្រឹកថ្ងៃទី២១ ខែមករា ឆ្នាំ២០២៦។

ពិធីចែកអំណោយនេះ ដឹកនាំដោយលោក គឹម ចាន់បញ្ញា អភិបាលរងខេត្តព្រះវិហារ និងលោក ឃិត សុធារ៉ា អភិបាលស្រុកឆែប និងជាប្រធានគ្រប់គ្រងមណ្ឌលសុវត្ថិភាពវត្តកំពង់សង្កែ ដោយមានការចូលរួមពីអាជ្ញាធរមូលដ្ឋាន កម្លាំងប្រដាប់អាវុធ និងមន្ត្រីពាក់ព័ន្ធជាច្រើនរូបទៀត។

ក្នុងឱកាសនោះ លោក គឹម ចាន់បញ្ញា បានថ្លែងនាំនូវការផ្តាំផ្ញើសាកសួរសុខទុក្ខ និងការយកចិត្តទុកដាក់ពីលោក គីម រិទ្ធី អភិបាលខេត្តព្រះវិហារ ជូនដល់បងប្អូនប្រជាពលរដ្ឋភៀសសឹកទាំងអស់ ដែលកំពុងប្រឈមនឹងការលំបាកក្នុងជីវភាពរស់នៅ ដោយសារតែស្ថានការណ៍អសន្តិសុខ និងវិបត្តិដែលកើតមាននៅតាមព្រំដែន។ លោកបានបញ្ជាក់ថា ថ្នាក់ដឹកនាំខេត្តតែងតែគិតគូរ និងយកចិត្តទុកដាក់ជានិច្ច ចំពោះសុខទុក្ខ និងការរស់នៅរបស់ប្រជាពលរដ្ឋទូទាំងខេត្ត ជាពិសេសបងប្អូន ជនភៀសសឹក ដែលកំពុងស្នាក់នៅតាមមណ្ឌលសុវត្ថិភាពនានា។

ជាមួយគ្នានេះ ក្នុងនាមអភិបាលខេត្តព្រះវិហារ លោក គឹម ចាន់បញ្ញា បានសម្តែងនូវការអរគុណយ៉ាងជ្រាលជ្រៅ ចំពោះរាជរដ្ឋាភិបាលចិន ដែលបានបង្ហាញពីស្មារតីមនុស្សធម៌ ការយកចិត្តទុកដាក់ និងការគាំទ្រដ៏មានតម្លៃ ដល់ប្រជាពលរដ្ឋកម្ពុជា ជាពិសេសបងប្អូនប្រជាពលរដ្ឋភៀសសឹក ដែលកំពុងជួបប្រទះភាពលំបាកដោយសារសង្គ្រាមឈ្លានពានពីកងទ័ពសៀម។

លោកថា ការឧបត្ថម្ភនេះ បានបង្ហាញឲ្យឃើញពីចំណងមិត្តភាព កិច្ចសហប្រតិបត្តិការ និងសាមគ្គីភាពដ៏ល្អប្រសើរ រវាងប្រទេសទាំងពីរ ក្នុងការរួមចំណែកជួយសង្គ្រោះ និងលើកកម្ពស់ជីវភាពរស់នៅរបស់ប្រជាពលរដ្ឋ នៅពេលកំពុងជួបវិបត្តិ។

សូមបញ្ជាក់ថា អំណោយមនុស្សធម៌ដែលត្រូវបានចែកជូនក្នុងលើកនេះ សម្រាប់ប្រជាពលរដ្ឋភៀសសឹកចំនួន ៧០០ គ្រួសារ ក្នុងមួយគ្រួសារៗ ទទួលបានរួមមាន៖ អង្ករ ១ បេ មី ១ កេស ភួយ ១ នំធុង ១ កេស ព្រមទាំងគ្រឿងបរិភោគចាំបាច់ផ្សេងៗ ដូចជា អំបិល ប៊ីចេង ស្ករ ប្រហុក ឆៃប៉ូវ ប្រេងសណ្តែក និងខ្ទឹម ដែលជាការជួយសម្រួលដល់ជីវភាពប្រចាំថ្ងៃ កាត់បន្ថយការចំណាយ និងបំពេញតម្រូវការមូលដ្ឋានរបស់ប្រជាពលរដ្ឋ ក្នុងអំឡុងពេលកំពុងជួបប្រទះការលំបាក៕